சீனாவை எங்களால் அழிக்க முடியும்.. பகிரங்கமாக மிரட்டிய டிரம்ப்.. இரு வல்லரசுகள் இடையே முற்றும் மோதல்

வாஷிங்டன்: அமெரிக்க அதிபர் டொனால்ட் டிரம்பின் வரி விதிப்பால் நம் நாடும், சீனாவும் கைகோர்த்துள்ளது. இந்நிலையில் தான் ‛‛நாங்கள் நினைத்தால் சீனாவை சிதைக்க முடியும். எங்களிடம் அதற்கான கார்டு உள்ளது. அமெரிக்காவுக்கான அரிய கனிமங்களான ‛மேக்னட்' ஏற்றுமதியை நிறுத்தினால் சீனாவுக்கு 200 சதவீதம் வரி விதிக்கப்படும் என்று டொனால்ட் டிரம்ப் மிரட்டி உள்ளார்.

டொனால்ட் டிரம்ப் அமெரிக்க அதிபரானது முதல் அனைத்து நாடுகளுக்கும் வரிகளை விதித்து வருகிறார். நம் நாட்டுக்கு 50 சதவீத வரியை விதித்துள்ளார். இதில் 25 சதவீத வரி கடந்த 7 ம் தேதி அமலான நிலையில் அடுத்தக்கட்டமாக 25 சதவீத வரி நாளை முதல் செயல்பாட்டுக்கு வர உள்ளது.

அதேபோல் சீனாவுக்கு, டிரம்ப் 145 சதவீத வரிகளை விதித்தார். இதற்கு சீனாவும் பதிலடி கொடுத்தது. அமெரிக்காவுக்கு 135 சதவீத வரியை விதித்தது. அதுமட்டுமின்றி அமெரிக்காவுக்கு அனுப்பி வைக்கும் அரிய வகை கனிமங்களை சீனா குறைத்தது. இதனால் வேறு வழியின்றி டிரம்ப் அடங்கிப்போனார்.

சீனா - அமெரிக்கா மோதல்

சீனாவுக்கு 30 சதவீத வரியை மட்டும் அமல்படுத்தி டிரம்ப் மற்ற வரிகளை நிறுத்தி வைத்தார். சீனாவும், அமெரிக்காவுக்கான வரியை நிறுத்தி வைத்தது. இருப்பினும் இருநாடுகள் இடையேயான பிரச்சனை மட்டும் இன்னும் முடிவுக்கு வரவில்லை. இருநாடுகள் இடையே மோதல் தொடர்ந்து வருகிறது.

சீனாவை மிரட்டும் டிரம்ப்

இதற்கிடையே தான் நம் நாடும், சீனாவும் கைகோர்த்துள்ளது. இருநாடுகள் இடையே எல்லை விஷயத்தில் பிரச்சனைகள் இருந்தாலும் கூட அமெரிக்காவின் வரி விதிப்பால் நம் நாடும், சீனாவும் சேர்ந்து செயல்பட தொடங்கி உள்ளது. இதனை டிரம்பால் பொறுத்து கொள்ள முடியவில்லை. இப்படியான சூழலில் தான், அமெரிக்க அதிபர் டொனால்ட் டிரம்ப், சீனாவை பகிரங்கமாக மிரட்டி உள்ளார்.

சீனாவே சிதைந்து விடும்

இதுதொடர்பாக டொனால்ட் டிரம்ப் கூறுகையில், ‛‛நாங்கள் சீனாவுடன் நல்ல உறவு வைத்துள்ளோம். இந்த ஆண்டு இறுதியில் சீனாவுக்கு செல்ல வாய்ப்புள்ளது. அவர்கள் சில கார்டுகள் உள்ளன. அதை விட எங்களிடம் சிறப்பான கார்டுகள் உள்ளன. ஆனால் அந்த கார்டுகளை நான் இப்போது பயன்படுத்த விரும்பவில்லை. நான் அந்த கார்டுகளை இறக்கினால் சீனா சிதைந்து விடும்.

மேக்னட் தராவிட்டால் 200 சதவீத வரி

சீனா எங்களுக்கு மேக்னட்டுகள் (Magnets) வழங்கி வருகிறது. அரியவகை கனிமங்களை தொடர்ந்து வழங்க வேண்டும். இல்லாவிட்டால் 200 சதவீத வரி விதிக்க வேண்டும். மேக்னட்டை எங்களுக்கு தரவில்லை என்றால் அவர்களுக்கு 200 சதவீத வரி அல்லது வேறு நடவடிக்கை எடுக்கப்படும். இதனால் எங்களுக்கு எந்த பிரச்சினையும் இருக்காது என்று நான் நினைக்கிறேன்'' என மிரட்டி உள்ளார்.

சீன மேக்னட் ஏன் முக்கியம்?

அமெரிக்காவுக்கு சீனாவில் இருந்து அதிகப்படியான அரிய வகை கனிமங்கள் ஏற்றுமதி செய்யப்பட்டு வருகிறது. இந்த கனிமங்கள், அமெரிக்காவின் பாதுகாப்பு துறைகளுக்கு மிகவும் முக்கியமானதாக உள்ளன. அமெரிக்காவின் பல தளவாடங்கள் சீனாவின் அரிய வகை கனிமங்களை வைத்து தான் தயாரிக்கப்பட்டு வருகிறது.

இதனால் அமெரிக்காவுக்கு, சீனாவின் கனிமங்கள் மிகவும் முக்கியமானதாக உள்ளது. அமெரிக்காவுக்கு பதிலடி கொடுக்க சீனா இந்த மேக்னட் உள்பட கனிம வளங்களை நிறுத்த வாய்ப்புள்ளதாக சொல்லப்படும் சமயத்தில் டிரம்ப் இப்படி மிரட்டல் விடுத்துள்ளார்.

English summary

US VS China (அமெரிக்கா VS China )US President Donald Trump warned China, ‛‛They have to give us magnets. It must supply rare earth magnets. If they don't give us magnets, then we have to charge them (a) 200 percent tariff or something. But we're not going to have a problem, I don't think, with that. They have some cards. We have incredible cards, but I don't want to play those cards. If I played those cards, that would destroy China,".