நான் வி.சி.க. வேட்பாளரல்ல... பொது வேட்பாளர்: ஆர்.கே.நகரில் களமிறங்கும் வசந்தி தேவி
சென்னை: விடுதலை சிறுத்தைகள் கட்சியின் சின்னத்தில்தான் போட்டியிட்டாலும், தான் அக்கட்சியின் வேட்பாளர் இல்லை; பொது வேட்பாளர் எனத் தெரிவித்துள்ளார்.
மக்கள் நலக் கூட்டணியில் இடம் பெற்றுள்ள விடுதலைச் சிறுத்தைகள் கட்சி, முதல்வர் ஜெயலலிதா போட்டியிடும் ஆர்.கே.நகர் தொகுதியைக் கேட்டு வாங்கியபோதே பரபரப்பு ஏற்பட்டது. அத்தொகுதியில் ஜெயலலிதாவை எதிர்த்து விடுதலைச் சிறுத்தைகள் கட்சித் தலைவர் திருமாவளவனே போட்டியிட இருப்பதாகவும் தகவல்கள் வெளியானது. இதனால், விடுதலை சிறுத்தைகளின் வேட்பாளர் பட்டியல் பெரிதும் எதிர்பார்க்கப்பட்டது.
இந்நிலையில், நேற்று அக்கட்சியின் இறுதி வேட்பாளர் பட்டியல் வெளியானது. அதில், திருமாவளவன் காட்டுமன்னார்கோவிலில் போட்டியிடுவதாக அறிவிக்கப்பட்டது.
அதோடு, ஜெயலலிதாவை எதிர்த்து சென்னை ஆர்.கே.நகரில் யாருமே எதிர்பார்க்காத வேட்பாளராக கல்வியாளர் வசந்திதேவியை களமிறக்குவதாக அறிவித்தது விடுதலை சிறுத்தைகள் கட்சி.
கல்வியாளர், குழந்தைகளின் நல்வாழ்வுக்காக தொடர்ந்து பல்வேறு தளங்களில் குரலெழுப்பி வருகிறவர், தீவிர இடதுசாரி சிந்தனையாளர் என பன்முகம் கொண்டவர் வசந்திதேவி. இவர் மனோன்மணியம் சுந்தரனார், கொடைக்கானல் அன்னை தெரசா பல்கலைக் கழகங்களில் துணைவேந்தராகவும் பொறுப்பு வகித்துள்ளார்.
தனது இந்த வாய்ப்பு குறித்து அவர் கூறுகையில், "முதலில் ஒரு விஷயத்தை நான் தெளிவுபடுத்திவிடுகிறேன். விடுதலை சிறுத்தைகள் கட்சியின் சின்னத்தில்தான் நான் போட்டியிடுகிறேன். ஆனாலும் அக்கட்சியின் வேட்பாளர் இல்லை. நான் பொது வேட்பாளர்" என அவர் தெரிவித்துள்ளார்.
மேலும், "அவர்கள்தான் என்னை தேர்தலில் போட்டியிடும்படி கேட்டார்கள், ஒப்புக்கொண்டேன். தோழர்கள் யாரும் என்னை போட்டியிடும்படிக் கேட்கவில்லை. கூட்டணி என்று வந்து விட்டபின் நான் பொது வேட்பாளர். ஒரு நல்ல விஷயத்துக்காக கரங்கள் ஒன்று சேரும்போது சில மாறுபட்ட கருத்துகள் வெளியிலிருந்து வருவதைத் தடுக்க முடியாது. நான் என்னை விசிகே வேட்பாளராக கருதவில்லை. மீண்டும் வெற்றித் திருநாளில் சந்திப்போம்" என வசந்திதேவி நம்பிக்கையுடன் கூறியுள்ளார்.
இதற்கிடையே, வசந்தி தேவியை நிஜமாகவே பொது வேட்பாளராக அறிவித்து, திமுக தனது வேட்பாளரை வாபஸ் பெற வேண்டும் என்ற கோரிக்கையும் சமூக வலைதளங்களில் அதிகமாக பகிரப்பட்டு வருகிறது.
Click it and Unblock the Notifications
Sign in with Google