தமிழகத்திற்கு காவிரி நீர் கிடைக்காததற்கு கருணாநிதி நீக்கிய அந்த சட்டம்தான் காரணம்! நிர்மல் குமார்
திருநெல்வேலி: காவிரி நீர் தமிழகத்திற்கு வராமல் இருப்பதற்கு முன்னாள் முதலமைச்சர் கருணாநிதி மெட்ராஸ்- மைசூர் ஒப்பந்தத்தில் இருந்து எடுத்த சட்டமே (Article) காரணம் என நெல்லையில் சட்டத்துறை அமைச்சர் நிர்மல் குமார் பேட்டி அளித்துள்ளார்.
நெல்லையில் உள்ள தனியார் கல்லூரி பட்டமளிப்பு விழாவில் கலந்து கொள்வதற்காக வருகை தந்த மின்சாரம் மதுவிலக்கு மற்றும் சட்டத்துறை அமைச்சர் நிர்மல் குமார் நெல்லை அரசு சுற்றுலா மாளிகையில் செய்தியாளர்களை சந்தித்தார்.
அப்போது பேசிய அவர் தமிழகத்தில் மின்சார கட்டண உயர்வு தொடர்பாக முன்னாள் முதலமைச்சர் மு.க. ஸ்டாலின் தவறான தகவலை தெரிவித்துள்ளார். மூன்று லட்சத்திற்கும் மேற்பட்ட புகார்கள் வந்துள்ளதாக அவர் கூறியிருப்பது உண்மையல்ல.
பொதுமக்களிடமிருந்து அவ்வாறு எந்தப் புகாரும் வரவில்லை. மாறாக, மின்கட்டண உயர்வு தொடர்பாக நிர்வாக ரீதியாக தானாக முன்வந்து ஆய்வு மேற்கொள்ளப்பட்டு வருகிறது. சுழற்சி முறையில் 3 லட்சத்திற்கும் மேற்பட்ட மின் நுகர்வோர் இணைப்புகள் ஆய்வுக்காக தேர்வு செய்யப்பட்டுள்ளன.
"மூன்று லட்சத்திற்கும் மேற்பட்ட மின் கட்டண புகார்கள் வந்துள்ளன, யாரும் மின் கட்டணம் செலுத்த வேண்டாம்" என்று தவறான தகவலை பரப்பி வருகிறார். நேற்று ஆய்வு செய்யப்பட்ட 10 ஆயிரம் இணைப்புகளில், 50 இணைப்புகளில் மட்டுமே கட்டண மாற்றம் இருப்பது கண்டறியப்பட்டுள்ளது.
அதுவும், வீடுகள் பூட்டப்பட்டிருந்த காரணத்தினால் ஏற்பட்ட மாற்றமே தவிர வேறு காரணம் இல்லை. வழக்கமாக கடந்த மூன்று, நான்கு ஆண்டுகளாகவே கோடை காலம் முடிவடைந்த பிறகு மின் நுகர்வு அதிகரிப்பால் கட்டண உயர்வு காணப்படுவது வழக்கமாக உள்ளது.
தனிப்பட்ட புகார்கள் ஏதேனும் இருந்தால், சம்பந்தப்பட்ட மின்வாரிய அலுவலகத்தில் தெரிவித்தால் உரிய நடவடிக்கை எடுக்கப்படும். வாட்ஸ்அப்பில் வரும் தகவலை அடிப்படையாகக் கொண்டு, திமுக தலைவரும், முன்னாள் முதலமைச்சருமான ஒருவர் இதுபோன்ற தகவல்களை பரப்பக் கூடாது.
ஏதேனும் விளக்கம் தேவைப்பட்டால் எங்களைத் தொடர்பு கொள்ள வேண்டும். மின்வாரியத்தில் பணியாளர்கள் நியமிக்கும் பணிகள் நடைபெற்று வருகின்றன. அவை முடிவடைந்ததும் மாதந்தோறும் மின் கட்டணம் கணக்கெடுக்கும் பணி தொடங்கப்படும்.
