ஃப்ரீசர் பாக்ஸை தொட்டு அழுத தம்பி.. திடீரென அலறல்... காப்பாற்ற முயன்ற பெண்கள் மீது பாய்ந்த மின்சாரம்

விழுப்புரம்: விழுப்புரம் மாவட்டம் சாத்தனூரில் துக்க வீட்டில் வைக்கப்பட்ட ஃப்ரீசர் பாக்ஸில் மின்கசிவு ஏற்பட்டதால் 15க்கும் மேற்பட்டோர் காயம் அடைந்தனர். நல்வாய்ப்பாக மின்சாரம் துண்டிக்கப்பட்டதால் எந்த உயிர் சேதமும் ஏற்படவில்லை.

இறந்தவர்கள் உடலை வைக்க பயன்படும் Freezer Box சில நேரங்களில் மின் கசிவு காரணமாக விபத்துகளை ஏற்படுத்துகின்றன.. கடந்த செப்டம்ர் மாதம் திருவண்ணாமலை மாவட்டம் சேத்துப்பட்டு அருகே துக்க நிகழ்ச்சியில் பங்கேற்ற 15க்கும் மேற்பட்ட உறவினர்கள், உடலை வைத்திருந்த Freezer Box-ல் இருந்து மின்சாரம் தாக்கியதால் தூக்கி வீசப்பட்டனர்.

திருவண்ணாமலை மாவட்டம் சேத்துப்பட்டு அடுத்த பட்டனூர் கிராமத்தில் பள்ளி மாணவி பெற்றோர் திட்டியதால் உயிரை மாய்த்து கொண்டார். மாணவியின் உடல் பிரேத பரிசோதனைக்கு பிறகு உறவினர்களிடம் ஒப்படைக்கப்பட்டது. மாணவியின் உடல் ஃபிரீஸர் பாக்ஸில் வைக்கப்பட்ட நிலையில், உறவினர்கள் அதன் மீது கை வைத்து கதறி அழுதனர். சிலர் சாய்ந்து கொண்டும் அழுதனர். அப்போது எதிர்பாராதவிதமாக ஃப்ரீசர் பாக்ஸில் மின்சாரம் தாக்கி 15 பேரும் தூக்கி வீசப்பட்டனர்.

இந்த சம்பவம் நடந்த இரண்டு மாதங்கள் கூட ஆகாத நிலையில் அதேபோன்ற சம்பவம் விழுப்புரம் மாவட்டத்தில் நடந்துள்ளது..

விழுப்புரம் மாவட்டம் சாத்தனூரில் தேவா என்பவரது உடல் வைக்கப்பட்ட ஃபிரீஸர் பாக்ஸை அவரது தம்பி பகவான் தொட்டு அழுத போது, மின்சாரம் தாக்கி உள்ளது. அப்போது அவரது அருகில் இருந்த பெண்கள் அவரை காப்பாற்ற சென்ற போது அவர்களது உடலிலும் மின்சாரம் பாய்ந்தது. உடனடியாக அருகில் இருந்தவர்கள் மின்சாரத்தை துண்டித்ததால் உயிரிழப்பு ஏற்படவில்லை.

காயம் அடைந்தவர்கள் திண்டிவனம் அரசு மருத்துவமனையில் சிகிச்சைக்காக அனுமதிக்கப்பட்டுள்ளனர்.. விழுப்புரம் மாவட்டம் சாத்தனூரில் துக்க நிகழ்ச்சிக்கு சென்ற வீட்டில் 15க்கும் மேற்பட்டோர் காயம் அடைந்த சம்பவம் பெரும் சோகத்தை ஏற்படுத்தி உள்ளது..

English summary

More than 15 people were injured due to electrical leakage in a freezer box kept at a funeral home in Chathannoor, Villupuram district. Fortunately no loss of life was caused due to the power outage.