டிரம்பை கண்டு பயமா? அமெரிக்க அதிபர் தேர்தலில் டுவிஸ்ட்! பேக் அடித்த முன்னாள் துணை அதிபர் பென்ஸ்

வாஷிங்டன்: அமெரிக்க அதிபர் தேர்தலில் குடியரசு கட்சியின் வேட்பாளருக்கான போட்டியில் இருந்து விலகுவதாக முன்னாள் துணை ஜனாதிபதி மைக் பென்ஸ் தெரிவித்து உள்ளார்.

உலகின் மிகப்பெரிய வல்லரசு நாடான அமெரிக்கவில் 4 ஆண்டுகளுக்கு ஒரு முறை அதிபர் தேர்தல் நடத்தப்பட்டு வருவது வழக்கம். அந்த வகையில், கடந்த 2020 ஆம் ஆண்டு நவம்பர் மாதம் நடைபெற்ற அமெரிக்க அதிபர் தேர்தலில் குடியரசு கட்சி சார்பில் போட்டியிட்ட முன்னாள் அதிபர் டொனால்டு டிரம்பை வீழ்த்தி ஜனநாயக கட்சி வேட்பாளர் ஜோ பைடன் வெற்றி பெற்றார். ஜோ பைடன் தலைமையிலான 4 ஆண்டுகால ஆட்சி அடுத்த ஆண்டுடன் முடிவுக்கு வருகிறது.

வரும் 2024 ஆம் ஆண்டு நவம்பர் மாதம் அமெரிக்க அதிபர் தேர்தலுக்கான வாக்குப்பதிவு நடைபெற உள்ளது. அதிபர் ஜோ பைடனும் இந்த தேர்தலில் போட்டியிட உள்ளதாக அறிவித்து உள்ளார். மறுபக்கம் டொனால்டு டிரம்பும் இதில் போட்டியிட உள்ளதாக தெரிவித்து இருக்கிறார். அதேபோல், டொனால்ட் டிரம்பின் ரிபப்ளிக் கட்சியில் அதிபர் வேட்பாளருக்கான போட்டியில் பலர் இறங்கி இருக்கின்றனர்.

டொனால்டு டிரம்பை தவிர்த்து நிக்கி ஹாலே, அமெரிக்க முன்னாள் துணை ஜனாதிபதி மைக் பென்ஸ், டிம் ஸ்காட், ரான் டி சாண்டிஸ், அர்கன்சாஸ் முன்னாள் ஆளுநர் அசா ஹட்சின்சன், வலதுசாரி ரேடியோ பிரபலம் லாரி எல்டர், தொழிலதிபரும், இந்திய வம்சாவளியுமான விவேக் ராமசாமி உள்ளிட்டோர் பெயர்களும் குடியரசு கட்சியின் அதிபர் வேட்பாளர் போட்டியில் உள்ளன. ஆனால், டொனால்டு டிரம்பே அதிபர் வேட்பாளராக தேர்வு செய்யப்பட உள்ளதாக தகவல்கள் தெரிவிக்கின்றன.

இவருக்கு போட்டியாக பார்க்கப்பட்டவர் மைக் பென்ஸ். டிரம்ப் அமெரிக்க அதிபராக இருந்தபோது அவரது நம்பிக்கைக்குரிய தளபதியாக செயல்பட்டவர்தான் இந்த பென்ஸ். 63 வயதான மைக் பென்ஸ், டொனால்ட் டிரம்பின் நம்பிக்கைக்குரிய கரமாக இருந்தவர். கடந்த 2021 ஆம் ஆண்டு டிரம்பின் ஆதரவாளர்கள் கும்பலாக அமெரிக்காவின் வெள்ளை மாளிகையின் முன் நிகழ்த்திய தாக்குதலின்போது அவர்கள் மைக் பென்ஸுக்கு அவர்கள் கொலை மிரட்டல் விடுத்தது பெரும் பரபரப்பை ஏற்படுத்தியது.

ரேடியோ ஜாக்கியாக இருந்த மைக் பென்ஸ், அமெரிக்காவின் குரலாக மாறுவாரா? என்ற பேச்சு இருந்து வந்த நிலையில் திடீரென அதிபர் தேர்தலில் குடியரசு கட்சி வேப்டாளருக்கான போட்டியில் இருந்து விலகுவதாக அறிவித்து இருக்கிறார் மைக் பென்ஸ். அமெரிக்காவின் லாஸ் வேகாசில் குடியரசுக் கட்சியின் யூத கூட்டணி கூட்டத்தில் பேசிய அவர், "தொடர் பிரார்த்தனை மற்றும் ஆலோசனைக்கு பிறகே என்னுடைய பிரச்சாரத்தை இன்றுடன் நிறுத்த முடிவு செய்து இருக்கிறேன். இது எனக்கு தெளிவாகி இருக்கிறது." என்றார்.

English summary

Former Vice President Mike Pence has announced that he is withdrawing from the race for the Republican Party's presidential nomination.