ஏற்காடு இடைத்தேர்தல் செம விறுவிறுப்பு- 86% வாக்குகள் பதிவு!!
சேலம்: ஏற்காடு சட்டசபை இடைத்தேர்தலில் விறுவிறுப்பான வாக்குப் பதிவு நடைபெற்றது. இன்று நடைபெற்ற தேர்தலில் மொத்தம் 86% வாக்குகள் பதிவாகி உள்ளன.
ஏற்காடு தொகுதி எம்.எல்.ஏ.வாக இருந்த அதிமுகவைச் சேர்ந்த பெருமாள் கடந்த ஜூலை மாதம் காலமானார். அத்தொகுதிக்கான இடம் காலியாக உள்ளது. இதனால் ஏற்காடு இடைத்தேர்தல் அறிவிக்கப்பட்டது.
இத்தேர்தலில் அ.தி.மு.க. சார்பில் மறைந்த எம்.எல்.ஏ. பெருமாளின் மனைவி சரோஜாவும், தி.மு.க.சார்பில் வெ.மாறனும் மற்றும் 9 சுயேச்சைகளும் போட்டியிடுகின்றனர். மொத்தம் 11 வேட்பாளர்கள் களத்தில் உள்ளனர். இருப்பினும் அ.தி.மு.க மற்றும் தி.மு.க. இடையேதான் நேரடி போட்டி.
2 லட்சத்து 40 ஆயிரம் வாக்காளர்கள்
ஏற்காடு தொகுதியில் மொத்தம் 2 லட்சத்து 40 ஆயிரத்து 290 வாக்காளர்கள் உள்ளனர். இவர்களில் ஆண்கள் 1 லட்சத்து 19 ஆயிரத்து 190 பேர். பெண்கள் 1 லட்சத்து 21 ஆயிரத்து 94 பேர். திருநங்கைகள் 6 பேர்.
290 வாக்குச் சாவடிகள்
இவர்கள் வாக்களிக்க வசதியாக 120 இடங்களில் 290 வாக்குச்சாவடிகள் அமைக்கப்பட்டிருந்தன.
அனைத்தும் பதற்றமானவை
இந்த 290 வாக்கு சாவடிகளுமே பதற்றமானவை என தமிழக தலைமை தேர்தல் ஆணையர் பிரவீண்குமார் அறிவித்திருந்தார்.
மூன்றடுக்கு பாதுகாப்பு
இதைத் தொடர்ந்து இந்த தொகுதியில் மூன்றடுக்கு பாதுகாப்பு போடப்பட்டிருந்தது. சேலம், நாமக்கல், தர்மபுரி, கிருஷ்ணகிரி என 4 மாவட்ட போலீசாரும், மத்திய தொழில் பாதுகாப்பு படை, மத்திய ரிசர்வ் போலீசார் என 2,500 போலீசார் பாதுகாப்பு பணியில் ஈடுபட்டனர்.
86% வாக்குப் பதிவு
இன்று காலை 8 மணிக்கு பலத்த பாதுகாப்புடன் தொடங்கிய வாக்குப் பதிவு விறுவிறுப்புடன் நடைபெற்றது, மாலை வரை 86% வாக்குகள் பதிவாகின.
வாக்களித்த வேட்பாளர்கள்
அ.தி.மு.க. வேட்பாளர் பி.சரோஜா பாப்பநாயக்கன் பட்டி ஊராட்சி ஒன்றிய துவக்கப்பள்ளியில் வாக்களித்தார். முன்னதாக தமது கணவர் பெருமாளின் நினைவிடத்தில் அவர் மரியாதை செலுத்தினார். இதேபோல் திமுக வேட்பாளர் வெ. மாறனும் தமது சொந்த ஊரில் வாக்கை பதிவு செய்தார்.
Click it and Unblock the Notifications
Sign in with Google