அமெரிக்க அதிபரை கைது செய்ய முடியுமா! அந்நாட்டின் சட்டம் சொல்வது என்ன! வினோதமான ரூல்ஸ்

Updated: Monday, January 20, 2025, 20:08 [IST]

Subscribe to Oneindia Tamil

வாஷிங்டன்: அமெரிக்காவின் 47ஆவது அதிபராக டிரம்ப் இன்னும் சற்று நேரத்தில் பதவியேற்கவுள்ளார். கடந்த முறை அதிபராக இருந்த காலகட்டத்திலேயே டிரம்ப் மீது பல புகார்கள் எழுந்திருந்தது. இதற்கிடையே டிரம்ப் மீண்டும் அதிபராகப் பதவியேற்கும் சூழலில், அமெரிக்க அதிபர் பதவியில் இருக்கும் ஒருவர் மீது அந்நாட்டு போலீசாரால் கைது நடவடிக்கை எடுக்க முடியுமா என்பதே நெட்டிசன்களிடையே உள்ள கேள்வியாக உள்ளது. அதற்கான பதிலை நாம் பார்க்கலாம்.

அமெரிக்காவின் 47ஆவது அதிபராக டிரம்ப் இன்னும் சில மணி நேரத்தில் பதவியேற்கவுள்ளார். டிரம்ப் அதிபராகப் பதவியேற்பது இது இரண்டாவது முறை. ஏற்கனவே 2017-2021 வரை அதிபராக இருந்தவர் டிரம்ப்.

டொனால்ட் டிரம்ப்:

அந்த சமயத்தில் டிரம்ப் மீது இரண்டு முறை பதவிநீக்க விசாரணையும் கூட நடந்துள்ளது. இந்தச் சூழலில் அவர் மீண்டும் அதிபராகப் பதவியேற்கும் சூழலில், அதிபர் பதவியில் இருக்கும் ஒருவரைக் கைது செய்ய முடியுமா என்பதில் பலருக்கும் சந்தேகம் எழுந்துள்ளது. இப்போது இணையத்தில் நெட்டிசன்கள் பலரும் தேடும் கேள்வியாகவும் இதுவே இருக்கிறது. ஏதாவது ஒரு குற்றம் அமெரிக்க அதிபர் பதவியில் இருப்போர் மீது சுமத்தப்பட்டால் அவரை கைது செய்ய முடியுமா என்பதே பலருக்கும் இருக்கும் சந்தேகம் ஆகும். இதற்கான பதிலை நாம் பார்க்கலாம்.

சட்டம் சொல்வது என்ன:

அமெரிக்க அதிபர் பதவியில் இருக்கும் ஒருவரைக் கைது செய்ய முடியுமா எனக் கேட்டால்.. அதற்கான பதில் சிக்கலான ஒன்று.. அரசியலமைப்பு சட்டங்கள் மற்றும் வரலாற்று முன்னுதாரணங்கள் எனப் பல விஷயங்களை நாம் இதில் கருத்தில் கொள்ள வேண்டும். அமெரிக்க அதிபர் பதவியில் இருப்போர் அல்லது மாஜி அமெரிக்க அதிபர்கள் தவறு செய்யும் போது என்ன செய்ய வேண்டும் என்பது குறித்து அந்நாட்டின் அரசியலமைப்பு நேரடியாக எதையும் குறிப்பிடவில்லை. அதேநேரம் சில வழிகாட்டுதல்களை அது வழங்குகிறது.

அமெரிக்க அரசியலமைப்பின் பிரிவு II, செக்ஷன் 4 என்பது அமெரிக்க அதிபரைப் பிரதிநிதிகள் சபையால் (அமெரிக்காவின் கீழ் சபை) பதவி நீக்கம் செய்ய முடியும் என்று தெளிவாகக் கூறுகிறது. பிரதிநிதிகள் சபையால் குற்றவாளி என நிரூபிக்கப்படும் அதிபரை (அமெரிக்காவின் மேல் சபை) செனட் மூலம் அதிபர் பதவியில் இருந்து நீக்க முடியும்.

நீதித்துறை சொல்வது என்ன:

எனவே, இதன்படி பார்த்தால் அமெரிக்க அதிபர் மீது கைது நடவடிக்கை எடுக்கலாம். ஆனால், அமெரிக்க வரலாற்றில் இதுவரை அதுபோல ஒரு நடவடிக்கை எடுக்கப்பட்டதே இல்லை. கடந்த காலங்களில் இது தொடர்பாகப் புகார்கள் எழுந்த போதும் அதிபர் பதியில் இருக்கும் ஒருவர் மீது குற்றஞ்சாட்டவோ அல்லது வழக்குத் தொடரவோ முடியாது என்ற நிலைப்பாட்டையே அந்நாட்டின் நீதித்துறை எடுத்து வந்துள்ளது.

கைது செய்ய முடியுமா

இதனால் அதிபர் என்ன வேண்டுமானாலும் செய்யலாம் அவர் மீது நடவடிக்கை எடுக்கப்படாது என்று அர்த்தம் இல்லை. அதிபர் பதவியில் இருக்கும் வரை மட்டுமே அவரை கைது செய்ய முடியாது. அதிபர் பதவியில் இருந்து இறங்கிய உடனேயே அந்நாட்டு போலீசாரால் கைது நடவடிக்கை எடுக்க முடியும். அதுவும் அதிபராக இருந்த போது ஏதாவது குற்றம் செய்திருந்தால்.. அது தொடர்பாகவும் அதிபர் பதவியில் இருந்து விலகிய பிறகு நடவடிக்கை எடுக்க முடியும் என்பதே பதிலாகும்.