அங்கிட்டு எடப்பாடி பழனிசாமி.. இங்கிட்டு உதயநிதி ஸ்டாலின்.. திணறும் மலைக்கோட்டை மாநகரமாம் திருச்சி!
திருச்சி: எடப்பாடி பழனிசாமியும் உதயநிதி ஸ்டாலினும் ஒரே நாளில் திருச்சி மாவட்டத்தில் பல்வேறு நிகழ்ச்சிகளில் கலந்து கொள்வதால் அவர்கள் இருவரையும் வரவேற்க திமுக, அதிமுகவினர் பெருமளவில் திருச்சியில் குவிந்துள்ளனர்.
முன்னாள் அமைச்சர் என்.ஆர்.சிவபதி இல்லத் திருமண விழாவில் பங்கேற்பதற்காக எதிர்க்கட்சித் தலைவர் எடப்பாடி பழனிசாமி திருச்சி வருகிறார்.
அமைச்சர் அன்பில் மகேஸ் பொய்யாமொழி ஏற்பாட்டில் மணப்பாறையில் நடைபெறும் ஐம்பெரும் விழாவில் கலந்துகொள்வதற்காக உதயநிதி ஸ்டாலின் திருச்சி வருகிறார்.
உதயநிதி ஸ்டாலின்
திருச்சி தெற்கு மாவட்ட திமுக சார்பில் மணப்பாறையில் இன்று மாலை ஐம்பெரும் விழா நடத்துகிறார் மாவட்ட பொறுப்பாளரும், அமைச்சருமான அன்பில் மகேஸ் பொய்யாமொழி. அதில் சிறப்பு விருந்தினராக கலந்துகொள்ளும் திமுக இளைஞரணிச் செயலாளர் உதயநிதி ஸ்டாலின், திமுகவின் மூத்த முன்னோடிகளுக்கு பொற்கிழி வழங்குவதுடன் அகில இந்திய அளவில் நடைபெற்ற கபடி போட்டியில் வெற்றிபெற்றவர்களுக்கு பரிசுகளும் அளிக்கிறார்.
40 ஆண்டுகால கோரிக்கை
இதேபோல் மணப்பாறை பகுதி மக்களின் 40 ஆண்டுகால கோரிக்கையான அரசு கலை அறிவியல் கல்லூரி அமைத்ததற்காக முதல்வருக்கு பாராட்டு என ஐம்பெரும் விழாவாக உதயநிதி கலந்துகொள்ளும் நிகழ்ச்சி நடைபெறுகிறது. முன்னதாக திருச்சிக்கு வருகை தரும் உதயநிதி ஸ்டாலினை வரவேற்க திருச்சி, புதுக்கோட்டை, கரூர், தஞ்சாவூர், என நான்கு மாவட்டங்களில் இருந்தும் இளைஞரணி நிர்வாகிகள் திரண்டிருப்பதால் விமான நிலையம் களை கட்டியுள்ளது.
எடப்பாடி பழனிசாமி
இதனிடையே எதிர்க்கட்சித் தலைவரான எடப்பாடி பழனிசாமி அதிமுக முன்னாள் அமைச்சர் என்.ஆர்.சிவபதி இல்லத் திருமண விழாவில் பங்கேற்பதற்காக இன்று மாலை திருச்சி வருகிறார். இதனால் அவரை வரவேற்கவும் அதிமுகவினர் பெருமளவில் திருச்சியில் திரண்டிருக்கிறார்கள். அதிமுக, திமுக ஆகிய இரண்டு கட்சிகளில் இருந்தும் முக்கிய வி.ஐ.பி.க்கள் ஒரே நேரத்தில் திருச்சிக்கு வருவதால் போலீஸார் பாதுகாப்பு ஏற்பாடுகளில் கூடுதல் கவனம் செலுத்தியுள்ளனர்.
கோவை நிகழ்வு
இதனிடையே மூன்று நாட்களுக்கு முன்னர் முதலமைச்சர் ஸ்டாலின் கோவை மாவட்டத்தில் சுற்றுப்பயணம் செய்தபோது எதிர்க்கட்சித் தலைவரான எடப்பாடி பழனிசாமியும் அதே நாளில் கோவையில் ஒரு நிகழ்ச்சியில் பங்கேற்க சென்றிருந்தார். இன்று உதயநிதி திருச்சிக்கு வரும் நிலையில் எடப்பாடி பழனிசாமியும் வருகிறார் என்பது குறிப்பிடத்தக்கது.
Click it and Unblock the Notifications
Sign in with Google