திருப்பூரை கொத்தாக அள்ளிய திமுக - அதிமுக நிலவரம் கலவரம்தான்... ஏன் இப்படியாச்சு?

திருப்பூர் மாவட்டத்தில் மொத்தம் உள்ள 6 நகராட்சிகளையும் திமுக கூட்டணி கைப்பற்றி வெற்றிவாகை சூடியுள்ளது.

திருப்பூர்: நகர்ப்புற உள்ளாட்சித்தேர்தலில் திருப்பூர் மாவட்டத்தில் திமுக வெற்றிக்கொடி நாட்டியுள்ளது. அம்மாவட்டத்தில் மொத்தம் உள்ள 6 நகராட்சிகளையும் திமுக கூட்டணி கைப்பற்றி வெற்றிவாகை சூடி அதிமுகவிற்கு அதிர்ச்சி வைத்தியம் அளித்துள்ளது.

திருப்பூர் மாவட்டத்தில் திருமுருகன் பூண்டி, பல்லடம், காங்கேயம், தாராபுரம், உடுமலை மற்றும் வெள்ளக்கோவில் ஆகிய 6 நகராட்சிகள் உள்ளன.

இந்த நகராட்சிகளில் உள்ள வார்டு உறுப்பினர் பதவிகளுக்கான வாக்குப்பதிவு கடந்த 19ஆம் தேதி நடைபெற்றது. இதனை தொடர்ந்து, இன்று காலை 8 மணி முதல் வாக்கு எண்ணிக்கை தொடங்கி நடைபெற்று வருகிறது. ஆரம்பம் முதலே திமுக மற்றும் அதன் கூட்டணி வேட்பாளர்களே முன்னணியில் இருந்தனர்.

இதன்முடிவுகள் வெளியான நிலையில் , திருப்பூர் மாவட்டத்தில் உள்ள 6 நகராட்சிகளிலும் திமுக கூட்டணி வெற்றி பெற்றுள்ளது. இதன்படி, திருமுருகன்பூண்டி நகராட்சியில் மொத்தம் உள்ள 27 இடங்களில் திமுக கூட்டணி 17 இடங்களிலும், அதிமுக 10 இடங்களிலும் வெற்றி பெற்றுள்ளன.

அதேபோல், பல்லடம் நகராட்சியில் மொத்தம் உள்ள 18 இடங்களில் திமுக 14 இடங்களிலும், பாஜக 2 இடங்களிலும், அதிமுக, சுயேட்சைகள் தலா ஒரு இடத்திலும் வெற்றி பெற்றுள்ளனர்.

இதேபோல், தாராபுரம் நகராட்சியில் மொத்தம் உள்ள 30 வார்டுகளில் திமுக கூட்டணி 23 இடங்களில் வென்று நகராட்சியை கைப்பற்றி உள்ளது. அதிமுக 3 இடங்களிலும், பாஜக மற்றும் சுயேட்சை தலா ஒரு இடத்திலும் வென்றுள்ளனர். .

வெள்ளக்கோவில் நகராட்சியில் மொத்தம் உள்ள 21 இடங்களில், 15-ல் திமுக கூட்டணியும், 6 இடங்களில் அதிமுகவும் வெற்றி பெற்றுள்ளன. இதேபோல், உடுமலைப்பேட்டை நகராட்சியில் மொத்தம் உள்ள 33 இடங்களில் 21-ல் திமுகவும், 4 இடங்களில் சுயேட்சைகளும், 3 இடங்களில் அதிமுகவும் வென்றுள்ளது. 5 வார்டுகளில் இன்னும் முடிவு அறிவிக்கப்படவில்லை.

காங்கேயம் நகராட்சியில் மொத்தம் உள்ள 18 வார்டுகளில், திமுக கூட்டணி 11 இடங்களில் வெற்றி பெற்றுள்ளது. அதிமுக 4 இடங்களிலும், சுயேட்சைகள் 3 இடங்களிலும் வெற்றி பெற்றுள்ளன.

கொங்குமண்டலத்தில் கோவை, சேலம், திருப்பூர், ஈரோடு ஆகிய மாவட்டங்களில் மாநகராட்சிகளை வசப்படுத்தியதோடு நகராட்சிகளையும் கொத்தாக அள்ளி அதிமுகவிற்கு அதிர்ச்சி வைத்தியம் அளித்துள்ளது.

English summary

The DMK alliance has won a total of 6 municipalities in Tirupur district.