அமெரிக்க அதிபர் தேர்தல்.. இறங்கி வந்த ஜோ பைடன்.. போட்டியில் இருந்து விலகுவதாக அதிரடி அறிவிப்பு
வாஷிங்டன்: அமெரிக்க அதிபர் தேர்தலில் இருந்து ஜோ பைடன் விலகுவதாக அறிவித்துள்ளார். ஜனநாயக கட்சி சார்பில் மீண்டும் போட்டியிடுவேன் பிடிவாதமாக கூறி வந்த நிலையில் தற்போது இந்த அறிவிப்பை வெளியிட்டுள்ளார்.
அமெரிக்க அதிபர் தேர்தல் போட்டியில் இருந்து ஜோ பைடன் விலகுவதாக அறிவித்துள்ளார். ஜனநாயக கட்சி சார்பில் அவர் போட்டியிட இருந்த நிலையில் தொடர் அழுத்தங்களால் இந்த முடிவை எடுத்துள்ளார்.
அமெரிக்காவில் 4 ஆண்டுக்கு ஒருமுறை அதிபர் தேர்தல் நடந்து வருகிறது. கடந்த 2020ம் ஆண்டு இறுதியில் நடந்த தேர்தலில் அதிபராக இருந்த குடியரசு கட்சியின் டொனால்ட் டிரம்பை ஜனநாயக கட்சியின் ஜோ பைடன் வெற்றி பெற்றார். ஜோ பைடன் அதிபராக செயல்பட்டு வரும் நிலையில் அவரது பதவிக்காலம் என்பது விரைவில் முடிவுக்கு வர உள்ளது.
இந்நிலையில் தான் இந்த ஆண்டு இறுதியில் மீண்டும் அமெரிக்க அதிபர் தேர்தல் நடைபெற உள்ளது. இந்த தேர்தலில் மீண்டும் டொனால்ட் டிரம்ப் களமிறங்குகிறார். அவர் குடியரசு கட்சி சார்பில் தேர்தலில் போட்டியிட உள்ளார். அதேபோல் வரும் அதிபர் தேர்தலில் மீண்டும் ஜோ பைடன் களமிறங்குவதில் ஆர்வம் காட்டினார். மீண்டும் ஜனநாயக கட்சி சார்பில் அதிபர் வேட்பாளராக போட்டியிடுவேன் என பிடிவாதமாக இருந்தார்.
ஆனால் ஜோ பைடனுக்கு இப்போது 81 வயது ஆகிறது. அதோடு அவர் அவ்வப்போது உடல்நலக்குறைவால் பாதிக்கப்பட்டு வருகிறார். இதனால் அவர் போட்டியிட வேண்டாம் என்று ஜனநாயக கட்சியினர் வலியுறுத்தி வந்தனர். ஆனால் ஜோ பைடன் போட்டியிடுவதில் உறுதியாக இருந்தார். ஆனால் அழுத்தம் அதிகரிக்கவே அதிபர் தேர்தலுக்கான போட்டியில் இருந்து விலகுவதாக ஜோ பைடன் அறிவித்துள்ளார். இது தொடர்பாக தனது எக்ஸ் தளத்தில் ஜோ பைடன் கூறியுள்ளார்.
இது தொடர்பாக தனது எக்ஸ் தளத்தில் ஜோ பைடன் கூறியிருப்பதாவது:- அமெரிக்க அதிபராக நான் பணியாற்றுவது என் வாழ்நாளில் எனக்கு கிடைத்த மிகப்பெரிய கவுரவமாக கருதுகிறேன். அதிபர் தேர்தலில் மீண்டும் போட்டியிடுவது எனது எண்ணமாக இருந்தாலும், தேர்தல் போட்டியில் இருந்து விலகுகிறேன். மீதமுள்ள எனது பதவிக்காலத்தை நிறைவேற்றுவதில் தீவிர கவனம் செலுத்துவேன்.
நான் எடுத்த முடிவு ஜனநாயக கட்சி மற்றும் நாட்டின் நலன் சார்ந்து எடுத்தது ஆகும். எனது இந்த முடிவு தொடர்பாக விரைவில் விரிவாக பேசுவேன். நான் மீண்டும் அதிபராக வேண்டும் என ஆதரவு தெரிவித்த அனைவருக்கும் நன்றி. என் மீது அமெரிக்க மக்கள் வைத்த நம்பிக்கைக்கு நன்றியை தெரிவித்துக் கொள்கிறேன். என்னுடன் இணைந்து சிறப்பாக பணியாற்றிய துணை அதிபர் கமலா ஹாரிஸுக்கு நன்றி.
கடந்த 2020 ஆம் ஆண்டு ஜனநாயக கட்சியின் அதிபர் வேட்பாளராக நான் அறிவிக்கப்பட்டதும் துணை அதிபர் வேட்பாளராக கமலா ஹாரிசையே தேர்வு செய்தேன். ஜனநாயக கட்சியின் அதிபர் வேட்பாளராக கமலா ஹாரிசுக்கு எனது முழு ஆதரவை வழங்க விரும்புகிறேன். ஜனநாயக கட்சியினர் அனைவரும் ஒன்று கூடி டொனால்டு ட்ரம்பை வீழ்த்த வேண்டும்" என பதிவிட்டுள்ளார்.
Click it and Unblock the Notifications
Sign in with Google