ஒரு கல்லில் இரண்டு மாங்காய்... தினகரனின் தடாலடி பேட்டியின் 'அடடே' பின்னணி
சென்னை: அதிமுகவின் துணைப் பொதுச்செயலரான டி.டி.வி. தினகரன் திடீரென நடராஜன், திவாகரனுக்கு எதிராக காட்டமாக பேசியிருப்பதே ஒரே கல்லில் 2 மாங்காய்களை வீழ்த்தும் வியூகம் என்கின்றன அதிமுக வட்டாரங்கள்.
ஜெயலலிதா மறைவுக்குப் பின்னர் அதிமுகவை முழுமையாக கைப்பற்றுவதில் சசிகலாவின் ஒட்டுமொத்த குடும்பமுமே முனைப்பாக இருந்தது. முதல் கட்டமாக சசிகலா, தினகரன், வெங்கடேஷ் மூவரும் மட்டுமே வெளிப்படையாக அதிமுகவில் ஆதிக்கம் செலுத்தினர்.
சசிகலா பொதுச்செயலரானார்... பின்னர் முதல்வர் பதவிக்கும் ஆசைப்பட்டார்... ஆனால் சசிகலா சிறைக்குப் போக நேரிட்டது. இதனால் இலவு காத்த கிளியாக இருந்த தினகரன் மற்றும் வெங்கடேஷை அதிமுகவில் சேர்த்துவிட்டார் சசிகலா. அத்துடன் தினகரனுக்கு துணைப் பொதுச்செயலர் பதவியும் கொடுத்துவிட்டு சிறைக்குப் போனார் சசிகலா.
தினகரனின் ஆட்டம்
அதன்பின்னர் தினகரனின் ஆட்டம் ஆரம்பமானது... தம்மோடு நேற்று வரை இருந்த டாக்டர் வெங்கடேஷை ஓரம்கட்டி வைத்தார். சசிகலாவின் கணவர் நடராஜன், திவாகரன் ஆகியோர் பேச்சை கேட்கவே கூடாது என அதிமுகவினருக்கும் அமைச்சர்களுக்கும் உத்தரவு போட்டார் தினகரன். இவர் போகிற போக்கைப் பார்த்தால் சசிகலாவையும் கூட ஓரம்கட்டி விடுவார் என்கிற ரேஞ்சுக்குத்தான் சாணக்கியத்தனமாக செயல்பட்டு வருகிறார் தினகரன்.
அதிரடி பேட்டி
இந்த நிலையில் திடீரென இன்று நடராஜன், திவாகரன் ஆகியோரை அதிமுகவில் சேர்க்க மாட்டோம்; அவர்களது கருத்தை அதிமுகவின் நிலைப்பாடாக ஏற்க முடியாது என்றெல்லாம் தடாலடியாக பேட்டி கொடுத்திருக்கிறார் தினகரன்.
திவாகரனுக்கு செக்
தற்போதைய நிலையில் நடராஜன் உடல்நலக் குறைவால் பாதிக்கப்பட்டு ஒதுங்கிய நிலையில்தான் இருக்கிறார். தினகரனுக்கு இப்போது சவாலாக இருப்பது திவாகரன்மட்டுமே. இப்படி பேட்டி கொடுத்திருப்பதன் மூலம் திவாகரனுக்கு ஒரு செக் வைத்துவிட்டார் தினகரன்.
ஓபிஎஸ் அணிக்கு பதிலடி
மற்றொன்று ஆர்.கே. நகர் தொகுதி இடைத் தேர்தலில் ஓபிஎஸ் அணியினர் எப்படியும் மன்னார்குடி குடும்பத்தின் பிடியில் இருந்து அதிமுகவை மீட்போம் என்ற பிரசாரத்தைத்தான் முன்வைக்கப் போகிறார்கள்; இப்படி ஒரு பேட்டி கொடுத்ததன் மூலமாக நாங்கள் எங்கள் குடும்ப உறுப்பினர் யாரையும் சேர்க்கவில்லை என பகிரங்கமாகவே அறிவித்திருக்கிறோம் என பதிலடி கொடுத்து ஓபிஎஸ் அணி வாயை மூடவும் திட்டமிட்டுள்ளாராம் தினகரன். ஆக ஒரு பேட்டியின் மூலம் 2 மாங்காய்களை வீழ்த்துகிறார் தினகரன் என்கின்றன அதிமுக வட்டாரங்கள்.
Click it and Unblock the Notifications
Sign in with Google