அதிமுகவை ஆதரிக்கிறது வேல்முருகனின் தமிழக வாழ்வுரிமைக் கட்சி?

By Mathi

Published: Monday, February 10, 2014, 9:56 [IST]

Subscribe to Oneindia Tamil

சென்னை: லோக்சபா தேர்தலில் அதிமுகவை ஆதரிக்க தி. வேல்முருகன் தலைமையிலான தமிழக வாழ்வுரிமைக் கட்சி முடிவு செய்துள்ளதாக தெரிகிறது.

லோக்சபா தேர்தலில் அதிமுக அணியில் இடதுசாரிகள் ஏற்கெனவே இடம்பெற்றுள்ளன. திமுக அணியில் விடுதலை சிறுத்தைகள் உள்ளிட்ட கட்சிகள் இடம்பெற்றுள்ளன.

பாரதிய ஜனதா அணியில் மதிமுக, கொங்குநாடு மக்கள் தேசிய கட்சி, இந்திய ஜனநாயக கட்சி உள்ளிட்டவை இணைந்துள்ளது. தேமுதிக, பாமக இன்னமும் முடிவு அறிவிக்கவில்லை.

இந்த இரண்டு கட்சிகளும் பாஜகவுடன் பேச்சுவார்த்தை நடத்தி வருகின்றன. இந்த நிலையில் திமுக, தேமுதிகவுக்கு பதிலாக விஜயகாந்தின் எதிரியாகிப் போன லியாகத் அலிகானை சேர்த்துக் கொண்டது.

வேல்முருகனுடன் எம்.ஆர்.கே.பன்னீர்செல்வம் சந்திப்பு

அதேபோல் கடந்த 28-ந் தேதியன்று பாமகவில் இருந்து பிரிந்து போய் தமிழக வாழ்வுரிமைக் கட்சியை நடத்தி வரும் வேல்முருகனை திமுகவின் எம்.ஆர்.கே. பன்னீர்செல்வம் சந்தித்து பேசியிருந்தார்.

திருமா, ஜவாஹிருல்லா அழைப்பு

மேலும் விடுதலை சிறுத்தைகள் கட்சித் தலைவர் தொல். திருமாவளவன், மனித நேய மக்கள் கட்சியின் ஜவாஹிருல்லா ஆகியோரும் திமுக அணிக்கு வர அழைப்பு விடுத்ததாக வேல்முருகன் கூறியிருந்தார். இதைத் தொடர்ந்து உஷாரான அதிமுக தரப்பு வேல்முருகனை தொடர்பு கொண்டது.

ஓ.பி.எஸ். வீட்டில் ஆலோசனை

அதிமுகவின் அழைப்பை ஏற்று நிதி அமைச்சர் ஓ. பன்னீர்செல்வம் இல்லத்துக்கு வேல்முருகன் தலைமையிலான தமிழக வாழ்வுரிமைக் கட்சி நிர்வாகிகள் சென்றனர். அங்கு நடத்தப்பட்ட பேச்சுவார்த்தையின் போது தமிழக வாழ்வுரிமைக் கட்சி நிர்வாகிகள் 2 தொகுதிகளை ஒதுக்குமாறு கேட்டதாக கூறப்படுகிறது.

அதிமுக பதில்

எதிர்வரும் லோக்சபா தேர்தலில் அதிமுகவை ஆதரிக்குமாறும் சட்டசபை தேர்தலில் தேவையான தொகுதிகளை ஒதுக்கீடு செய்து தரலாம் என்றும் அதிமுக தரப்பில் உறுதியளிக்கப்பட்டதாகவும் கூறப்படுகிறது.

அதிமுகவைத்தானே ஆதரிக்க முடியும்..

இது குறித்து கருத்து தெரிவித்துள்ள வாழ்வுரிமைக் கட்சி நிர்வாகிகள், பாமக மற்றும் காங்கிரஸ் அல்லாத கட்சிகளுடன்தான் நாங்கள் கூட்டணி என்பதில் உறுதியாக இருக்கிறோம். பாஜகவுடன் பாமக பேச்சுவார்த்தை நடத்தி வருகிறது. திமுக- காங்கிரஸ் இடையே மீண்டும் கூட்டணி உருவாகலாம் என்ற நிலை இருக்கிறது. அத்துடன் கடந்த 2 ஆண்டுகாலமாக ஈழப் பிரச்சனையில் திமுகவை தொடர்ந்து விமர்சித்து வருகிறோம். இதனால் திமுக அணியில் இணைய முடியாது. எனவே எங்கள் முன்பு உள்ள ஒரே ஒரு வாய்ப்பு அதிமுக அணியை ஆதரிப்பதுதான் என்கின்றனர்.