2026-ல் தவெகவால் என்டிஏ கூட்டணி 3-வது இடத்திற்கு தள்ளப்படும்- விஜய்க்கு டிடிவி தினகரன் ஆதரவு?
திருப்பூர்: அடுத்த ஆண்டு நடைபெறும் தமிழக சட்டசபை தேர்தலில் தவெக தலைமையில் கூட்டணி அமைந்தால், என்டிஏ கூட்டணி 3ஆவது இடத்திற்கு பின்தங்கும் என அமமுக பொதுச் செயலாளர் டிடிவி தினகரன் தெரிவித்துள்ளார்.
இதுகுறித்து திருப்பூரில் அவர் செய்தியாளர்களை சந்தித்தார். அப்போது அவர் கூறியதாவது: தவெக தலைமையில் ஒரு கூட்டணி அமைந்தால் என்டிஏ கூட்டணி 3ஆவது இடத்திற்கு தள்ளப்பட வாய்ப்பிருக்கிறது.
இது ஏதோ எடப்பாடி பழனிசாமி மீதான கோபத்தில் நான் சொல்லவில்லை. கள யதார்த்தத்தை சொல்கிறேன். திமுக மீது இத்தனை குற்றச்சாட்டுகள், இத்தனை போராட்டம் நகராட்சித் துறை உள்பட பல துறைகளில் ஊழல்கள், முறைகேடு குற்றச்சாட்டுகள் உள்ளன.
அது போல் பகுதிநேர ஆசிரியர்கள், மருத்துவர்கள், செவிலியர்களை நிரந்தரம் செய்கிறேன் என சொன்னார்கள். இளைஞர்களுக்கு வேலை வாய்ப்பை ஏற்படுத்தி தருகிறோம் என சொன்னார்கள்.
டிஎன்பிஎஸ்சி மூலம் இந்த நான்கரை ஆண்டுகளில் தமிழகத்தில் எத்தனை பேருக்கு வேலைவாய்ப்பு ஏற்பட்டது என்பதே தெரியவில்லை. வெளிநாட்டு முதலீடுகளின் மூலம் என்ன மாதிரியான வளர்ச்சி ஏற்பட்டது? எத்தனை தொழிற்சாலைகள் தமிழகத்திற்கு வந்துள்ளன? இதெல்லாம் எதுவுமே தெரியவில்லை.
தமிழக மக்களுக்கு எந்த ஒரு பயனும் இல்லாத ஒரு சூழலில் நாடாளுமன்ற தேர்தலில் திமுக கூட்டணி முழு வெற்றியை எப்படி பெற்றது என்பதை உண்மையிலேயே திமுகவை எதிர்க்கும் கட்சிகள் சுய பரிசோதனை செய்து தங்கள் கட்சி கட்டமைப்பை சரி செய்ய வேண்டும். அப்போதுதான் ஆட்சியில் இருக்கும் திமுகவை வீழ்த்த முடியும்? என்பதுதான் யதார்த்தமான உண்மை என டிடிவி தினகரன் தெரிவித்துள்ளார்.
மேலும் அவர் கூறியிருப்பதாவது: செங்கோட்டையன் போன்ற நீண்ட அனுபவம் கொண்ட அரசியல்வாதிகள், தவெகவில் சேர்கிறார்கள் என்றால் அந்தந்த கட்சிகள் தங்களை சீர்படுத்திக் கொள்ள வேண்டும். சில கூட்டணிக்கு தலைமை வகிக்கும் கட்சிகள் எங்களுடன் பேசி வருகின்றனர்.
உறுதியான முடிவு எடுத்த பின்னர் கூட்டணி குறித்து அறிவிக்கப்படும். அதிமுக ஒன்றாக இருந்தால்தான் அடுத்த நூற்றாண்டுக்கும் கட்சியை கொண்டு செல்ல முடியும். தேர்தல் முடிவுக்கு பிறகாவது, அதிமுகவில் மீண்டும் இணைப்பு ஏற்படும் என எதிர்பார்க்கிறேன்.
பதவி ஆசைக்காகவும் சுய லாபத்திற்காகவும் பிளவு ஏற்படுத்தியவர்கள் அவர்களாகவே திருந்த வேண்டும். அனைவரும் ஓரணியில் இணைய வேண்டும் என்றுதான் பாஜக தலைவர்கள் முயற்சி செய்தார்கள். இப்போதும் செய்கிறார்கள். ஒரு கட்சியில் நிலவும் பிரச்சினையை சரி செய்ய மத்தியஸ்தர் தேவை.
பாஜக மத்தியஸ்தம் செய்வதை நாங்கள் தவறாகப் பார்க்கவில்லை. திமுக, அதிமுகவை அடுத்து விஜய் தலைமையில் வலுவான கூட்டணி அமையவுள்ளதாக எனக்கு செய்திகள் வருகிறது. முன்னாள் முதல்வர் ஜெயலலிதா பிறந்தநாளுக்கு யாருடன் கூட்டணி என்பதை அறிவித்துவிடுகிறேன் என்றார் டிடிவி தினகரன்.
Click it and Unblock the Notifications
Sign in with Google