எல்லாம் அங்க போய் கும்பிடுறாங்க!.. ஆமா முதல்வர் ஸ்டாலினா? இல்லை உதயநிதியா?.. கே பி முனுசாமி பொளேர்!

Updated: Monday, September 27, 2021, 20:39 [IST]

Subscribe to Oneindia Tamil

காட்பாடி: உதயநிதி ஸ்டாலின் மேடைக்கு மேடை நீட்டை ரத்து செய்வதாக கூறினார். ஆனால் செய்யவில்லை - அமைச்சர்கள் சட்டமன்ற உறுப்பினர்களும் முதல்வரை சந்திக்கிறார்களோ இல்லையோ உதயநிதியை சந்தித்து வணக்கம் சொல்கிறார்கள் என குடியாத்தத்தில் அதிமுக துணை ஒருங்கிணைப்பாளர் கே பி முனுசாமி விமர்சனம் செய்துள்ளார்.

வேலூர் மாவட்டம் குடியாத்தம், காட்பாடி ஊராட்சி ஒன்றியத்தில் ஊரக உள்ளாட்சி தேர்தலுக்கான வேட்பு மனு பிரச்சினை காரணமாக அதிகாரிகளிடம் வாக்குவாதத்தில் ஈடுபட்டதாக அதிமுக நிர்வாகிகள் ஜனார்த்தனன், அமர்நாத், ஆனந்தன் ஆகிய 3 பேர் கைது செய்யப்பட்டனர்.

குடியாத்தம் கிளை சிறைச் சாலையில் அடைக்கப்பட்டுள்ள நிலையில் சிறைச் சாலையில் உள்ள அதிமுக நிர்வாகிகளை சந்திப்பதற்காக குடியாத்தம் வந்த அதிமுக துணை ஒருங்கிணைப்பாளர் அவர்களை சந்தித்து ஆறுதல் கூறிவிட்டு செய்தியாளர்களை சந்தித்தார்.

ஊரக உள்ளாட்சி தேர்தல்

அப்போது அவர் கூறுகையில் வரும் ஊரக உள்ளாட்சி தேர்தலில் அதிமுக அதிக இடங்களில் வெற்றி பெறும் என்பதாலேயே அதிமுக வேட்பாளர்களின் மனுக்கள் நிராகரிக்கப்படுகிறது. திமுக சொன்ன வாக்குறுதிகளை நிறைவேற்ற முடியாததால் இதுபோன்ற திசைதிருப்பும் செயல்களில் திமுக அரசு ஈடுபட்டு வருகிறது.

ஜனநாயக முறைப்படி

வரும் உள்ளாட்சித் தேர்தல் ஜனநாயக முறைப்படி நடத்தப்படுமா என்ற சந்தேகத்தின் அடிப்படையிலேயே அதிமுக சார்பாக நீதிமன்றத்தில் வழக்கு தொடர்ந்து இருக்கிறோம். உள்ளாட்சித் தேர்தலுக்கு முன்பே இவ்வளவு அராஜகம் செய்யும் ஆளுங்கட்சியினர் உள்ளாட்சி தேர்தலின் போதும் வாக்கு எண்ணிக்கையின் போது என்ன செய்வார்கள் என்ற சந்தேகம் இருக்கிறது.

பாதுகாப்பு இருக்குமா

மேலும் வாக்கு எண்ணிக்கை மையத்தில் உள்ள அதிமுக கட்சி நிர்வாகிகளுக்கு பாதுகாப்பு இருக்குமா என்பதும் அச்சமாக உள்ளது. நீட் குறித்து பொய்யான வாக்குறுதியை திமுக அளித்தது. மேடைக்கு மேடை உதயநிதி ஸ்டாலின் நீட்டை ரத்து செய்வோம் என்று கூறினார். ஆனால் அவர்கள் அதனை செய்யவில்லை.

அமைச்சர்கள்

அமைச்சர்களும், சட்டமன்ற உறுப்பினர்களும் உதயநிதியை சந்திக்கின்றனர். ஸ்டாலின் முதல்வரா இல்லை உதயநிதி முதல்வரா என்ற சந்தேகம் எழுந்துள்ளது என கே பி முனுசாமி விமர்சித்துள்ளார். கடந்த ஆகஸ்ட் மாதம் நடந்த தமிழக பட்ஜெட் தாக்கலின் போது பல எம்எல்ஏக்கள் எழுந்து வந்து உதயநிதி ஸ்டாலினிடம் வணக்கம் சொல்லிவிட்டு தங்கள் இருக்கைக்கு சென்ற வீடியோ வைரலானது குறிப்பிடத்தக்கது.