சித்திரை திருவிழா தேரோட்டம்: மதுரை, மானாமதுரை, சங்கரன்கோவிலில் கோலாகலம்
மதுரை: மதுரை மீனாட்சியம்மன் கோவில் சித்திரை திருவிழா தேரோட்டம் ஞாயிறன்று வெகு விமரிசையாக நடைபெற்றது. நான்கு மாசி வீதிகளில் ஆடி அசைந்த வந்த தேரினை பல்லாயிரக்கணக்கான பக்தர்கள் தரிசனம் செய்தனர்
மதுரை மீனாட்சி அம்மன் கோயில் சித்திரைத் திருவிழா மே 1ல் கொடியேற்றத்துடன் துவங்கியது. நேற்று முன்தினம் திருக்கல்யாணம் நடந்தது.
சித்திரை தேரோட்டம்
முக்கிய நிகழ்வுகளில் ஒன்றான தேரோட்டம் ஞாயிறு காலை கோலாகலமாக நடைபெற்றது. அதிகாலை 5 மணிக்கு மீனாட்சி, சுவாமி மற்றும் பிரியாவிடை கோயிலில் இருந்து புறப்பாடாகினர். சுந்தரேஸ்வரர், பிரியாவிடை பெரிய தேரில் காலை 6.05 மணிக்கு எழுந்தருளினர்.
பக்தர்கள் தரிசனம்
‘சம்போ ஹர, ஹர மகாதேவா' என்ற பக்தர்களின் கோஷம் விண்ணைப் பிளக்க தேர் புறப்பட்டது. தொடர்ந்து சுமார் அரை மணி நேர இடைவெளியில் மீனாட்சி அம்மன் எழுந்தருளிய சின்ன தேரும் புறப்பட்டது. இத்தேர்களை போட்டி போட்டுக்கொண்டு பலரும் வடம்பிடித்து இழுத்தனர். தேரோட்டத்தில் ஏராளமான பக்தர்கள் கலந்துகொண்டு சுவாமி, அம்மனை வழிபட்டனர்.
சங்கரன்கோவில் சித்திரை திருவிழா
சங்கரன்கோவில் அருள்மிகு சங்கரநாராயண சுவாமி கோயில் சித்திரைத் திருவிழாவையொட்டி ஞாயிற்றுக்கிழமை தேரோட்டம் நடைபெற்றது.
சங்கரன்கோவிலில் சித்திரைத் திருவிழா ஆண்டுதோறும் சித்திரை மாதம் 10 நாள்கள் நடைபெறும்.
வடம் பித்த பக்தர்கள்
9-ஆம் திருநாளான ஞாயிற்றுக்கிழமை சுவாமி, அம்பாள் எழுந்தருளிய தேரோட்டம் நடைபெற்றது. முன்னதாக சுவாமி, அம்பாள் அதிகாலையில் தனித்தனி தேர்களில் எழுந்தருளினர். அப்போது சிறப்பு பூஜைகள் நடைபெற்றன.
இதையடுத்து, காலை 9.50 மணிக்கு சுவாமி தேர் புறப்பட்டு வடக்கு ரத வீதிக்கு வந்ததும் அங்கு நிறுத்தப்பட்டது. பின்னர், முற்பகல் 11 மணிக்கு அம்பாள் தேர் புறப்பட்டது. திரளான பக்தர்கள் தேரோட்டத்தில் பங்கேற்றனர்.
மானாமதுரை தேரோட்டம்
மானாமதுரை, ஆனந்தவல்லி சோமநாதர் கோவில் சித்திரை திருவிழாவை முன்னிட்டு, நேற்று தேரோட்டம் நடைபெற்றது. ஞாயிறு காலை 9 மணிக்கு, அலங்கரிக்கப்பட்ட தேரில், பிரியாவிடையுடன், சோமநாதர், ஆனந்தவல்லியம்மன் தேரில் எழுந்தருளினர். பட்டர்கள் அம்பி, குமார், பரத்வாஜ் ஆகியோர் பூஜைகள் செய்ய, ஏராளமான பக்தர்கள் தேர் வடத்தை பிடித்து இழுத்தனர். தேர் நான்கு ரதவீதிகளையும் சுற்றி காலை 11:30 மணிக்கு, நிலையை அடைந்தது.
Click it and Unblock the Notifications
Sign in with Google