மதுராந்தகம், தாராபுரம் இடைத்தேர்தலில் தவெக தோற்றால் விஜய்க்கு பெரிய சிக்கல்
திருப்பூர்: மதுராந்தகம், தாராபுரம் ஆகிய தொகுதிகளில் நடைபெறும் இடைத்தேர்தல்களில் தவெக தோற்றால், முதல்வர் விஜய்க்கு மிகவும் தர்மசங்கடமான நிலை ஏற்படும். அதேபோல், இவ்வளவு நாட்களாக ஆதரவு அளித்து வரும் கூட்டணிக் கட்சிகளிடம் இருந்தும் சிக்கல்கள் வர வாய்ப்புள்ளது. ஏனெனில், பொதுவாக இடைத்தேர்தல்களில் ஆளும்கட்சிதான் வெற்றி பெறும் என்பதற்குப் பல வரலாற்றுச் சான்றுகள் உள்ளன. அந்த வரலாற்றை திமுக அல்லது அதிமுக உடைத்து வெற்றி பெற்றால், அக்கட்சிகளுக்கு அது புதிய நம்பிக்கையைத் தரும். மேலும், அடுத்து வரவுள்ள இடைத்தேர்தல்களிலும் அவர்களுக்கு அது ஊக்கமளிப்பதாக அமையும். எனவே, ஆளும்கட்சியான தவெகவிற்கும், முதல்வர் விஜய்க்கும் இந்த இடைத்தேர்தல் வெற்றிகள்தான் உண்மையான அக்னிப்பரீட்சை.
அதிமுக எம்.எல்.ஏ-க்களாகத் தேர்ந்தெடுக்கப்பட்ட மதுராந்தகம் மரகதம் குமரவேல், தாராபுரம் சத்தியபாமா ஆகியோர் தங்களது பதவியை ராஜினாமா செய்துவிட்டு தவெகவில் இணைந்தனர். இதன் காரணமாக அவ்விரு தொகுதிகளிலும் இடைத்தேர்தல் அறிவிக்கப்பட்டுள்ளது. தேர்தல் ஆணையம் கடந்த வாரம் வெளியிட்ட அறிவிப்பில், "மதுராந்தகம், தாராபுரம் ஆகிய தொகுதிகளுக்கு அக்டோபர் 6-ஆம் தேதி இடைத்தேர்தல் நடைபெறும். வேட்புமனு தாக்கல் செப்டம்பர் 9-ஆம் தேதி தொடங்கும். வேட்புமனு தாக்கல் செய்ய செப்டம்பர் 16 கடைசி நாளாகும். வேட்புமனுக்கள் மீதான பரிசீலனை செப்டம்பர் 17-ஆம் தேதி நடைபெறும். வேட்புமனுவை வாபஸ் பெற செப்டம்பர் 19 கடைசி நாள். தேர்தலில் பதிவான வாக்குகள் அக்டோபர் 9-ஆம் தேதி எண்ணப்படும்" என்று கூறப்பட்டிருந்தது.
இதில் ஆளும்கட்சியான தவெக கூட்டணி சார்பில், ஏற்கனவே வெற்றி பெற்றுப் பதவியை ராஜினாமா செய்த மரகதம் குமரவேல் மதுராந்தகம் தொகுதியிலும், சத்தியபாமா தாராபுரம் தொகுதியிலும் வேட்பாளர்களாக அறிவிக்கப்பட்டுள்ளனர். திமுக சார்பில் மதுராந்தகம் தொகுதியில் ஐ. பரந்தாமனும், தாராபுரம் தொகுதியில் எஸ். சுகன்யாவும் போட்டியிடுகிறார்கள். அதிமுக சார்பில் மதுராந்தகம் தொகுதியில் கணிதா சம்பத், தாராபுரம் தொகுதியில் பானுமதி ஆகியோர் வேட்பாளர்களாக அறிவிக்கப்பட்டுள்ளனர். நாம் தமிழர் கட்சி சார்பில் மதுராந்தகத்தில் கோ. ஜானகிராமன், தாராபுரத்தில் மு. கார்த்திகா ஆகியோர் போட்டியிடுகிறார்கள்.
தவெக கூட்டணிக்கு வெளியில் இருந்து ஆதரவு அளித்து வரும் இடதுசாரிகள் தங்களது வேட்பாளர்களை நாளை அறிவிக்கவுள்ளதாகத் தெரிவித்துள்ளனர். இதன் மூலம் இடைத்தேர்தலில் ஐந்து முனைப் போட்டி உறுதியாகியுள்ளது. போட்டி கடுமையாக இருப்பதால், வெற்றி பெறும் கட்சியின் வாக்கு வித்தியாசமும் குறைவாகவே இருக்கும் என்றும் கூறப்படுகிறது.
பொதுவாக ஆளும்கட்சிக்குத்தான் இடைத்தேர்தல்கள் சாதகமாக இருக்கும். ஆனால், அதை உடைத்து திமுக அல்லது அதிமுக வெற்றி பெறும் பட்சத்தில், முதல்வர் விஜய்க்கு நெருக்கடி உருவாகும். ஏனெனில், விஜய் தலைமையிலான தவெக முழு பெரும்பான்மையுடன் வெற்றி பெறவில்லை. எனவே, இடைத்தேர்தலில் வெற்றி பெறுவதற்கு திமுகவும் அதிமுகவும் கடும் போட்டியை அளிக்கும் எனத் தெரிகிறது. 'விஜய்' என்ற தனிநபரை நம்பித்தான் வாக்களித்து, தவெகவிற்கு இவ்வளவு பெரிய வெற்றியை மக்கள் கொடுத்துள்ளார்கள் என்பதால், தவெகவும் பலமாகவே களமிறங்கியுள்ளது.
அதுமட்டுமின்றி, கடந்த முறை வெற்றி பெற்ற அதே வேட்பாளர்களே மீண்டும் களமிறங்குவதுடன், தவெகவின் பலமும் பின்னணியில் இருப்பதால் திமுக, அதிமுகவிற்குப் பலமான போட்டியை தவெக கண்டிப்பாகத் தரும் என்றே எதிர்பார்க்கப்படுகிறது. இருப்பினும், இந்த இடைத்தேர்தலில் திமுக அல்லது அதிமுக தோற்றால் அது அவர்களுக்குப் பெரிய பாதிப்பை ஏற்படுத்தாது. ஆனால், தவெக தோற்றால் நிச்சயம் அக்கட்சிக்கும் விஜய்க்கும் பெரும் சிக்கலை ஏற்படுத்தும். கூட்டணிக் கட்சிகளும் நெருக்கடி தரும் என்பதால், இந்த இடைத்தேர்தல் கூடுதல் முக்கியத்துவம் பெறுகிறது.
Click it and Unblock the Notifications
Sign in with Google
