“அப்புறம் எந்த ஆதரவுக்கு விஜய் ஆட்சியில் இருக்கிறார்?”.. சரமாரியாக தாக்கிய நடிகை விந்தியா!
திருப்பூர்: "முன்பு எல்லாமே திராவிடக் கட்சிகளின் சதிதான் எனப் பேசினார் விஜய். இப்போது அவர் தான் முதலமைச்சர். ஏன் மின் தடை ஏற்படுகிறது எனக் கேட்டால் இதற்கும் திராவிடக் கட்சிகளின் சதி என்கிறார். அப்புறம் எந்த ஆதவுக்கு அவர் ஆட்சியில் இருக்கிறார் எனக் கேட்டுச் சொல்லுங்கள்." என தாராபுரத்தில் பேசியுள்ளார் அதிமுகவைச் சேர்ந்த பேச்சாளர் விந்தியா.
திருப்பூர் மாவட்டம் தாராபுரம் சட்டமன்றத் தொகுதி இடைத்தேர்தல் களம் சூடுபிடித்துள்ளது. அதிமுக வேட்பாளர் பானுமதியை ஆதரித்துத் தீவிர வாக்குச் சேகரிப்பில் ஈடுபட்ட அதிமுக கொள்கை பரப்பு இணை செயலாளர் நடிகை விந்தியா, தவெகவை சரமாரியாகத் தாக்கிப் பேசியுள்ளார்.
மக்கள் மத்தியில் பேசிய விந்தியா, "முன்பு விஜய், கோழி முட்டை போட்டாலும் சரி, கோவிந்தா எனச் சொல்லி மொட்டை போட்டாலும் சரி. எல்லாமே திராவிடக் கட்சிகளின் சதிதான் எனப் பேசினார். இப்போது அவர் தான் முதலமைச்சர். ஏன் மின் தடை ஏற்படுகிறது எனக் கேட்டால் இதற்கும் திராவிடக் கட்சிகளின் சதி என்கிறார். அப்புறம் எந்த ஆதவுக்கு அவர் ஆட்சியில் இருக்கிறார் எனக் கேட்டுச் சொல்லுங்கள்." என்றார்.
முன்னதாக செய்தியாளர்கள் சந்திப்பில் பேசிய நடிகை விந்தியா, "விஜய்க்குப் பின்னால் இருந்து யாரோ எழுதிக் கொடுப்பதை மட்டும்தான் அவர் பொதுமேடைகளில் எப்போதும் பார்த்துப் பேசி வருகிறார். கடந்த பொதுத்தேர்தலில் அதிமுகவை ஒரு சில்லறை கட்சி போலப் பேசிவிட்டு, தற்போது தாராபுரம் தொகுதியைக் கைப்பற்ற தவெக அமைச்சர்கள் அனைவரும் இங்கே வந்து முகாமிட்டு வருகிறார்கள்.
எத்தனை அமைச்சர்கள் வந்தாலும் சரி, யார் வந்து கூவினாலும் சரி, தாராபுரம் என்பது எப்போதுமே அசைக்க முடியாத அசல் அதிமுகவின் கோட்டை. எனவே இந்த இடைத்தேர்தலில் தாராபுரம் தொகுதி மக்கள் எப்போதுமே எங்களது பக்கம்தான் உறுதியாக நிற்பார்கள்.
அதிமுகவில் இருந்து விலகி தவெக-வில் சேர்ந்த மகேந்திரன் என்பவருக்கு கட்சியில் இணைந்த வெறும் ஒரே ஒரு மணி நேரத்திற்குள்ளேயே மாவட்டச் செயலாளர் என்ற ஒரு பெரிய உயர் பொறுப்பை முதலமைச்சர் விஜய் அவசர அவசரமாக அள்ளி வழங்கியுள்ளார்.
அதிமுகவில் இருந்து விலகி அங்குச் சென்றுள்ள அத்தனை பேரும் தங்களது சொந்தச் சுயநலத்திற்காக மட்டும்தான் போயிருக்கிறார்கள். இந்த இயக்கத்தில் அவர்கள் அத்தனை பேரும் பெரிய பெரிய பதவிகளில் இருந்து சொகுசாக வாழ்ந்துவிட்டு, தற்பொழுது பதவி கிடைக்காமல் கொஞ்ச நாள் கஷ்டத்தில் இருந்ததால் தவெக-விற்குத் தாவியுள்ளனர்.
தற்போது தாராபுரம் மற்றும் மதுராந்தகம் இடைத்தேர்தல் களத்தில் தவெக-விற்கு அடிமட்ட அளவில் தேர்தல் வேலைகளைப் பார்க்கவும், பூத் முகவர்களாகச் செயல்படவும் சொந்தக் கட்சியில் ஆட்களே இல்லை. இதன் காரணமாகவே, தேர்தல் வேலைகளில் பயங்கர அனுபவம் வாய்ந்த பழைய அதிமுக ஆட்களைப் பெரிய பதவிகள் மற்றும் பணத்தைக் கொடுத்துத் தவெக தலைமை தற்போது வம்படியாக விலை பேசி வாங்கி வருகிறது.
உழைத்த தாய் இயக்கத்திற்குப் பச்சைத் துரோகம் செய்துவிட்டுப் பதவிக்காக விலைபோன இத்தகைய துரோகிகளுக்கு, வரும் அக்டோபர் 6 ஆம் தேதி நடைபெறவுள்ள தாராபுரம் இடைத்தேர்தலில் மக்கள் தங்களது ஓட்டுகளின் மூலம் அசைக்க முடியாத சம்மட்டி அடி கொடுத்து மிகச் சரியான வரலாற்றுப் பாடத்தைப் புகட்டுவது 100 சதவீதம் உறுதி" எனத் தெரிவித்தார்.
Click it and Unblock the Notifications
Sign in with Google
