இல்லை.. இல்லை.. எனக்கு அந்த மாதிரி ஆசை இல்லை: ராஜ்யசபா சீட் குறித்து வைகோ

Published: Monday, May 19, 2014, 15:43 [IST]

Subscribe to Oneindia Tamil

டெல்லி: பாஜக சார்பில் ராஜ்யசபா சீட் உங்களுக்கு வழங்கப்படவுள்ளதாமே என்ற கேள்விக்கு, இல்லை இல்லை எனக்கு அந்த மாதிரி ஆசை இல்லை. அதுகுறித்து நான் பாஜக தலைவர் ராஜ்நாத் சிங்கிடம் பேசவும் இல்லை என்று மதிமுக பொதுச் செயலாளர் வைகோ கூறியுள்ளார்.

டெல்லி சென்றுள்ள வைகோ அங்கு பாஜக தலைவர் ராஜ்நாத் சிங்கைச் சந்தித்தார். அப்போது பாஜகவின் வெற்றிக்கு அவர் பாராட்டும், வாழ்த்தும் தெரிவித்தார்.

பின்னர் செய்தியாளர்களிடம் வைகோ பேசினார். அவரது பேட்டியிலிருந்து...

இதயம் நிறைந்த வாழ்த்துகள்

நான் என் இதயம் நிறைந்த வாழ்த்துக்களை ராஜ்நாத் சிங்கிடம் தெரிவித்தேன். சுதந்திர இந்தியாவின் சரித்திரத்தில் இப்படிப்பட்ட ஒரு மகத்தான வெற்றி, காங்கிரசை வீழ்த்தி எதிர்க்கட்சிக்கு கிடைத்தது இல்லை.

குப்பையில் தூக்கி வீசப்பட்ட காங்கிரஸ்

77ல் கூட இந்திராகாந்தி அம்மையார் தென்னிந்தியாவில் 150 இடங்களை பெற முடிந்தது. இப்போது 50 இடங்களை கூட பெற முடியாத அளவுக்கு குப்பை தொட்டியில் தூக்கி வீசப்பட்டு விட்டது காங்கிரஸ் கட்சி. எங்கள் இலக்கு நிறைவேறியிருக்கிறது.

துடைத்தெறியப்பட்டு விட்ட காங்கிரஸ்

ஈழத்தமிழர்களுக்கும், தமிழ்நாட்டுக்கும் வஞ்சகமும், துரோகமும் செய்த காங்கிரஸ் துடைத்தெறியப்பட்டுவிட்டது.

புதிய விடியலை மோடி தருவார்

நரேந்திர மோடி ஒரு மாபெரும் தலைவராக, புதிய விடியலை இந்தியாவுக்கு கொண்டு வருகின்ற அரசை நடத்துவார் என்று நம்பிக்கையோடு இந்திய மக்கள் அவருக்கு வெற்றியை தந்திருக்கிறார்கள்.

நான் சொன்னபடியே

நான் ராம்ஜெத்மலானி நடத்திய வழக்கறிஞர்கள் மாநாட்டில் குறிப்பிட்டேன், பாஜக 272 இடங்களுக்கு மேல் வெற்றி பெறும். தேசிய ஜனநாயக கூட்டணி 330 இடங்களுக்கு மேல் வெற்றி பெறும். காங்கிரஸ் இரண்டு இலக்கத்துக்கு கீழேதான் வரும் என்று சொன்னேன். ஆமாம் சொன்னீர்கள் என்றார்.

வருத்தப்பட்டார் ராஜ்நாத் சிங்

ராஜ்நாத் சிங், நான் தோற்றதற்கு மிக மிக வருத்தப்பட்டார். இந்த வெற்றியிலேயே நான் மகிழ்ச்சியடைய முடியாமல் நான் கவலைப்பட்டது நீங்கள் தோற்றது தான் என்றார். இல்லை, நான் போராட்டக்காரன். நான் மிகுந்த மகிழ்ச்சியோடு இருக்கிறேன். காங்கிரஸ் தோற்கடிக்கப்பட்டது. அதுமட்டுமல்ல, ராஜ்நாத் சிங் ஒரு திடமான முடிவு எடுக்கக் கூடிய தலைவர். அதனால்தான் மோடி தான் பிரதமர் வேட்பாளர் என்று அறிவித்தார் என்றார் வைகோ.

இல்லை.. அந்த மாதிரி ஆசை இல்லை

வேறு மாநிலத்தில் இருந்து உங்களை பாஜக சார்பில் ராஜ்யசபா உறுப்பினராக தேர்வு செய்வதாக செய்திகள் வெளியாகி உள்ளதே என்று வைகோவிடம் கேட்டதற்கு, இல்லை... இல்லை... அந்த மாதிரி ஆசை எனக்கு இல்லை. அதுபற்றி நான் பேசவும் இல்லை என்று மறுத்து விட்டார் வைகோ.

Published On May 19, 2014