விஜய் தொகுதியில் இரவில் கள்ள ஓட்டு? வாக்குச்சாவடிக்குள் புகுந்த தவெக.. திருச்சியில் பரபரப்பு!
திருச்சி: தவெக தலைவர் விஜய் போட்டியிடும் திருச்சி கிழக்கு தொகுதியில் தேர்தல் அலுவலர்களுக்கு லஞ்சம் கொடுத்து திமுகவினர் கள்ள ஓட்டு போட முயற்சித்ததாக குற்றச்சாட்டு எழுந்துள்ளது. திருச்சி கிழக்கு தொகுதிக்குட்பட்ட மதுரம் வாக்குச்சாவடியில் இருந்த வாக்குப்பதிவு இயந்திரங்கள், இரவு 1 மணியான போதும் ஸ்ட்ராங் ரூமுக்கு கொண்டு செல்லப்படவில்லை. இதனால் சந்தேகம் அடைந்த தவெகவினர் போலீசாருடன் வாக்குவாதத்தில் ஈடுபட்டனர்.
தமிழக சட்டசபைத் தேர்தல் நேற்று சுமூகமாக முடிவடைந்தது. 234 தொகுதிகளிலும் மொத்தமாக 85.15% வாக்குகள் பதிவாகி இருப்பதாக தேர்தல் ஆணையம் அறிவித்துள்ளது. தமிழக அரசியல் வரலாற்றில் 80% மேல் வாக்குப்பதிவு நடந்திருப்பது பல்வேறு தரப்பினர் மத்தியிலும் ஆச்சரியத்தை ஏற்படுத்தியுள்ளது. கடந்த தேர்தலை விடவும் சுமார் 20 லட்சம் வாக்குகள் அதிகமாக பதிவாகி இருக்கிறது.
முதல் தலைமுறை வாக்காளர்கள், இளைஞர்கள் மற்றும் பெண்கள் அதிகளவில் வாக்களித்திருப்பதாக சொல்லப்படுகிறது. தமிழ்நாட்டில் வாக்கு சதவிகிதம் அதிகரித்திருப்பதற்கு SIR நடவடிக்கை மட்டும்மல்லாமல், விஜய்யின் அரசியல் வருகையும் ஒரு காரணமாக பார்க்கப்படுகிறது. தவெக தலைவர் விஜய் இந்த தேர்தலில் பெரம்பூர் மற்றும் திருச்சி கிழக்கு ஆகிய இரு தொகுதிகளில் போட்டியிட்டார்.
இதில் மாலை 6 மணி நிலவரப்படி திருச்சி கிழக்கு தொகுதியில் 81.77% வாக்குகள் பதிவாகி இருந்தது. இப்படியான சூழலில், திருச்சி கிழக்கு தொகுதியில் கள்ள ஓட்டு போடுவதாக தவெகவினர் குற்றம்சாட்டியுள்ளனர். திருச்சி கிழக்கு தொகுதியில் தேர்தல் அதிகாரிகளுக்கு லஞ்சம் கொடுத்து திமுகவினர் கள்ள ஓட்டு போட முயற்சித்ததாக புகார்கள் எழுந்துள்ளன.
மதுரம் மேல்நிலைப் பள்ளியில் இரவு 1 மணியான பின்னரும் கூட வாக்குப்பதிவு இயந்திரங்கள் ஸ்ட்ராங் ரூமுக்கு கொண்டு செல்லப்படவில்லை. இதனால் சந்தேகம் அடைந்த தவெகவினர் வாக்குச்சாவடிக்குள் புகுந்து திமுக மற்றும் காவல்துறையினருடன் வாக்குவாதத்தில் ஈடுபட்டனர். அப்போது தேர்தல் அதிகாரிகள் கதவுகளை மூடிக்கொண்டு கள்ள ஓட்டு போட்டதாக காவல்துறையினரிடம் தவெகவினர் புகாரை முன்வைத்தனர்.
நேற்று இரவு நடந்த இந்த சம்பவம் அங்கு பரபரப்பை ஏற்படுத்தியது. தவெக தலைவர் விஜய் போட்டியிடும் தொகுதியில் கள்ள ஓட்டு குற்றச்சாட்டு எழுந்திருப்பது பேசுபொருளாகி இருக்கிறது. விஜய் போட்டியிடும் 2 தொகுதிகளிலும் வெல்ல வேண்டும் என்பதில் தவெகவினர் தீவிரமாக இருப்பதாக பார்க்கப்படுகிறது.
Click it and Unblock the Notifications
Sign in with Google