சசிகலாவுக்கு முதல்வர் பதவி பிரமாணம் செய்து வைக்க தயங்கும் ஆளுநர்... பின்னணியில் 'துண்டு தலைவர்'?

சசிகலாவுக்கு முதல்வர் பதவி பிரமாணம் செய்து வைக்க தமிழக ஆளுநர் தயங்குவதின் பின்னணியில் அரசியல் கட்சியின் முக்கிய தலைவர் ஒருவர் இருப்பதாக கூறப்படுகிறது.

By Mathi

Published: Tuesday, February 7, 2017, 11:09 [IST]

Subscribe to Oneindia Tamil

சென்னை: சசிகலாவுக்கு முதல்வர் பதவி பிரமாணம் செய்து வைக்க தமிழக பொறுப்பு ஆளுநர் வித்யாசகர் ராவ் தயங்குவதன் பின்னணியில் மன்னார்குடி கோஷ்டி மீது திடீர் பாசம் காட்டிய துண்டு தலைவர்தான் இருப்பதாக கூறப்படுகிறது.

ஜெயலலிதா மருத்துவமனையில் அனுமதிக்கப்பட்ட உடனே காங்கிரஸ், பாஜக கட்சிகள் தமிழக அரசியலில் அதீத அக்கறை காட்டின. மன்னார்குடி கோஷ்டியினர் காங்கிரஸ் கட்சியின் தமிழக தலைவர் மூலமாக காங்கிரஸுடன் கை கோர்த்தனர். அதே நேரத்தில் சம்பந்தமே இல்லாமல் துண்டு தலைவரும் அப்பல்லோ போவதும் ஆளுநர் மாளிகை செல்வதுமாக இருந்தார்.

அத்துடன் மன்னார்குடி கோஷ்டிக்கு ஆதரவாகவும் குரல் கொடுத்து வந்தார். ஆனால் துண்டு தலைவரின் இந்த ஆதரவு நீண்டகாலம் நீடிக்கவில்லை.

நோ கமெண்ட்ஸ்

அண்மைக்காலமாக அதிமுக தொடர்பாகவோ மன்னார்குடி கோஷ்டி தொடர்பாகவே எந்த ஒரு கருத்தையும் அந்த துண்டு தலைவர் தெரிவிக்காமல் மவுனமாக இருந்து வந்தார். சசிகலா அதிமுக பொதுச்செயலரானது, முதல்வராக தேர்வு செய்யப்பட்டதிலும் கூட எந்த கருத்தையும் தெரிவிக்காமலேயே அந்த தலைவர் இருந்து வந்தார்.

மத்திய அரசின் திட்டம்

இந்த நிலையில் சசிகலா இன்று முதல்வராக பதவியேற்க திட்டமிட்டிருந்தார். ஆனால் பொறுப்பு ஆளுநர் வித்யாசகர் ராவ், உடனே சென்னை வராமல் தாமதிப்பதால் இந்த பதவியேற்பு தள்ளிப் போயுள்ளது. சொத்து குவிப்பு வழக்கின் தீர்ப்பு வரும் வரை காத்திருக்கலாம் என்பது மத்திய அரசின் திட்டமாம்.

மும்பையில் துண்டு தலைவர் முகாம்

மத்திய அரசின் இந்த பின்னணியிலும் அந்த துண்டு தலைவரே இருப்பதாக கூறப்படுகிறது. அண்மையில் பொறுப்பு ஆளுநருக்கு சொந்தமான மும்பை பங்களாவில் துண்டு தலைவர் குடும்பத்தினருடன் ஒரு வார காலம் தங்கியிருந்தாராம்.

தமிழக பாஜக முகம்

அங்கிருந்தபடியே தமிழக நிகழ்வுகளை கவனித்து அது தொடர்பாக பாஜக மேலிடத்துடன் ஆலோசித்து வந்தாராம். இந்த கூட்டு ஆலோசனையில்தான் சசிகலாவுக்கு உடனே முதல்வராக பதவி பிரமாணம் செய்து வைக்க வேண்டாம் என முடிவு செய்யப்பட்டதாம். அதாவது தமிழக பாஜகவுக்கு தலைவர்கள் பலர் இருந்தாலும் துண்டு தலைவரைத்தான் அதிகமாக நம்புகிறதாம் அந்த கட்சி மேலிடம். அந்த அளவுக்கு செல்வாக்காக இருக்கிறாராம். இந்த உறவு தொடரும் நிலையில் மத்திய அமைச்சரவையில் துண்டு தலைவரை சீக்கிரம் பார்த்துவிடலாம் என்கின்றன டெல்லி வட்டாரங்கள்.

Published On February 7, 2017