அமெரிக்க அதிபர் தேர்தல்.. ஜனநாயக கட்சியின் அதிபர் வேட்பாளர் கமலா ஹாரிஸ்? ஜோ பைடன் ஆதரவு

Updated: Monday, July 22, 2024, 0:16 [IST]

Subscribe to Oneindia Tamil

வாஷிங்டன்: அமெரிக்க அதிபர் தேர்தலில் ஜனநாயக கட்சியின் வேட்பாளராக கமலா ஹாரிஸ் போட்டியிட ஜோ பைடன் ஆதரவு தெரிவித்துள்ளார். அமெரிக்க அதிபர் தேர்தலில் இருந்து ஜோ பைடன் விலகுவதாக அறிவித்துள்ள நிலையில் கமலா ஹாரிசுக்கு ஆதரவு தெரிவித்துள்ளார்.

அமெரிக்க அதிபர் தேர்தல் வரும் நவம்பர் மாதம் நடைபெற உள்ளது. இந்த தேர்தலில் குடியரசுக்கட்சி சார்பில் டொனால்டு ட்ரம்ப் போட்டியிடுகிறார். ஜனநாயக கட்சி சார்பில் தற்போதைய அதிபர் ஜோ பைடன் போட்டியிட ஆர்வம் காட்டினார். ஆனால் பிரசாரத்தில் தடுமாறியது.. வயது முதிர்வு காரணமாக நியாபக மறதி என பல சிக்கல்களை ஜோ படைன் எதிர்கொண்டார்.

இதனால், அதிபர் தேர்தலில் ஜோ பைடன் போட்டியிட எதிர்ப்பு கிளம்பியது. ஆனால், போட்டியில் இருந்து விலக மாட்டேன் என ஜோ பைடன் பிடிவாதமாக இருந்தார். ஜோ பைடனுக்கு இப்போது 81 வயது ஆகிறது. அதோடு அவர் அவ்வப்போது உடல்நலக்குறைவால் பாதிக்கப்பட்டு வருகிறார். இதனால் அவர் போட்டியிட வேண்டாம் என்று ஜனநாயக கட்சியினர் விருப்பம் தெரிவித்தனர்.

ஜனநாயக கட்சியின் முன்னாள் அதிபர் பராக் ஒபாமா கூட ஜோ பைடன் விலக வேண்டும் எனக் கூறினார். அவர் கூறுகையில் ‛‛ஜோ பைடனின் வெற்றி பெறும் தன்மை என்பது குறைந்து விட்டது. இதனால் அவர் வெற்றி பெற முடியுமா? என்பதையும், தேர்தலில் போட்டியிடுவது பற்றியும் மறுபரிசீலனை செய்ய வேண்டும்'' எனக் கூறினார். ஜோ பைடனின் குடும்பத்தினரும் அவர் போட்டியில் இருந்து விலக வேண்டும் என கூறியதாக சொல்லப்பட்டது.

இந்த நிலையில் ஜோ பைடன் தனது முடிவில் இருந்து இறங்கி வந்து அதிபர் போட்டியில் இருந்து விலகுவதாக அறிவித்து இருக்கிறார். இதனால், ஜனநாயக கட்சி சார்பில் அதிபர் வேட்பாளராக யார் களமிறங்குவார் என்ற எதிர்பார்ப்பு ஏற்பட்டது. இந்த நிலையில் கமலா ஹாரிசை அதிபர் வேட்பாளாரக நியமிக்க ஜோ பைடன் ஆதரவு தெரிவித்துள்ளார்.