தினகரனை பார்க்கக் கூடாது என்று அறிவிக்க ஜெயகுமாருக்கு அருகதை இல்லை... எம்எல்ஏ வெற்றிவேல் 'பொளேர்'
தினகரனை பார்க்கக் கூடாது என்று அறிவிக்க ஜெயகுமாருக்கு அருகதை இல்லை என்று பெரம்பூர் எம்எல்ஏ வெற்றிவேல் எம்எல்ஏ தெரிவித்தார்.
சென்னை: தினகரனை பார்க்க செல்லக் கூடாது என்று சொல்ல அமைச்சர் ஜெயகுமாருக்கு எந்த அதிகாரமும் உரிமையும் இல்லை என்று பெரம்பூர் எம்எல்ஏ வெற்றிவேல் எம்எல்ஏ தெரிவித்தார்.
தினகரன் திகார் சிறையில் இருந்து வெளியே வந்தநிலையில் அமைச்சர் ஜெயகுமார் தலைமையில் 20 அமைச்சர்கள் கலந்து கொண்டு ஆலோசனை நடத்தினர். சுமார் ஒன்றரை மணிநேரம் நீடித்த இந்த சந்திப்பை தொடர்ந்து முதல்வர் எடப்பாடி பழனிச்சாமியை சந்தித்தனர்.
இதைத் தொடர்ந்து அமைச்சர் ஜெயகுமார் செய்தியாளர்களிடம் தெரிவிக்கையில், கடந்த ஏப்ரல் 17-ஆம் தேதி கட்சியின் நலன் கருதி அமைச்சர் தங்கமணி வீட்டில் ஆலோசனை நடத்தப்பட்டது. அதில் தினகரன் மற்றும் அவரை சார்ந்தவர்களை கட்சியிலிருந்து ஒதுக்கி வைக்க முடிவு செய்தோம்.
அவர்களின் தயவு எங்களுக்கு வேண்டாம். கட்சியினரும் தினகரன் தரப்பினருடன் பேச வேண்டாம் என்று தெரிவித்தார். இதுகுறித்து தினகரன் ஆதரவு எம்எல்ஏவான வெற்றிவேல் எம்எல்ஏ தெரிவிக்கையில், தினகரனுடன் பேசக் கூடாது என்று சொல்வதற்கு அமைச்சர் ஜெயகுமாருக்கு எந்த அருகதையும் இல்லை.
எந்த உரிமையும் இல்லை. எங்களை பொருத்தவரை பொதுச் செயலாளர் சசிகலாதான், துணை பொதுச் செயலாளர் டிடிவி தினகரன்தான். எனவே அமைச்சர் ஜெயகுமார் எதற்காக பயப்படுகிறார் என்று தெரியவில்லை. தினகரனுக்கு ஆதரவாக 23 எம்எல்ஏ-க்கள் உள்ளன. வெறும் அமைச்சர்கள் மட்டும் கொண்டது அதிமுக அல்ல என்றார் அவர்.
Click it and Unblock the Notifications
Sign in with Google