செஞ்சி சிறுமி மாயம்! சிபிசிஐடி விசாரணையில் புதிய நம்பிக்கை.. சிறுமி உயிருடன் இருக்க வாய்ப்பு?
விழுப்புரம்: விழுப்புரம் மாவட்டம் செஞ்சி அருகே உள்ள ஆலம்பூண்டி குளக்கரை தெருவைச் சேர்ந்த வடிவேலு - பவானி தம்பதியின் 7 வயது மகள் ஹேமாவதி. கடந்த அக்டோபர் 11 அன்று இரவு தனது பிறந்தநாளைக் கொண்டாடிவிட்டு, தாய் மற்றும் பாட்டியின் அருகில் படுத்து உறங்கிய குழந்தை, மறுநாள் அதிகாலை மர்மமான முறையில் காணாமல் போனார்.
சிறுமி மாயமாகி 12 நாட்களைக் கடந்த நிலையில், உள்ளூர் காவல்துறையினர் 10 நாட்கள் தேடியும் எந்தத் துப்பும் கிடைக்காததால் வழக்கு சிபிசிஐடி (CB-CID) சிறப்புப் புலனாய்வுப் பிரிவுக்கு மாற்றப்பட்டது. தற்போது சிபிசிஐடி டி.எஸ்.பி கீதா தலைமையிலான தனிப்படையினர் ஆலம்பூண்டியில் முகாமிட்டு கடந்த 3 நாட்களாக இரவும் பகலும் அதிரடி விசாரணையில் ஈடுபட்டு வருகின்றனர். இந்த விசாரணையில், வழக்கின் போக்கையே மாற்றும் சில மிக முக்கியமான தகவல்களும், புது நம்பிக்கையும் பிறந்துள்ளன.
வழக்கத்திற்கு மாறான நிலை: சிறுமி உயிருடன் இருக்கிறாரா?
பொதுவாகக் குற்றவியல் வழக்குகளில், பாலியல் வன்கொடுமை அல்லது கொடூரக் கொலை போன்ற விபரீத சம்பவங்கள் நிகழ்ந்திருந்தால், சம்பவம் நடந்து இத்தனை நாட்களுக்குள் (12 நாட்களுக்கு மேல்) உடலின் எச்சங்களோ அல்லது ஏதேனும் ஒரு தடையமோ காடுகள், கிணறுகள், அல்லது புதர்களில் போலீசாரின் தேடுதலில் சிக்கியிருக்கும்.
ஆனால், செஞ்சி காட்டுப் பகுதிகள், ஆழ்துளைக் கிணறுகள், ஏரிகள் மற்றும் விவசாய நிலங்களை ட்ரோன் கேமராக்கள், மோப்ப நாய்கள் மற்றும் மீனவர்களின் பிரத்யேக வலைகள் கொண்டு சல்லடை போட்டுத் தேடியும் இதுவரை சிறுமிக்கு எந்தவொரு அசம்பாவிதமும் நேர்ந்ததற்கான நேரடித் தடயங்களோ அல்லது உடலோ சிக்கவில்லை.
இந்த முக்கியப் புள்ளி, புலனாய்வு அதிகாரிகளுக்கு மிகப்பெரிய நம்பிக்கையைத் தந்துள்ளது. "குழந்தைக்கு விபரீதம் எதுவும் நேரவில்லை; சிறுமி இன்னும் எங்கோ உயிருடன் மறைத்து வைக்கப்பட்டிருக்க அதிக வாய்ப்புள்ளது" என்ற கோணத்தில் சிபிசிஐடி தனது பார்வையைத் திருப்பியுள்ளது. யாரோ திட்டமிட்டு குழந்தையைக் கடத்திச் சென்று வேறு இடத்தில் வைத்திருக்கலாம் என்ற சந்தேகம் வலுத்துள்ளது. இதற்காகத் தகவல் தருவோருக்கு ரூ.2 லட்சம் சன்மானமும் அறிவிக்கப்பட்டு தீவிர தேடுதல் வேட்டை நடக்கிறது.
தாயின் முரண்பட்ட பதில்கள்: தாமதமாகும் விசாரணை
சிபிசிஐடி அதிகாரிகள் களமிறங்கியதும், வழக்கின் முதல் கட்டமாக சிறுமியின் தாயார் பவானியிடம் கதவை உள்பக்கமாகப் பூட்டிக்கொண்டு பல மணி நேரம் தொடர் விசாரணை நடத்தினர். பிறந்தநாள் கொண்டாடிய நேரம், யாரெல்லாம் வந்தார்கள், நள்ளிரவில் சிறுமி எப்படி வெளியே சென்றார் என்பது குறித்து அடுக்கடுக்கான கேள்விகள் கேட்கப்பட்டன.
ஆனால், தாயார் பவானி காவல்துறையினரின் பல கேள்விகளுக்குத் தெளிவான, நேரடியான பதில்களை அளிக்காமல் முன்னுக்குப் பின் முரணாகப் பேசி வருவதாகக் கூறப்படுகிறது. வாய்மொழியாக ஒரு விதமாகவும், எழுத்துப்பூர்வமாக வேறு விதமாகவும் கூறப்பட்ட முரண்பட்ட தகவல்கள் விசாரணையைத் தொடக்கத்தில் சற்று இழுபறிக்கு உள்ளாக்கியது. இருப்பினும், குடும்பப் பின்னணி, உறவினர்களுக்குள் இருக்கும் ரகசியங்கள், மற்றும் அக்கம் பக்கத்தினரின் தகவல்களை வைத்து உண்மையை வெளிக் கொண்டுவர அதிகாரிகள் முயற்சி செய்து வருகின்றனர்.
துப்பு துலங்கும் என்ற அசைக்க முடியாத நம்பிக்கை
விசாரணையில் ஆரம்பக்கட்ட முட்டுக்கட்டைகள் இருந்தாலும், தீவிரமாக ஆய்வு செய்யப்பட்டு வரும் 600-க்கும் மேற்பட்ட செல்போன் அழைப்புகள் மற்றும் சந்தேகத்திற்குரிய 12-க்கும் மேற்பட்ட நபர்களின் வாக்குமூலங்கள் வழியாக மிக முக்கியமான முதற்கட்ட தடயங்கள் சிக்கும் என அதிகாரிகள் உறுதியாக நம்புகின்றனர்.
"சிறுமி உயிருடன் எங்கோ பத்திரமாக இருக்கிறார்; அவரை மர்ம நபர்களின் பிடியில் இருந்து மிக விரைவில் பத்திரமாக மீட்டு, அவரது குடும்பத்தாரிடம் ஒப்படைப்போம்" என்ற அசைக்க முடியாத நம்பிக்கையுடன் சிபிசிஐடி தனிப்படையினர் ஒவ்வொரு கோணத்தையும் மிக நுணுக்கமாக ஆராய்ந்து வருகின்றனர். ஊரையே உலுக்கிய இந்த மர்ம முடிச்சு விரைவில் அவிழும் என்ற எதிர்பார்ப்பில் ஒட்டுமொத்த தமிழகமும் காத்திருக்கிறது.
Click it and Unblock the Notifications
Sign in with Google
