இந்தியாவுக்கான அமெரிக்க தூதர் ஆகிறாரா லாஸ் ஏஞ்சல்ஸ் மேயர்?.. ஜோ பிடன் பரிந்துரை

வாஷிங்டன்: இந்தியாவுக்கான அமெரிக்கா தூதராக லாஸ் ஏஞ்செல்ஸ் நகரின் மேயராக உள்ள எரிக் கார்சேட்டியின் பெயரை அமெரிக்க அதிபர் ஜோ பிடன் பரிந்துரை செய்துள்ளார்.

அமெரிக்காவில் புதிய அதிபராக ஜோ பிடன் பொறுப்பேற்ற பின்னர் நிர்வாக ரீதியில் பல மாற்றங்கள் நிகழ்ந்துள்ளன. அந்த வகையில் இந்தியாவுக்கான அமெரிக்க தூதரும் தற்போது புதிதாக நியமிக்க ஆயத்த பணிகள் நடைபெறுகின்றன.

டொனால்ட் டிரம்ப் அதிபராக இருந்த போது இந்தியாவுக்கான அமெரிக்க தூதராக இருந்தவர் கென்னத் ஜஸ்தர். இவர் கடந்த வாரம் முதல் வெளியுறவு துறை அதிகாரியாக நியமிக்கப்பட்டுள்ளார்.

இந்த நிலையில் தூதர் பதவிக்கு எரிக் கார்சேட்டியை (50) அதிபர் ஜோ பிடன் பரிந்துரை செய்துள்ளார். இதற்கு செனட் உறுப்பினர்கள் ஒப்புதல் அளித்த பின்னர் எரிக் தூதராக நியமிக்கப்படுவார்.

இவர் லாஸ் ஏஞ்சல்ஸ் நகரத்தின் மேயராக கடந்த 2013 ஆம் ஆண்டு முதல் பதவி வகித்து வருகிறார். இதுகுறித்து கார்சேட்டி நேற்று வெளியிட்ட அறிக்கையில் கூறுகையில் இந்தியாவுக்கான அமெரிக்க தூதராக என்னை அதிபர் ஜோ பிடன் பரிந்துரை செய்துள்ளார்.

அவரது பரிந்துரையை ஏற்று இந்த பணியில் சேவையாற்ற நான் விரும்புகிறேன். நான் லாஸ் ஏஞ்சல்ஸை மிகவும் நேசிக்கிறேன். நான் உங்கள் மேயர் என்ற எண்ணத்துடன் தினமும் எனது பணியை தொடங்குகிறேன் என தெரிவித்துள்ளார்.

English summary

US President nominates Eric Garcetti as his envoy to India. He was Los Angeles Mayor.