Vijay: 1967-க்கு பிறகு.. எம்எல்ஏவான முதல் தேர்தலிலேயே முதல்வரான 2வது நபர் விஜய்.. முதல் நபர்தான் சர்ப்ரைஸ்

By Oneindia Staff

Updated: Sunday, May 10, 2026, 17:01 [IST]

Subscribe to Oneindia Tamil

சென்னை: தமிழக அரசியல் வரலாற்றில் ஒரு புதிய சகாப்தம் தொடங்கியுள்ளது. மே 9, 2026 அன்று சென்னை நேரு உள்விளையாட்டு அரங்கில் நடைபெற்ற பிரம்மாண்ட விழாவில், தமிழக வெற்றிக் கழகத்தின் (தவெக) தலைவர் சி. ஜோசப் விஜய் (Vijay), தமிழகத்தின் புதிய முதலமைச்சராகப் பதவியேற்றுக்கொண்டார். தமிழக ஆளுநர் அவருக்குப் பதவிப் பிரமாணமும், ரகசியக் காப்புப் பிரமாணமும் செய்து வைத்தார்.

இந்த வரலாற்று நிகழ்வின் மூலம் பல சாதனைகளை விஜய் படைத்துள்ளார். 1967-ஆம் ஆண்டிற்குப் பிறகு, அதாவது திமுக ஆட்சிக்கு வந்த பிறகு, சட்டமன்றத்திற்குத் தேர்ந்தெடுக்கப்பட்ட முதல் தேர்தலிலேயே முதலமைச்சர் நாற்காலியில் அமரும் இரண்டாவது நபர் என்ற பெருமையை அவர் பெற்றுள்ளார். இதற்கு முன்னதாக, 2001-ஆம் ஆண்டு முன்னாள் முதலமைச்சர் ஜெயலலிதா பதவி விலக நேரிட்டபோது, முதல்முறை எம்.எல்.ஏ-வாக இருந்த ஓ. பன்னீர்செல்வம் முதலமைச்சராகப் பதவியேற்றது குறிப்பிடத்தக்கது.

மேலும், தமிழகத்தின் மிக உயரிய பதவியான முதலமைச்சர் பதவியை அலங்கரிக்கும் சிறுபான்மை மதத்தைச் சேர்ந்த (கிறிஸ்தவர்) முதல் நபர் என்ற வரலாற்றுச் சிறப்பையும் விஜய் பெற்றுள்ளார். மதங்களைக் கடந்து அனைத்துத் தரப்பு மக்களின் ஆதரவையும் பெற்றுள்ள நிலையில், அவரது இந்தப் பதவியேற்பு தமிழக அரசியலில் ஒரு புதிய மாற்றத்திற்கான தொடக்கமாகப் பார்க்கப்படுகிறது.

பதவியேற்பு விழாவிற்குப் பிறகு இன்று (மே 10) தலைமைச் செயலகம் சென்ற முதலமைச்சர் விஜய், மக்கள் நலன் சார்ந்த முக்கியக் கோப்புகளில் கையெழுத்திட்டார். அவரது இந்த புதிய பயணம் தமிழக மக்களுக்கு எந்த மாதிரியான நன்மைகளைத் தரப்போகிறது என்பதை ஒட்டுமொத்த இந்தியாவே உன்னிப்பாகக் கவனித்து வருகிறது.