பணப்பட்டுவாடா செய்த தினகரன் கோஷ்டி… செல்போனில் படம் பிடித்து வெளியிட்ட பலே ஓபிஎஸ் அணி
ஆர்.கே. நகர் தொகுதியில் அதிமுக அம்மா கட்சி வேட்பாளர் டிடிவி தினகரனின் ஆதரவாளர்கள் வாக்காளர் பட்டியல் வைத்துக் கொண்டு பணப்பட்டுவாடா செய்த போது எடுத்த வீடியோ வெளியாகி பரபரப்பு ஏற்படுத்தியுள்ளது.
சென்னை: ஆர். கே. நகரில் தொப்பிச் சின்னத்தில் போட்டியிடுகிறார் டிடிவி தினகரன். அவருக்கு வாக்களிக்க வேண்டும் என்று கோரி அவரது ஆதரவாளர்கள் வாக்காளர்களுக்கு பணப்பட்டுவாடா செய்யும் காட்சிகளை ஓபிஎஸ் அணியினர் செல்போனில் படம் பிடித்தனர். அதிர்ச்சி அளிக்கும் அந்த வீடியோ வெளியாகி பரபரப்பை ஏற்படுத்தி வருகிறது.
வீடியோவில் ஒரு குடும்பத்தில் உள்ள ஆண்கள் பெண்கள் என அனைவரும் ஒரு வீட்டில் ஒன்று கூடி நிற்கின்றனர். வெள்ளை சட்டையுடன், லுங்கி கட்டிக் கொண்டு அந்த பகுதியில் உள்ள ஒரு சாதாரண நபர் போன்று வீட்டிற்குள் ஒருவர் நுழைகிறார். அவரைத் தொடர்ந்து வாக்காளர் பட்டியலை எடுத்துக் கொண்டு மற்றொருவர் உள்ளே நுழைகிறார்.
பின்னர், நிதானமாக வாக்காளர் பட்டியலை பிரிக்கும் ஒருவர் பட்டியலில் உள்ள குறிப்பிட்ட முகவரியில் உள்ள பெயர்களை சரிபார்க்கிறார். அந்த பெயர்களை அவர் உறுதி செய்த பின்னர், கட்டுக்கட்டாய் புத்தம் புதிதாய் கையில் மின்னும் 2 ஆயிரம் ரூபாய் நோட்டை இரண்டு எடுத்து ஒருவர் வாக்காளர் கையில் நீட்டுகிறார்.
அப்போது தொப்பி சின்னத்துக்கு ஓட்டு போடுங்க என்று பணம் கொடுத்த அதிகாரத்தோடு சொல்கிறார். பின்னர், அடுத்தது யாரு என்று கேட்கிறார். அவருக்கும் இரண்டு இரண்டாயிரம் ரூபாய் நோட்டுக்களை எண்ணி கொடுக்கிறார். பின்னர் சகுந்தலா மற்றும் சில பெயர்களை சொல்லி ஏதோ கேட்கிறார்.
இவர் பணத்தை கொடுத்து முடிந்த உடன் வாக்காளர் பட்டியலோடு உள்ளே நுழைந்தவர் பணம் பெற்ற வாக்காளர் பெயரை சரியாக டிக் செய்து கொள்கிறார். டிடிவி தினகரன் கோஷ்டியினர் செய்யும் இந்த அட்டூழியங்களை ஓபிஎஸ் அணியினர் செல்போனில் படம் பிடித்துள்ளனர். இந்த வீடியோ வெளியாகி பெரும் பரபரப்பை ஏற்படுத்தியுள்ளது.