நடக்க முடியாமல் தடுமாறிய அமெரிக்க அதிபர்.. மனைவியால் தப்பிய ஜோ பைடன்
வாஷிங்டன்: அமெரிக்க அதிபர் ஜோ பைடன் பீச்சில் நடக்க முடியாமல் தவித்தார். கால்தவறி கீழே விழும் நிலைக்கு சென்ற நிலையில் பக்கத்தில் இருந்த அவரது மனைவி ஜில் பைடன் அவருக்கு உதவி செய்தார்.
அமெரிக்க அதிபர் தேர்தல் நடந்து முடிந்துள்ளது. இந்த தேர்தலில் ஜனநாயக கட்சி சார்பில் தற்போதைய துணை அதிபர் கமலா ஹாரிஸ் போட்டியிட்டார். குடியரசு கட்சி சார்பில் முன்னாள் அதிபர் டொனால்ட் டிரம்ப் போட்டியிட்டார்.
கடந்த 5ம் தேதி அமெரிக்க அதிபர் தேர்தல் நடந்து முடிந்தது. அதன்பிறகு ஓட்டுகள் எண்ணப்பட்டு முடிவுகள் அறிவிக்கப்பட்டது. இதில் கமலா ஹாரிசை வீழ்த்தி டொனால்ட் டிரம்ப் வெற்றி பெற்றார்.
டொனால்ட் டிரம்ப் 2025 ஜனவரி மாதம் 20ம் தேதி அமெரிக்காவின் புதிய அதிபராக பொறுப்பேற்க உள்ளார். அதுவரை ஜோ பைடன் தான் அதிபராக தொடர உள்ளார். முன்னதாக இந்த தேர்தலில் ஜோ பைடன் தான் மீண்டும் ஜனநாயக கட்சி சார்பில் போட்டியிட தயாரானார்.
ஆனால் அவருக்கு 81 வயது ஆனது மற்றும் உடல்நல குறைபாடு உள்ளிட்டவற்றால் ஜோ பைடன் போட்டியில் இருந்து விலகும் நிலைக்கு தள்ளப்பட்டார். அவர் விலகியதை தொடர்ந்து தான் கமலா ஹாரிஸ் ஜனநாயக கட்சி சார்பில் போட்டியிட்டு டொனால்ட் டிரம்பிடம் தோல்வியடைந்துள்ளார்.
இந்நிலையில் தான் அதிபர் தேர்தல் முடிவடைந்த நிலையில் ஜோ பைடன் தனது மனைவி ஜில் பைடனுடன் டெல்வாரில் பீச்சில் உள்ள வீட்டில் தங்கியிருந்தார். அதன்பிறகு அவர்கள் அங்குள்ள ரெகோபாத் பீச்சில் நேரம் செலவிட்டனர். ஜோ பைடன் தனது மனைவி ஜில் பைடனுடன் பீச்சில் நேற்று நடந்து சென்றார்.
அப்போது ஜோ பைடனால் பீச் மணலில் நடந்து செல்ல முடியவில்லை. அவர் நிலைத்தடுமாறினார். இதை கவனித்த ஜில் பைடன் அவரது கையை தாங்கிப்பிடித்தார். இதனால் ஜோ பைடன் கீழே விழாமல் தப்பித்தார். இதுதொடர்பான வீடியோ தற்போது இணையதளங்களில் வெளியாகி வேகமாக பரவி வருகிறது. பலரும் ஜோ பைடன் தவறி விழப்போனதை நினைத்து கவலை தெரிவித்து வருகின்றனர்.
மேலும் ஜோ பைடன் விரைவில் டொனால்ட் டிரம்பிடம் அதிபர் பதவியை ஒப்படைக்க உள்ளார். இதையொட்டி முதற்கட்டமாக நாளை மறுநாள் (நவம்பர் 13ம் தேதி) டொனால்ட் டிரம்ப் மற்றும் ஜோ பைடன் ஆகியோர் சந்தித்து பேச உள்ளனர். அரசியலில் இருவரும் எதிரெதிர் துருவங்களாக உள்ள நிலையில் அவர்களின் சந்திப்பு என்பது பெரும் எதிர்பார்ப்பை ஏற்படுத்தி உள்ளது.
Click it and Unblock the Notifications
Sign in with Google