"நானே நேரடியா வரேன்.." டிரம்ப் எடுத்த அதிரடி முடிவு! ஈரான் விவகாரத்தில் உற்று பார்க்கும் உலக நாடுகள்

வாஷிங்டன்: அமெரிக்கா ஈரான் இடையேயான பிரச்சினை நாளுக்கு நாள் அதிகரித்து வருகிறது. இரு நாடுகளுக்கும் இடையே தாக்குதல் நடக்கலாம் என்று அஞ்சப்படும் நிலையில், அமெரிக்கா இது தொடர்பாகச் சில முக்கிய கருத்துகளைத் தெரிவித்துள்ளது. ஈரான் உடனான பிரச்சினைகளைத் தீர்ப்பது குறித்து டிரம்ப் நிர்வாகம் முக்கிய கருத்துகளைக் கூறியுள்ளது.

மத்தியக் கிழக்கில் நாளுக்கு நாள் பதற்றம் அதிகரித்து வருகிறது. அங்கு ஈரானுக்கு நெருக்கடி கொடுக்கும் வகையில் அமெரிக்கா தொடர்ந்து செயல்பட்டு வருகிறது. ஏற்கனவே, ஈரானை நோக்கி விமானம் தாங்கி போர்க்கப்பலை அமெரிக்கா அனுப்பி இருந்தது. இதற்கிடையே இப்போது அமெரிக்காவின் இரண்டாவது விமானந்தாங்கி கப்பலும் ஈரான் அருகே அனுப்பப்பட்டுள்ளது. இதனால் அங்குப் பதற்றம் அதிகரித்துள்ளது.

மார்கோ ரூபியோ

இதற்கிடையே ஈரான் விவகாரம் தொடர்பாக அமெரிக்க வெளியுறவுத்துறை அமைச்சர் மார்கோ ரூபியோ சில முக்கிய கருத்துக்களைத் தெரிவித்துள்ளார். ஈரானுடன் பேச்சுவார்த்தை மூலமே பிரச்சினைகளைத் தீர்க்க விரும்புவதாக ரூபியோ தெரிவித்துள்ளார். மேலும், வாய்ப்பு கிடைத்தால் ஈரானின் உச்சத் தலைவர் அயதுல்லா அலி கமேனியை நேரடியாகச் சந்திக்கவும் கூட அதிபர் டொனால்ட் டிரம்ப் தயாராக இருப்பதாகவும் அவர் தெரிவித்தார்.

அமெரிக்க ஊடகத்திடம் பேசிய ரூபியோ, சர்வதேச மோதல்களை எப்படித் தீர்க்கலாம் என்பது குறித்து டிரம்ப் தொடர்ந்து ஆலோசனை நடத்துவதாகத் தெரிவித்தார். மேலும், எதிரிகளை நேரடியாகச் சந்திப்பது பிரச்சினையைத் தீர்க்கத் தானே தவிர, இந்தச் சந்திப்பு நடப்பதாலேயே டிரம்ப்பை பலவீனமாகக் கருதிவிட முடியாது என்றும் அவர் தெரிவித்தார்.

டிரம்ப் தயார்

இது தொடர்பாக ரூபியோ மேலும் கூறுகையில், "பிரச்சினைகளைத் தீர்க்க நமது அதிபர் யாரையும் சந்திக்கத் தயாராக இருக்கிறார். அயதுல்லா கமேனியை கூட நேரில் சந்திக்க டிரம்ப் தயாராகவே இருக்கிறார். இதை நான் மிகவும் உறுதியாகக் கூறுவேன். மீட்டிங்கிற்கு ரெடி என்பதாலேயே அயதுல்லா சொல்வதை டிரம்ப் ஏற்கிறார் என்று பொருள் இல்லை. மாறாக உலகப் பிரச்சினைகளைத் தீர்க்கும் வழி அது என்று டிரம்ப் கருதுவதால் அவர் எதற்கும் தயாராகவே இருக்கிறார்" என்றார்.

ராணுவம் குவிக்கப்பட்டது ஏன்

ஈரானைச் சுற்றிலும் அமெரிக்கா தனது ராணுவ பலத்தை அதிகரித்து வருகிறது. இதனால் பதற்றம் அதிகரித்து வரும் சூழலில் ரூபியோ இந்தக் கருத்துக்களைக் கூறியுள்ளார். ஈரான் மீது அமெரிக்கா தாக்குதல் நடத்தாது என தெரிவித்த ரூபியோ, ஈரானின் தாக்குதல்களைத் தடுக்கவே அமெரிக்கப் படைகள் களமிறக்கப்பட்டுள்ளதாகத் தெரிவித்தார்.. கடந்த காலங்களில் அமெரிக்க இலக்குகள் மீது ஈரான் தாக்குதல் நடத்த முயன்றுள்ளதைச் சுட்டிக்காட்டிய ரூபியோ, மீண்டும் அதுபோன்ற முயற்சிகளைத் தடுக்கவே அமெரிக்கப் படைகள் அங்கு இருப்பதாகத் தெரிவித்தார்.

அவர் மேலும், "ஈரான் வசம் அணு ஆயுதங்கள் செல்லக்கூடாது என்பதில் அமெரிக்கா உறுதியாக இருக்கிறோம். மத்திய கிழக்கு பிராந்தியத்தில் அமைதியை உறுதி செய்ய இது அவசியம். ஈரானுடன் பேச்சுவார்த்தை மூலம் உடன்பாடு எட்ட டிரம்ப் உறுதியாக இருக்கிறார். டிரம்ப் எப்போதுமே பிரச்சனைகளை ஒரு ஒப்பந்தத்தின் மூலம் முடிவுக்குக் கொண்டுவரவே விரும்புவார்" என்றார்.

சீனா

கனடா பிரதமர் மார்க் கார்னி, பிரிட்டன் பிரதமர் கீர் ஸ்டார்மர் ஆகியோர் சமீபத்தில் சீனா சென்றிருந்தனர். அமெரிக்க நேச நாடுகள் சீனாவுடன் நெருங்குவது குறித்த கேள்விக்கு ரூபியோ, "இவை டிரம்ப்பின் பலவீனத்தைக் காட்டவில்லை. உலக நாடுகளுக்கு இடையே ராஜதந்திர உறவுகள் இயல்பானவை, அவசியமானவை! எனவே, இதைப் பிரச்சினைகளாகப் பார்க்க வேண்டிய அவசியமில்லை" என்றார்.

English summary

Trump says he’s willing to meet Ayatollah Khamenei directly for a diplomatic Iran agreement(ஈரான் தலைவரை சந்திக்கும் டிரம்ப்): Donald Trump on Iran latest news in tamil.