தேர்தல் திண்ணை... இவங்கெல்லாம் "இதை" வச்சுத்தான் கூடிக் கூடிப் பேசுறாங்க!

Published: Monday, February 1, 2016, 13:18 [IST]

Subscribe to Oneindia Tamil

சென்னை: சட்டசபைத் தேர்தலாகட்டும், நாடாளுமன்றத் தேர்தலாகட்டும், ஒவ்வொரு கட்சியும் தனது வாக்கு வங்கியை அடிப்படையாக வைத்துத்தான் கூட்டணி பேசும், சீட் கேட்கும். அந்த வகையில் கடந்த தேர்தலில் ஒவ்வொரு முக்கியக் கட்சியும் பெற்ற வாக்குகளைப் பார்த்தால் சுவாரஸ்யமான பல தகவல்கள் நமக்குக் கிடைக்கும்.

2011ம் ஆண்டு நடந்த சட்டசபைத் தேர்தலில் அதிமுக வெற்றி பெற்றது. படு புத்திசாலித்தனமாக செயல்பட்டு தேமுதிகவை வளைத்துப் போட்டு திமுகவை வீழ்த்தியது அதிமுக.

தேமுதிகவை கூட்டணிக்குள் கொண்டு வர முடியாமல் போனதால், திமுக இந்தத் தேர்தலில் தோல்வியைச் சந்திக்க நேரிட்டது. இதற்கெல்லாம் காரணம் தேமுதிகவிடமிருந்த வாக்கு சதவீதம்தான்.

கடந்த தேர்தலில் ஒவ்வொரு கட்சியும் பெற்ற வாக்கு சதவீதத்தைப் பார்க்கலாம்...

அதிமுக

கடந்த தேர்தலில் மொத்தம் பதிவான வாக்குகளில் அதிமுகவுக்குக் கிடைத்தது 1 கோடியே 41 லட்சத்து 50 ஆயிரத்து 289 வாக்குகள் ஆகும். அதாவது 38.40 சதவீத வாக்குகளை அதிமுக பெற்றது.

திமுக

2வது இடத்தைப் பெற்ற திமுகவுக்கு கிடைத்த வாக்குகள் 82 லட்சத்து 49 ஆயிரத்து 991 வாக்குகள் ஆகும். வாக்கு சதவீதம் 22.39 சதவீதம் ஆகும்.

காங்கிரஸ்

63 இடங்களை திமுகவிடமிருந்து அடித்துப் பறித்துப் போட்டியிட்டு வெறும் 5 தொகுதிகளில் மட்டுமே வென்ற காங்கிரஸ் கட்சிக்கு கிடைத்த வாக்குகள் 34 லட்சத்து 64 ஆயிரத்து 432 வாக்குகள். கிடைத்த வாக்கு சதவீதம் 9.30 சதவீதம்.

தேமுதிக

விஜயகாந்த்தின் தேமுதிகவுக்கு கடந்த தேர்தலில் செம லாபம் கிடைத்தது. அதுவரை வாக்குகளைப் பிரித்து மட்டுமே வந்த அக்கட்சிக்கு கை கொள்ளாத அளவுக்கு சீட் கிடைத்தது அதிமுக புண்ணியத்தால். தேமுதிகவுக்கு கிடைத்த வாக்குகள் 29 லட்சத்து 3 ஆயிரத்து 828 ஆகும்.வாக்கு சதவீதம் 7.88 சதவீதம்.

பாமக

30 இடங்களில் போட்டியிட்டு 3 இடங்களில் மட்டுமே வென்ற பாமகவுக்கு கிடைத்த வாக்குகள் 19 லட்சத்து 27 ஆயிரத்து 783 வாக்குகள். வாக்கு சதவீதம் 5.23 சதவீதமாகும்.

பாஜக

204 தொகுதிகளில் போட்டியிட்டு ஒரு இடத்தில் கூட வெற்றி பெறாத பாஜகவுக்கு 8 லட்சத்து 19 ஆயிரத்து 577 வாக்குகள் கிடைத்தன. வாக்கு சதவீதம் ஜஸ்ட் 2.22 சதவீதம்தான்.

சிபிஎம்

மார்க்சிஸ்ட் கம்யூனிஸ்ட் கட்சி 12 தொகுதிகளில் போட்டியிட்டு 10 இடங்களில் வென்றது. மொத்த வாக்குகள் 8 லட்சத்து 88 ஆயிரத்து 364 ஆகும். வாக்கு சதவீதம் 2.41 சதவீதம்.

சிபிஐ

10 தொகுதிகளில் போட்டியிட்டு 9 தொகுதிகளில் கடந்த தேர்தலில் இந்திய கம்யூனிஸ்ட் வெற்றி பெற்றது. இதற்குக் கிடைத்த வாக்குகள்7 லட்சத்து 27 ஆயிரத்து 394 ஆகும். வாக்கு சதவீதம் 1.97 சதவீதம்.

விடுதலைச் சிறுத்தைகள்

விடுதலைச் சிறுத்தைகள் கட்சி 10 தொகுதிகளில் போட்டியிட்டு எதிலும் வெல்லவில்லை. அதன் வாக்கு சவீதம் 1.51 ஆகும். கிடைத்த வாக்குகள் 5 லட்சத்து 55 ஆயிரத்து 965 வாக்குகள்.

மனித நேய மக்கள் கட்சி

அதிமுக கூட்டணியில் இடம் பெற்ற மனிதநேய மக்கள் கட்சி 3 தொகுதிகளில் போட்டியிட்டு இரண்டில் வென்றது. இக்கட்சிக்குக் கிடைத்து வாக்குகள் 1 லட்சத்து 81 ஆயிரத்து 180 ஆகும். இதன் வாக்கு சதவீதம் 0.49 சதவீதம்.

புதிய தமிழகம்

புதிய தமிழகம் கட்சி அதிமுக கூட்டணியில் இடம் பெற்று 2 இடங்களில் போட்டியிட்டு இரண்டிலும் வென்றது. பெற்ற வாக்குகள் 1 லட்சத்து 46 ஆயிரத்து 454 ஆகும். வாக்கு சதவீதம் 0.40.

Published On February 1, 2016