ஊட்டி வேட்பாளர் பெயரை உச்சரிக்கத் தடுமாறிய விஜயகாந்த்

By Mayura Akilan

Updated: Sunday, April 24, 2016, 19:42 [IST]

Subscribe to Oneindia Tamil

உதகமண்டலம்: சட்டசபைத் தேர்தலில் ஊட்டி தொகுதியில் போட்டியிடும் வேட்பாளரின் பெயரை கே.கிங் நர்சிஸ்சுஸ் என்று உச்சரிக்க முடியாமல் தேமுதிக தலைவர் விஜயகாந்த் சற்றே தடுமாறினார். பெயரை சொல்வதில்தான் தடுமாறினாரே தவிர அவரது பிரச்சாரத்தில் அனலடிக்கத்தான் செய்தது.

ஜெயலலிதா போல மேடையில் நடந்து நடித்துக்காட்டிய விஜயகாந்தை, பொதுக்கூட்ட மேடைகளுக்கு கைதாங்கலாகவே அழைத்து வருகிறார்கள். பாதுகாவலர்கள். பிரச்சார மேடைகளில் திமுக, அதிமுக என இரண்டு கட்சிகளையும் சரிசமமாகவே விமர்சனம் செய்து பேசுகிறார்.

உதகை, கோவை என நேற்று ஜில்லான மாவட்டங்களில் பிரச்சாரம் செய்தாலும் பேச்சில் வெப்பக்காற்று வீசியது என்னவோ உண்மைதான்.

வேட்பாளர்கள் அறிமுகம்

விஜயகாந்த், நீலகிரி மாவட்டம் குன்னூரில் நேற்று நடைபெற்ற தேர்தல் பிரச்சாரக் கூட்டத்தில் பங்கேற்று பேசினார். ஊட்டி, குன்னூர், கூடலூர் ஆகிய தொகுதிகளில் போட்டியிடும் மக்கள் நலக் கூட்டணி - தேமுதிக வேட்பாளர்களை அவர் அறிமுகம் செய்தார்.

பெயர் வாயில் நுழையலையே

ஊட்டி வேட்பாளரின் பெயர், கே.கிங் நர்சிஸ்சுஸ் என்பதாகும். ஆனால், அந்தப்பெயரை உச்சரிக்க முடியவில்லை. இரண்டு மூன்றுமுறை முயன்றும் சரியாக உச்சரிப்பு வராததால் ஊட்டி வேட்பாளர் கிங் என சுருக்கமாக உச்சரித்து விட்டு முடித்தார்.

அடி வாங்குறது யாரு?

நல்லவேளை அந்த வேட்பாளர் தன்னுடைய முழு பெயரையும் கூறவில்லை. ஏன் வம்பு என்று நினைத்து விட்டார் போல, தான் சொன்னதைக் கேட்டு விஜயகாந்த் கோபத்தில் தலையில் கொட்டிவிட்டால் என்ன செய்வது என்று யோசித்தே திருத்தாமல் விட்டு விட்டார் ஊட்டி வேட்பாளர்.

கொடநாடு பங்களா

ஜெயலலிதா மக்களுக்காக நான் அப்படினு சொல்றார். மக்களுக்குக்காகத்தான் நான் என்று சொல்றவர் கொடநாடு பங்களாவை மக்களுக்கு எழுதிக்கொடுப்பாரா? என்று கேட்டார்.

முட்டை ரோஸ்ட்

அடுத்து குன்னூர் பகுதியில் பிரச்சாரம் செய்தபோது, ‘மாணவர்களுக்கு சத்துணவில் முட்டை ரோஸ்ட் வழங்கப்படும்' என்றொரு அறிவிப்பையும் வெளியிட்டு கைத்தட்டல் வாங்கினார்.