முதல்வருக்கு அரோகரா.. அமைச்சருக்கு அரோகரா.. திருச்செந்தூர் சூரசம்ஹார விழாவில் சர்ச்சை கோஷம்!
தூத்துக்குடி: திருச்செந்தூர் சுப்பிரமணிய சுவாமி திருக்கோயில் கந்தசஷ்டி விழாவில் சூரசம்ஹாரம் இன்று மாலை நடைபெற்றது. கடற்கரையில் திரண்டிருந்த லட்சக்கணக்கான பக்தர்களின் முன்னிலையில் நடைபெற்ற சூரசம்ஹார நிகழ்வில், அரசு ஏற்பாடு செய்திருந்த பாடல் குழுவினர், முருகனுக்கு அரோகரா எனக் கூறிவிட்டு, முதல்வர் விஜய் மற்றும் இந்து சமய அறநிலையத்துறை அமைச்சருக்கும் அரோகரா என கோஷம் எழுப்பினர்.
முருகப் பெருமானின் ஆறுபடை வீடுகளில் இரண்டாம் படை வீடான திருச்செந்தூரில் ஆண்டு தோறும் நடைபெறும் கந்தசஷ்டி விழா முக்கியமான விழாவாகும் சூரபத்மனை, முருகப் பெருமான் வதம் செய்த இடம் என்பதால் இங்கு நடைபெறும் சூரசம்ஹாரம் உலக பிரசித்தி பெற்றது. இந்த ஆண்டு கந்தசஷ்டி விழா கடந்த 10 ஆம் தேதி யாகசாலை பூஜையுடன் தொடங்கியது.
இதனைத் தொடர்ந்து தினமும் காலை 3 மணிக்கு கோயில் நடை திறக்கப்பட்டு, விஸ்வரூப தரிசனம், உதயமார்த்தாண்ட அபிஷேகம், யாகசாலை பூஜை, மூலவருக்கு உச்சிகால பூஜை, ஜெயந்திநாதருக்கு யாகசாலையில் தீபாராதனை, தங்கச் சப்பரத்தில் ஜெயந்திநாதர் யாகசாலையில் இருந்து எழுந்தருளி, வேல் வகுப்பு, வீரவாள் வகுப்பு பாடல்களுடன் சண்முகவிலாசம் சேருதல், திருவாவடுதுறை சஷ்டி மண்டபத்தில் ஜெயந்திநாதருக்கு அபிஷேகம், தங்க ரதத்தில் கிரி வீதி உலா போன்ற பல்வேறு சிறப்பு வழிபாடுகள் நடைபெற்றன.
விழாவின் முக்கிய நிகழ்ச்சியான சூரசம்ஹாரம் 6 ஆம் திருநாளான இன்று நடைபெற்றது. இதனை முன்னிட்டு அதிகாலை 1 மணிக்கு கோயில் நடை திறக்கப்பட்டு, விஸ்வரூப தீபாராதனை, உதயமார்த்தாண்ட அபிஷேகம் மற்றும் இதர கால வேளை பூஜைகள் நடைபெற்றன. தொடர்ந்து யாகசாலை பூஜைகள் தொடங்கின.
காலை 9 மணிக்கு பூர்ணாகுதி தீபாராதனை, அதனை தொடர்ந்து சுவாமி, அம்மனுக்கு அபிஷேகம், அலங்காரம் நடைபெற்றது. பகலில் மூலவருக்கு உச்சிக்கால தீபாராதனையும், யாகசாலையில் சுவாமிக்கு மகா தீபாராதனையும் நடைபெற்றது.
பின்னர் தங்கச் சப்பரத்தில் சுவாமி ஜெயந்திநாதர் யாகசாலையில் இருந்து எழுந்தருளி வேல் வகுப்பு, வீரவாள் வகுப்பு முதலிய பாடல்களுடன், மேளவாத்தியங்களுடன் சண்முகவிலாசம் சேர்ந்தார். அங்கு சிறப்பு தீபாராதனை நடைபெற்றது. பிற்பகல் 2 மணியளவில் திருவாவடுதுறை ஆதீன சஷ்டி மண்டபத்தில் சுவாமி ஜெயந்திநாதருக்கு அபிஷேகம், அங்காரம் நடைபெற்றது.
அதைத்தொடர்ந்து மாலை 3.50 மணியளவில் சுவாமி ஜெயந்திநாதர், சூரபத்மனை வதம் செய்வதற்காக போர்க்கோலம் பூண்டு சஷ்டி மண்டபத்தில் இருந்து கடற்கரைக்கு புறப்பட்டார். மாலை 4 மணியளவில் கடற்கரைக்கு வந்து சேர்ந்தார். முன்னதாக சிவன் கோயிலிருந்து சூரபத்மன் எழுந்தருளி உள்மாட வீதி, ரதவீதிகள் சுற்றி கோயில் கடற்கரைக்கு படை பரிவாரங்களுடன் வந்து சேர்ந்தார்.
தொடர்ந்து சூரசம்ஹாரம் தொடங்கியது. முதலில், கஜ முகத்துடன் வந்த சூரபத்மன், சுவாமியை ஆணவத்தோடு மூன்று முறை வலம் வந்து போரிட்டான். அவனை, மாலை 4.15 மணிக்கு ஜெயந்திநாதர் தனது வெள்ளி வேலால் வதம் செய்தார். இரண்டாவதாக சிங்க முகத்துடன் வந்த சூரனை 4.37 மணிக்கும், மூன்றாவதாக சுயரூபத்துடனும் போரிட்ட சூரபத்மனை 4.53 மணிக்கும் வதம் செய்தார்.
பின்னர் மாமரமாக மாறிய சூரனை சேவலாகவும், மயிலாகவும் மாற்றி தன்னுள் ஆட்கொண்டார் ஜெயந்திநாதர். அப்போது கடற்கரையில் அலை கடலென திரண்டிருந்த பக்தர்கள் எழுப்பிய வெற்றிவேல் முருகனுக்கு அரோகரா என்ற கோஷம் விண்ணை பிளக்கச் செய்தது.
மேலும், திருச்செந்தூரில் சூரசம்ஹார நிகழ்வுக்காக அரசு ஏற்பாடு செய்திருந்த பாடல் குழுவினர், முருகனுக்கு அரோகரா எனக் கூறிவிட்டு, தமிழக முதல்வர் மற்றும் இந்து சமய அறநிலையத்துறை அமைச்சருக்கும் அரோகரா என கோஷம் எழுப்பினர்.
சூரசம்ஹாரத்தை காண லட்சக்கணக்கான பக்தர்கள் கடற்கரையில் கூடியிருந்தனர். சூரசம்ஹாரம் முடிந்ததும் பக்தர்கள் கடலில் புனித நீராடி விரதத்தை நிறைவு செய்தனர். சூரசம்ஹாரம் முடிந்தும் வள்ளி, தெய்வானையுடன் சுவாமி ஜெயந்திநாதர் சந்தோச மண்டபத்தில் எழுந்தருளினார்.
சூரசம்ஹார விழாவில் தமிழக அமைச்சர்கள் ரமேஷ், கீர்த்தனா, ஸ்ரீநாத், மதன் ராஜா, டி.கே. பிரபு, இந்து சமய அறநிலையத்துறை ஆணையர் டி.ஜி.வினய், தூத்துக்குடி மாவட்ட ஆட்சியர் விஷு மகாஜன், மாவட்ட வன அலுவலர் இளையராஜா உள்ளிட்டோர் கலந்து கொண்டனர்.
Click it and Unblock the Notifications
Sign in with Google