கடந்த ஐந்து ஆண்டுகளில் திமுக ஆட்சியில் 343 பேரை மட்டுமே மின்வாரியத்தில் பணியமர்த்தியுள்ளனர். குறிப்பாக, மின் கட்டண கணக்கெடுக்கும் பணியாளர்களை நியமிக்கவில்லை. ஸ்மார்ட் மீட்டர் திட்டத்தை நோக்கியே அவர்கள் கொள்கை ரீதியாக செயல்பட்டனர்.
மின் கட்டண கணக்கீடு மற்றும் பிற களப்பணிகளுக்கான பணியாளர்களை நியமிக்கும் பணியை தற்போதைய அரசு மேற்கொண்டு வருகிறது. இந்தப் பணிகள் நிறைவடைந்ததும் மாதந்தோறும் மின் கட்டண கணக்கெடுப்பு மேற்கொள்ளப்படும்.
காவிரி விவகாரம் தொடர்பாக, சட்டரீதியாக உச்சநீதிமன்றத்தை அணுகுவதுதான் தண்ணீரைப் பெற்றுத் தர ஒரே வழி. கர்நாடக அரசு, தமிழகத்திற்கு தண்ணீர் வழங்கக் கூடாது என்ற ஒரே நோக்கத்துடன் நூறு ஆண்டுகளுக்கும் மேலாக செயல்பட்டு வருகிறது.
தமிழகத்தில் திமுக ஆட்சியில் இருந்தபோது நமக்கு இருந்த வலுவான சட்டப்பிடியை இழந்துவிட்டோம். சென்னை ராஜதானி - மைசூர் ஒப்பந்தத்தின் பலனையும் இழந்தோம். அதாவது தீர்ப்பாய உத்தரவை கர்நாடக அரசு நிறைவேற்றவில்லை என்றால், அணையின் செயல்பாட்டை ஆணையம் கைப்பற்றி தண்ணீரை திறக்கலாம் என்ற விதியை முன்னாள் முதலமைச்சர் கருணாநிதி நீக்கிவிட்டார்.
திமுக செய்த தவறுகளுக்கு ஒரே தீர்வு உச்சநீதிமன்றத்தை நாடுவதுதான். காவிரியை பெற வேறு என்னென்ன வாய்ப்புகள் உள்ளன என்பதை முதலமைச்சர் ஆய்வு செய்து நடவடிக்கை மேற்கொள்வார்.
தற்போதைக்கு சட்டரீதியாக போராடுவதுதான் ஒரே வழி. மத்திய நீர்வளத் துறை அமைச்சர் கூட கர்நாடகத்திற்கு ஆதரவாக செயல்பட்டு வருகிறார். தமிழகத்திற்கு எதிராக மத்திய அரசின் பிரதிநிதிகளும் பேசுவது கண்டனத்திற்குரியது.
திமுகவும் அதன் கூட்டணிக் கட்சிகளும் மத்தியிலும் மாநிலத்திலும் ஆட்சியில் இருந்தபோதுகூட தீர்ப்பாயத் தீர்ப்பை முழுமையாக அமல்படுத்த முடியவில்லை. காவிரி மேலாண்மை ஆணையம் அமைக்க 2018 வரை கடுமையான போராட்டம் நடத்த வேண்டியிருந்தது.
காவிரி விவகாரத்தில் கர்நாடகாவில் காங்கிரஸ் ஆட்சி இருந்தாலும், பாஜக ஆட்சி இருந்தாலும் தமிழகத்திற்கு தண்ணீர் வழங்கக் கூடாது என்ற ஒரே நிலைப்பாட்டில்தான் பல ஆண்டுகளாக இருந்து வருகின்றனர்.
"ராகுல் காந்தி சொன்னால் தண்ணீர் வந்துவிடும்" என்று கூறும் அன்புமணி, காங்கிரஸ் கூட்டணியில் இருந்தபோதுகூட தீர்ப்பாயத் தீர்ப்பை அமல்படுத்த முடியாத நிலையில் இருந்ததை நினைவுகூர வேண்டும். இவ்வாறு நிர்மல் குமார் தெரிவித்துள்ளார்.
Click it and Unblock the Notifications
Sign in with Google
