டிவிஸ் மோட்டார்ஸ் தலைவர் வேணு சீனிவாசன் மகன், மகளுக்கு நிறுவனத்தில் முக்கிய பதவிகள்!

சென்னை: டிவிஸ் மோட்டார்ஸ் நிறுவனத்தில் அடுத்த தலைமுறை வாரிசுகளுக்கு முக்கிய பதவிகள் அளித்துள்ளார் அதன் தலைவரும், மேலாண் இயக்குநருமான வேணு சீனிவாசன்.

சென்னையை தலைமையிடமாக கொண்ட டிவிஸ் நிறுவனத்தின் தலைவர் மற்றும் மேலாண் இயக்குநராக 62வயதான வேணு சீனிவாசன் பதவி வகிக்கிறார். இந்நிலையில் தனது மகன் மற்றும் மகளுக்கு நிறுவனத்தில் முக்கிய பொறுப்புகளை வழங்கி அவர் உத்தரவிட்டுள்ளார்.

திருமண பரிசு

வேணு சீனிவாசனின் மகனான சுதர்சனுக்கு தற்போது 25 வயதாகிறது. இம்மாதம்தான் அவருக்கு திருமணமாகியிருந்த நிலையில், டிவிஸ் நிறுவனத்தின் இணை மேலாண் இயக்குநராக பதவி அளித்துள்ளார் வேணு.

மகளுக்கும் கவுரவம்

அதேபோல வேணுவின் மகள் லட்சுமி (30) டிவிஸ் நிறுவனத்தின் கூடுதல் நான்எக்ஸ்சிகியூட்டிவ் இயக்குநராக்கப்பட்டுள்ளார்.

சந்தை பங்கு அதிகரிப்பு

இந்த அறிவிப்புகள் குறித்து டிவிஸ் நிறுவனம் வெளியிட்டுள்ள அறிக்கையில் "டிவிஸ் நிறுவனம் சந்தையில் தனது பங்கை அதிகரித்து வருகிறது. நிறுவனத்தின் வளர்ச்சியில் சுதர்சன் அதிக கவனம் எடுத்து வருகிறார்" என்று தெரிவிக்கப்பட்டுள்ளது.

படிப்பில் கெட்டி

பென்சில்வேனியா பல்கலைக்கழகத்தில் 2010ம் ஆண்டு மேலாண்மை மற்றும் தொழில்நுட்பத்தில் பட்டம் பெற்றவர் சுதர்சன். இதேபோல பிஎஸ்சி இன்ஜினியரிங் மற்றும் பொருளாதாரம் ஆகிய இரு பட்டங்களையும் அவர் பெற்றுள்ளார். லட்சுமியை பொறுத்தளவில் அவர் 'வார்விக்' பல்கலைக்கழகத்தில் இன்ஜினியரிங் மேலாண்மை படிப்பில் டாக்டர் பட்டம் பெற்றவராகும்.

English summary

TVS Motor's scions have been given meatier roles at the Chennai-based automobile company just days after the marriage of Sudarshan Venu, the son of the company's 62-year-old chairman and managing director Venu Srinivasan.