அமெரிக்காவில் தீபாவளிக்கு பொது விடுமுறை... நாடாளுமன்றத்தில் மசோதா தாக்கல்..!

வாஷிங்டன்: தீபாவளி பண்டிகை அன்று அமெரிக்காவில் பொதுவிடுமுறை அளிப்பது குறித்த மசோதா அந்நாட்டு நாடாளுமன்றத்தில் தாக்கல் செய்யப்பட்டுள்ளது.

உறுப்பினர்களின் எதிர்ப்பின்றி இந்த மசோதா நிறைவேற்றப்பட்டால் அமெரிக்காவிலும் இனி தீபாவளி அன்று பொது விடுமுறை அமலுக்கு வரும்.

அமெரிக்க காங்கிரஸ் எம்.பியும் இந்திய வம்சாவளியை சேர்ந்தவருமான ராஜா கிருஷ்ணமூர்த்தி இந்த மசோதாவை முன் மொழிந்துள்ளார். தீபாவளி பண்டிகையின் வரலாறு, முக்கியத்துவம், சமயக் கலாச்சாரம் உள்ளிட்டவைகள் குறித்தெல்லாம் அந்த மசோதாவில் விரிவாக சுட்டிக்காட்டப்பட்டுள்ளது.

தீபாவளியின் மகத்துவத்தையும், முக்கியத்துவத்தையும் அங்கீகரிப்பதற்கான இந்த மசோதாவை முன்மொழிவதிலும், அறிமுகப்படுத்துவதிலும் தாம் மகிழ்ச்சி கொள்வதாக ராஜா கிருஷ்ணமூர்த்தி தெரிவித்துள்ளார்.

வரலாற்று முக்கியத்துவம் வாய்ந்த இந்த மசோதாவை அமெரிக்க காங்கிரஸ் பெண் எம்.பி., கரோலின் மலோனி என்பவர் அமெரிக்க நாடாளுமன்றத்தில் தாக்கல் செய்திருக்கிறார். அமெரிக்காவில் வாழும் 40 லட்சத்துக்கும் மேற்பட்ட இந்தியர்களின் நலனையும், மகிழ்ச்சியையும் கருத்தில் கொண்டு இந்த மசோதாவை தாக்கல் செய்திருப்பதாக அவர் கூறியிருக்கிறார்.

இதனிடையே கடந்த 2016-ம் ஆண்டு அமெரிக்காவில் தீபாவளி குறித்த சிறப்பு தபால் தலை வெளியிடப்பட்டது கவனிக்கத்தக்கது. அமெரிக்காவில் தீபாவளி பண்டிகை கொண்டாடும் இந்தியர்கள் தங்கள் பக்கத்து வீட்டினரையும், நண்பர்களையும் வீடுகளுக்கு அழைத்து தீபாவளி இனிப்புகளை பரிமாறி பண்டிகையின் வரலாற்றை விவரிக்கின்றனர்.

கடந்த ஆண்டு அமெரிக்காவின் முக்கிய அடையாளங்களில் ஒன்றாக விளங்கும் எம்பயர் ஸ்டேட் கட்டிடம் முழுவதும் வண்ண விளக்குகளால் அலங்கரிக்கப்பட்டு தீபாவாளி வாழ்த்து தெரிவிக்கப்பட்டது குறிப்பிடத்தக்கது. அமெரிக்க துணை அதிபராக கமலா ஹாரிஸ் உள்ளதாலும், இந்தியர்கள் மீது தனி அன்பு கொண்டுள்ள ஜோ பிடன் அதிபராக உள்ளதாலும் இந்த மசோதாவுக்கு அமெரிக்க நாடாளுமன்றத்தின் ஒப்புதல் கிடைத்துவிடும் என எதிர்பார்க்கப்படுகிறது.

English summary

Us Congress Mp's inroduced bill about Diwali holiday in america