தாய்மாமா என்றால் சும்மாவா? 100வது பிறந்தநாளுக்கு முதல்வர் ஸ்டாலின் நேரில் செல்லாத பின்னணி!
திருவாரூர்: முதலமைச்சர் ஸ்டாலினின் தாய்மாமாவும், தயாளு அம்மாளின் அண்ணனுமான தட்சிணாமூர்த்தி நேற்று தனது 100வது பிறந்தநாளை கொண்டாடியிருக்கிறார்.
திருவாரூர் மாவட்டம் பேரளம் தான் முதலமைச்சர் ஸ்டாலினின் தாயாரான தயாளு அம்மாளுக்கு பூர்வீகம். பள்ளிக்கூட பருவத்தில் தனது அம்மா தயாளுவுடன் ஊருக்கு வரும் போதெல்லாம் பூந்தோட்டம் என்ற ஊரில் உள்ள ரயில்வே ஸ்டேஷனில் இறங்கித்தான் மாட்டு வண்டியில் பாட்டி வீட்டுக்குச் செல்வார் முதலமைச்சர் ஸ்டாலின். அவரை அப்போது எப்படி வரவேற்று அழைத்துச் செல்ல வந்தாரோ, அதேபோல் தான் இப்போதும் பேரளம் பகுதிக்கு முதல்வர் ஸ்டாலின் சென்றால் வரவேற்க சென்றுவிடுகிறார் அவரது தாய்மாமா தெட்சிணாமூர்த்தி.
கடந்த ஆண்டு கூட நல்லாடை, பேரளம் பகுதிக்கு தூர்வாரும் பணிகளை முதலமைச்சர் ஸ்டாலின் பார்வையிடச் சென்ற போது 99 வயதிலும் அவரது தாய்மாமா தெட்சிணாமூர்த்தி வரவேற்க சென்றார். அவரைப் பார்த்து திடுக்கிட்ட ஸ்டாலின், "நீங்க ஏன் இந்த வயதில் சிரமப்படுறீங்க? நானே வீட்டுக்கு வந்திருப்பேனே" என்று கூறி வீட்டுக்கு அனுப்பி வைத்து தாமும் தாய்மாமா வீட்டுக்கு சென்று வந்தார்.
எத்தனை உறவுகள் இருப்பினும் தாய்மாமா உறவு என்பது சற்று விஷேசம் தான். மாமா என்ற உறவுக்கு ஈடு இணையாக வேறு எந்த உறவுமில்லை. இந்நிலையில் தாய்மாமாவின் 100வது பிறந்தநாளுக்கு அவரை நேரில் சென்று சந்தித்து வாழ்த்துச் சொல்லி, வாழ்த்து பெறத் தான் முதலமைச்சர் ஸ்டாலின் முதலில் முடிவு செய்திருந்திருக்கிறார்.
ஆனால் அவருக்கு கடந்த வாரம் ஏற்பட்ட காய்ச்சல் மற்றும் தொண்டை வலியால் வந்த உடல் சோர்வு இன்னும் முழுமையாக களையவில்லை என்பதால் மருத்துவர்கள் இப்போதைக்கு வெளியூர் பயணங்களை தவிர்க்குமாறு அட்வைஸ் அளித்திருக்கிறார்கள்.இதனால் தான் தாய்மாமாவின் 100வது பிறந்தநாளுக்கு நேரில் வாழ்த்துச் சொல்ல திருவாரூர் செல்லவில்லை முதலமைச்சர் ஸ்டாலின்.
ஆனால் அதே வேளையில் திருவாரூர் திமுக மாவட்டச் செயலாளர் பூண்டி கலைச்செல்வன் தலைமையில் திரளான திமுகவினரை தாய்மாமா வீட்டிற்கு அனுப்பி வைத்து பிறந்தநாளை தடபுடலாக கொண்டாட வைத்திருக்கிறார் முதலமைச்சர் ஸ்டாலின். தனக்கு உடல் சோர்வு களைந்தபிறகு திருவாரூர் சென்று தனது தாய்மாமாவை நேரில் சந்தித்து வாழ்த்து பெறுவார் முதலமைச்சர் ஸ்டாலின் எனத் தெரிவிக்கப்படுகிறது.
Click it and Unblock the Notifications
Sign in with Google