நெல்லை மாநகராட்சி உதவி ஆணையர் அதிரடி சஸ்பெண்ட்.. யார் இந்த ஜஹாங்கீர் பாஷா தெரியுமா?

திருநெல்வேலி: காரில் கணக்கில் வராத ரூ.11.75 லட்சம் பறிமுதல் செய்யப்பட்ட வழக்கில் ஊட்டி நகராட்சி ஆணையராக பணியாற்றிய ஜஹாங்கீர் பாஷா காத்திருப்பு பட்டியலுக்கு மாற்றப்பட்டார். அதன்பிறகு அவர் நெல்லை மாநகராட்சியில் உதவி ஆணையராக நியமிக்கப்பட்டார். இதற்கு கடும் எதிர்ப்பு கிளம்பிய நிலையில் ஜஹாங்கீர் பாஷா இன்று அதிரடியாக சஸ்பெண்ட் செய்யப்பட்டுள்ளார்.

நீலகிரி மாவட்டம் ஊட்டியில் நகராட்சியின் ஆணையராக இருந்தவர் ஜஹாங்கீர் பாஷா. இவர் சென்னையை சேர்ந்தவர். கடந்த ஆகஸ்ட் மாதம் முதல் ஊட்டி நகராட்சி ஆணையர் பொறுப்பில் செயல்பட்டு வந்தார்.

கடந்த நவம்பர் 9 ம் தேதி ஜஹாங்கீர் பாஷா காரில் சென்னைக்கு புறப்பட்டு சென்றார். ஊட்டி - கோத்தகரி சாலையில் தொட்டபெட்டா சந்திப்பு பகுதியில் லஞ்ச ஒழிப்பு போலீசார் அவரது காரை அதிரடியாக சோதனை செய்தனர். அப்போது கட்டுக்கட்டாக பணம் இருந்தது.

கணக்கில் வராத வகையில் ரூ.11.70 லட்சம் பணம் சிக்கியது. இதுபற்றி போலீசார் தீவிர விசாரணை மேற்கொண்டனர்.10 மணி நேரம் விசாரணை நடந்தது. ஆனால் பணத்துக்கு அவர் சரியான பதிலை கொடுக்கவில்லை. இதனால் லஞ்சப்பணம் என்பதை லஞ்ச ஒழிப்பு போலீசார் உறுதி செய்தனர். அதோடு ஜஹாங்கீர் பாஷா மீது ஊழல் தடுப்பு சட்டத்தின் கீழ் வழக்குப்பதிவு செய்தனர். அதன்பிறகு அவர் காத்திருப்பு பட்டியலுக்கு மாற்றம் செய்யப்பட்டார்.

அதன்பிறகு கடந்த மாதம் 27 ம் தேதி ஜஹாங்கீர் பாஷாவிற்கு புதிய பொறுப்பு வழங்கப்பட்டது. காத்திருப்பு பட்டியலில் இருந்த அவர் திருநெல்வேலி மாநகராட்சி உதவி ஆணையராக நியமனம் செய்யப்பட்டார். இதற்கு பாமக தலைவர் அன்புமணி ராமதாஸ் கடும் எதிர்ப்பு தெரிவித்தார். அதேபோல் பிற எதிர்க்கட்சி தலைவர்களும் கடும் எதிர்ப்பு தெரிவித்தனர்.

இந்நிலையில் தான் இன்று ஜஹாங்கீர் பாஷா நெல்லை மாநகராட்சி துணை ஆணையர் பொறுப்பில் இருந்து அதிரடியாக சஸ்பெண்ட் செய்யப்பட்டுள்ளார். இதற்கான உத்தரவை நகராட்சி நிர்வாக ஆணையர் பிறப்பித்துள்ளார். நெல்லை மாநகராட்சியின் துணை ஆணையர் பொறுப்பில் வேறு நல்ல அதிகாரிகளை நியமிக்க வேண்டும் என்று தொடர்ந்து குரல் எழுந்த நிலையில் ஜஹாங்கீர் பாஷா சஸ்பெண்ட் செய்யப்பட்டுள்ளார் என்பது குறிப்பிடத்தக்கது.

English summary

Jahangir Pasha, who served as the Ooty Municipal Commissioner in the case of the seizure of Rs. 11.75 lakhs unaccounted for in a car, was transferred to the waiting list. He was then appointed as the Assistant Commissioner in the Nellai Corporation. Jahangir Pasha has been suspended amid strong opposition to this.