நானெல்லாம் உதைக்கிற மாட்டிலேயே வேகமாக பால் கறப்பவன்.. இது யாராலும் முடியாது.. அமைச்சர் எ.வ.வேலு கலகல

திருப்பத்தூர்: நானெல்லாம் உதைக்கிற மாட்டிலேயே வேகமாக பால் கறப்பவன். என்னை போல் வேகமாக பால் கறக்க யாராலும் முடியாது என அமைச்சர் எ.வ.வேலு கூறிய போது அரங்கில் சிரிப்பலை எழுந்தது.

திருப்பத்தூர் மாவட்ட ஆட்சித் தலைவர் பழைய கூட்ட அரங்கில் திருப்பத்தூர் மாவட்ட கூட்டுறவு பால் உற்பத்தியாளர்கள் சங்க தலைவர் மற்றும் இயக்குநர்கள் பதவியேற்பு விழா நடைபெற்றது. இந்த விழாவில் பொதுப் பணிகள், நெடுஞ்சாலைகள் மற்றும் சிறு துறைமுகங்கள் துறை அமைச்சர் எ.வ .வேலு கலந்துகொண்டார்.

இவ்விழாவில் திருப்பத்தூர் மாவட்ட கூட்டுறவு பால் உற்பத்தியாளர்கள் சங்க ஒன்றிய தலைவராக திருப்பத்தூர் நகர செயலாளர் ராஜேந்திரன், துணைத் தலைவராக தேன்மொழி மற்றும் 15 நிர்வாக குழு இயக்குனர்கள் பதவிக்குரிய நிர்வாகிகள் பதவி ஏற்றுக் கொண்டனர்.

அமைச்சர் எ.வ.வேலு

இதனை தொடர்ந்து மேடையில் பேசிய அமைச்சர் எ.வ.வேலு , நான் ஒரு விவசாயி. என்னை போல் யாராலும் வேகமாக பால் கறக்க முடியாது. நானெல்லாம் உதைக்கிற மாட்டிலேயே பால் கறப்பவன் என கூறிய போது அரங்கம் முழுவதும் சிரிப்பொலி எழுந்தது. மேலும் பல பால் கூட்டுறவு உற்பத்தி சங்கங்கள் உற்பத்தி குறைவின் காரணமாக சங்க பதிவுகளை இழந்து போய்விட்டன.

சங்கங்கள்

அதுபோன்ற சங்கங்களை கண்டறிந்து உற்பத்தி குறைந்ததற்கான காரணங்களை தேடி பிடித்து மீண்டும் சங்கத்தை புதுப்பிக்க வேண்டும். தொடக்க பால் உற்பத்தி சங்கங்களை உருவாக்க வேண்டும். அதற்கு ஏற்றவாறு புதிய நிர்வாகிகள் செயல்பட வேண்டும் என்று கூறினார்.

யார் பங்கேற்பு

திருவண்ணாமலை நாடாளுமன்ற உறுப்பினர் அண்ணாதுரை, சட்டமன்ற உறுப்பினர்கள் கலந்து கொண்ட விழாவில் திருப்பத்தூர் கிளை, நகர, மாவட்ட, ஒன்றிய கழக நிர்வாகிகள் புதியதாக பதவி ஏற்று கொண்டவர்களுக்கு வாழ்த்துகளை கூறிச் சென்றனர். வழக்கமாக அமைச்சர் துரைமுருகன்தான் நகைச்சுவையாக பேசி சுற்றியிருப்போரை கலகலத்து போக செய்வார்.

அமைச்சர் எ.வ.வேலு

அந்த வகையில் தற்போது அமைச்சர் எ.வ.வேலுவும் நகைச்சுவையாக பேசியுள்ளார். அரசியல் கட்சி தலைவர்கள் பெரும்பாலானோர தங்கள் உரை யாருக்கும் போர் அடிக்காத வகையில் இதுபோன்ற நகைச்சுவை பாணியை கடைபிடிக்கிறார்கள் என்றே சொல்லலாம். எது எப்படி இருந்தாலும் ஒருவரை சிரிக்க வைப்பது என்பது புண்ணியமான காரியம் என திமுக தொண்டர்கள் நெகிழ்ச்சியடைகிறார்கள்.

English summary

Minister E.Ve.Velu speaks jovial in Milk producers association meeting in Tirupathur.