திருச்சில் கிழக்கில் நிற்கும் முக்கிய புள்ளி! அன்பில் மகேஷ், நேருவை விஜய் குறிவைப்பது ஏன்? பின்னணி
திருச்சி: தமிழக அரசியலில் திருச்சி மாவட்டம் எப்போதுமே ஒரு முக்கியமான தேர்தல் களம். தற்போது திருச்சியில் அடுத்தடுத்து நடக்கும் அதிரடி சம்பவங்கள் மாநிலம் முழுவதும் பெரும் பரபரப்பை ஏற்படுத்தியுள்ளன. திமுகவின் முக்கியத் தலைவர்களான முன்னாள் அமைச்சர் அன்பில் மகேஷ் பொய்யாமொழி கைது செய்யப்பட்டதும், தொடர்ந்து முன்னாள் அமைச்சர் கே.என். நேருவின் இடங்களில் லஞ்ச ஒழிப்புத்துறை (DVAC) சோதனை நடத்தி வருவதும் அரசியல் களத்தில் அனலைக் கிளப்பியுள்ளது. இதன் பின்னணியில் திருச்சி கிழக்கு தொகுதி இடைத்தேர்தல் அரசியல் இருப்பதாக அரசியல் வட்டாரங்களில் பேசப்படுகிறது.
திருச்சி கிழக்கு தொகுதி ஏன் இவ்வளவு முக்கியம்?
நடந்து முடிந்த சட்டமன்ற பொதுத்தேர்தலில் விஜய், பெரம்பூர் மற்றும் திருச்சி கிழக்கு ஆகிய இரண்டு தொகுதிகளில் போட்டியிட்டு வெற்றி பெற்றார். இரண்டு தொகுதிகளில் வென்றதால், சட்ட விதிமுறைகளின்படி அவர் திருச்சி கிழக்கு தொகுதியை ராஜினாமா செய்தார். இதனால் அந்த தொகுதி காலியானதாக அறிவிக்கப்பட்டு, விரைவில் அங்கு இடைத்தேர்தல் நடைபெற உள்ளது. தேர்தல் ஆணையம் இதற்கான தேதியை எந்த நேரத்திலும் அறிவிக்கலாம் என்ற எதிர்பார்ப்பு நிலவுகிறது.
விஜய் வெற்றி பெற்ற தொகுதி என்பதால், இந்த இடைத்தேர்தலில் மீண்டும் வெற்றி பெற்று தங்கள் பலத்தை நிரூபிக்க வேண்டிய கட்டாயத்தில் தவெக உள்ளது. அதே சமயம், திருச்சியில் இழந்த செல்வாக்கை மீட்டெடுக்க திமுகவும் முழு வீச்சில் தயாராகி வருகிறது.
விஜய்க்கு நெருக்கமான வேட்பாளர்?
அரசியல் வட்டாரங்களில் உலவும் தகவல்களின்படி, இந்த இடைத்தேர்தலில் தவெக சார்பில் விஜய்க்கு மிகவும் நெருக்கமான ஒரு முக்கிய நபர் களமிறங்க உள்ளதாகக் கூறப்படுகிறது. திருச்சி கிழக்கு தொகுதியை மீண்டும் தக்கவைத்துக்கொள்வது கட்சியின் கௌரவப் பிரச்சினையாக பார்க்கப்படுகிறது. எனவே, அங்கு தவெக வேட்பாளர் எளிதாக வெற்றி பெற வேண்டும் என்பதற்காக ஆளும் தவெக அரசு கூடுதல் கவனம் செலுத்தி வருவதாக தகவல்கள் தெரிவிக்கின்றன.
திமுகவின் கோட்டையை உடைக்கும் திட்டமா?
திருச்சி பல ஆண்டுகளாக திமுகவின் அசைக்க முடியாத கோட்டையாக இருந்து வருகிறது. இங்கு திமுகவின் தூண்களாக விளங்குபவர்கள் கே.என். நேரு மற்றும் அன்பில் மகேஷ் பொய்யாமொழி. திருச்சி கிழக்கு தொகுதியின் களப்பணிகளை வழிநடத்த வேண்டிய முக்கிய பொறுப்பு இந்த இருவரிடமே இருந்தது.
ஆனால், கடந்த சில தினங்களுக்கு முன்பு பள்ளி அங்கீகார முறைகேடு விவகாரம் தொடர்பாக அன்பில் மகேஷ் கைது செய்யப்பட்டார். அதைத் தொடர்ந்து, கடந்த ஆட்சியில் நடைபெற்றதாகக் கூறப்படும் முறைகேடுகள் தொடர்பாக கே.என். நேருவின் வீடுகள் மற்றும் அலுவலகங்களில் லஞ்ச ஒழிப்புத்துறையினர் தீவிர சோதனையில் ஈடுபட்டனர்.
திருச்சியில் திமுகவை வழிநடத்தும் இரண்டு முக்கியத் தலைவர்கள் மீது ஒரே நேரத்தில் சட்ட நடவடிக்கைகள் பாய்ந்திருப்பது, இடைத்தேர்தல் பணிகளை முடக்கும் முயற்சி என்ற சந்தேகத்தை திமுக வட்டாரத்தில் எழுப்பியுள்ளது.
திமுகவின் குற்றச்சாட்டும் தவெகவின் விளக்கமும்
திமுக தலைமை இந்த நடவடிக்கைகளை மிகக் கடுமையாக விமர்சித்துள்ளது. "திருச்சி கிழக்கு இடைத்தேர்தலில் தோல்வி பயம் வந்துவிட்டதால், பழிவாங்கும் நோக்குடன் ஆளும் தவெக அரசு இந்த சோதனைகளையும் கைதுகளையும் நடத்துகிறது; விளம்பரத்துக்காகவே இது செய்யப்படுகிறது" என்று திமுக தலைவர் மு.க. ஸ்டாலின் பகிரங்கமாகக் குற்றம் சாட்டியுள்ளார்.
மறுபுறம், இந்த குற்றச்சாட்டுகளை ஆளும் தரப்பு திட்டவட்டமாக மறுக்கிறது. "முந்தைய ஆட்சியில் நடந்த மிகப்பெரிய ஊழல்கள் மற்றும் முறைகேடுகள் குறித்து ஆதாரங்களின் அடிப்படையிலேயே விசாரணை அமைப்புகள் சுயமாக செயல்படுகின்றன; இதில் எந்தவித அரசியல் தலையீடோ அல்லது பழிவாங்கும் நோக்கமோ இல்லை" என்று அரசுத் தரப்பில் விளக்கம் அளிக்கப்பட்டுள்ளது.
திருச்சி கிழக்கு இடைத்தேர்தல் தேதி இன்னும் சில நாட்களில் அறிவிக்கப்படலாம் என எதிர்பார்க்கப்படும் நிலையில், களத்தில் திமுக தலைவர்கள் மீதான இந்த நடவடிக்கைகள் திருச்சியின் தேர்தல் களத்தை இப்போதே உச்சக்கட்ட பரபரப்பிற்கு கொண்டு சென்றுள்ளன.
Click it and Unblock the Notifications
Sign in with Google
