அமெரிக்க அதிபர் ஜோ பைடனுக்கு கேன்சரா? அதிர வைக்கும் காரணம்! குணமடைந்ததாக வெள்ளை மாளிகை விளக்கம்
வாஷிங்டன்: அமெரிக்க அதிபர் ஜோ பைடன் தனக்கு கேன்சர் நோய் இருப்பதாக பேசும் வீடியோ வெளியாகி பெரும் பரபரப்பை ஏற்படுத்தி இருக்கும் நிலையில், அது குறித்து வெள்ளை மாளிகை விளக்கம் அளித்து இருக்கிறது.
உலகம் முழுவதும் பருவ நிலை மாற்றம் பிரச்சனைகள் பூதாகரமாகி இருக்கும் நிலையில் அதனை கட்டுப்படுத்தும் பணிகளில் அமெரிக்க அரசு தீவிரமாக இறங்கி வருகிறது.
அமெரிக்காவின் மாசசூசெட்ஸ் மாகாணத்தில் உள்ள சோமர்செட் பகுதியில் பருவ நிலை மாற்றத்தை கையாள்வது தொடர்பாக அங்கு வந்த நிலக்கரி சுரங்கத்தை ஆய்வு செய்ய அதிபர் ஜோ பைடன் சென்றார்.
கேன்சர் பாதிப்பு
அப்போது பேட்டியளித்த ஜோ பைடன், எண்ணெய் சுத்திகரிப்பு நிலையங்களால் ஏற்படும் பாதிப்புகள் குறித்து பேசினார். அப்போது, "என்ன செய்வதென்றே தெரியாமல் அம்மா எங்களை வளர்த்தார். எண்ணெய் சுத்திகரிப்பு நிலையங்களின் கழிவுகள் எங்கள் வீட்டு ஜன்னல்களில் ஒட்டிக்கொள்ளும். அதை துடைக்க வைபர்களை ஜன்னலில் வைத்திருக்க வேண்டும். அதனால்தான் நான் மற்றும் பலர் கேன்சருடன் வளர்ந்தோம். நாட்டிலேயே டெலாவர் பகுதியை சேர்ந்தவர்களுக்கு கேன்சர் பாதிப்பு அதிகம்." என்றார்.
சமூக வலைதளங்கள்
ஜோ பைடனின் இந்த பேச்சு சமூக வலைதளங்களிலும், அமெரிக்கா மட்டுமின்றி சர்வதேச அரங்கிலும் பரபரப்பை ஏற்படுத்தியது. பலரும் ஜோ பைடன் உடல் நலம்பெற வேண்டும் என்று சமூக வலைதளங்களில் கருத்துக்களை பதிவிட தொடங்கினர். அதிபருக்கு கேன்சர் பாதிப்பு இருப்பதை இதுவரை வெளியிடாமல் இருந்தது ஏன் என்று சமூக வலைதளங்களில் பலர் கேள்விகளை முன்வைத்தனர்.
வெள்ளை மாளிகை விளக்கம்
இந்த விவகாரம் அரசியல் வட்டாரத்தில் பெரும் குழப்பத்தை ஏற்படுத்தியதை தொடர்ந்து அமெரிக்க வெள்ளை மாளிகை இது குறித்து விளக்கம் அளித்து இருக்கிறது. அதில், அமெரிக்க அதிபர் ஜோ பைடனுக்கு முன்பு தோல் புற்றுநோய் பாதிப்பு இருந்ததாகவும், கடந்த ஆண்டு ஜனவரி மாதம் அவர் அதிபராக பதவியேற்பதற்கு முன்பாகவே முறையான சிகிச்சை பெற்று அவர் அதிலிருந்து குணமடைந்துவிட்டதாகவும் தெரிவிக்கப்பட்டு உள்ளது.
உடல்நிலை
ஜோ பைடனுக்கு ஏற்பட்ட தோல் புற்றுநோய் காரணமாக அலர்ஜி போன்ற சில பிரச்சனைகள் ஏற்படும் என்றும், அதற்கு சில சிகிச்சைகளை அவர் மேற்கொண்டு வருவதாகவும் தெரிவித்துள்ள வெள்ளை மாளிகை, 78 வயதாகும் அதிபர் ஜோ பைடன் நல்ல உடல் நலத்துடன் இருப்பதாகவும், அதிபராக தனது பணிகளை ஆற்றுவதில் அவருக்கு எவ்விதமான பிரச்சனைகளும் இல்லை எனவும் கூறப்பட்டு உள்ளது.
Click it and Unblock the Notifications
Sign in with Google