யாருடைய பாவத்தையும் இனி சுமக்க வேண்டியதில்லை.. Relief கிடைச்சிடுச்சி! அப்பாடா.. சி.வி.சண்முகம்

விழுப்புரம்: யாருடைய பாவத்தையும் இனி சுமக்க வேண்டிய அவசியம் இல்லை என பாஜகவை அதிமுக எம்பியும் முன்னாள் அமைச்சருமான சி.வி.சண்முகம் அதிரடியாக விமர்சித்திருந்தார்.

விழுப்புரம் மாவட்டம் கோலியனூர் தெற்கு ஒன்றிய அதிமுக சார்பில் பிடாகம் அருகே உள்ள நத்தமேடு கிராமத்தில் இளைஞர், இளம்பெண்கள் பாசறை, மகளிர் அணி வாக்குச் சாவடி குழு அமைப்பது தொடர்பான ஆலோசனை கூட்டம் சனிக்கிழமை நடந்தது.

இந்த கூட்டத்தில் பேசிய சி.வி.சண்முகம் அதிமுகவில் சாதாரண தொண்டரும் உயர் பதவிக்கு வர முடியு.ம் குடும்ப, வாரிசு அரசியல் இல்லாத கட்சி அதிமுகதான். ஆனால் திமுகவில் அப்படி இல்லை. அவர்களுடைய குடும்பத்தினரே உயர் பதவிகளை வகிக்கிறார்கள்.

விலைவாசி உயர்வு, வரி உயர்வு, ஏமாற்றுத் திட்டங்களால் பாதிக்கப்பட்ட மக்கள் திமுக அரசை ஆட்சியிலிருந்து விலக்க தயாராகி வருகிறார்கள். அதிமுக கூட்டணியில் தற்போது பாஜக இல்லை. இதனால் அதிமுகவுக்கு இருந்த சுமை குறைந்துள்ளது. எந்த பாரமும் இல்லை , எந்த சுமையும் இல்லை. யாருடைய பாவத்தையும் சுமக்க வேண்டிய அவசியம் இல்லை.

ரிலீவாகிவிட்டோம். அப்பாடா என இருக்கிறது. இதில் முக்கியமாக சொல்ல வேண்டியது என்னவென்றால் உறுப்பினர் அட்டை இருக்க வேண்டும். அப்போதுதான் நான் அதிமுக , 2000 இல் இருந்து கட்சியில் இருக்கிறேன், 2010 இல் இருந்து இருக்கிறேன், நான் கஷ்டப்பட்டுள்ளேன், எனக்கு இந்த பதவி கொடுங்கள், உள்ளாட்சி தேர்தல், சட்டசபை தேர்தல், நாடாளுமன்றத் தேர்தலில் போட்டியிட வாய்ப்பு கொடுங்கள் என கேட்க முடியும்.

சிரிக்காதீங்க! அதிமுகவில் சாதாரண தொண்டனும் முதல்வராகலாம். எந்த பதவியை வேண்டுமானால் கேட்கலாம். கனவு காணலாம், மைக்கை பிடித்து கேட்கலாம். ஆனால் இதெல்லாம் திமுகவில் கேட்க முடியாது, கேட்பது என்ன கனவு கூட காண முடியாது. அவர்கள் வாரிசுகளை தவிர வேறு யாரும் அந்த பதவிக்கு வர முடியாது.

திமுக மட்டுமில்லை இந்தியாவிலும் காங்கிரஸ், பீகாரில் ராஷ்டிரிய சமிதி, ஆந்திராவில் தெலுங்கு தேசம், தெலுங்கானாவில் பிஆர்எஸ் கட்சி என எங்கு பார்த்தாலும் வாரிசு அரசியல்தான். உழைப்பவர்களை தேடிச் சென்று பதவி கொடுக்கும் இயக்கம்தான் அதிமுக.

வரும் மக்களவைத் தேர்தலில் தமிழகத்தில் அதிமுக தலைமையிலான கூட்டணி அமையும். இதனால் கிராமங்களில் அடிப்படை கட்டமைப்பை உருவாக்கி புதிய உறுப்பினர்கள் சேர்க்கையை தீவிரப்படுத்த வேண்டும் என்றார்.

English summary

ADMK MP C.V.Shanmugam says that hereafter no burden for us to carry. He indirectly criticises BJP.