‛ரீப்பிட் தி லைன்’.. டெலிப்ராம்டரால் கேலிக்குள்ளான அமெரிக்க அதிபர் ஜோபைடன்! காலை வாரிய எலான் மஸ்க்

Published: Saturday, July 9, 2022, 9:44 [IST]

Subscribe to Oneindia Tamil

வாஷிங்டன் : அமெரிக்க அதிபர் ஜோபைடன் டெலிப்ராம்டர் பயன்படுத்திய உரையில் தவறு செய்ததால் அதனை உலகின் பெரும் பணக்காரரான எலான் மஸ்க் கிண்டல் செய்துள்ளார்.

அமெரிக்காவில் கருக்கலைப்பு செய்வதற்கான அரசியலமைப்பு உரிமையை அந்நாட்டின் உச்சநீதிமன்றம் சமீபத்தில் ரத்து செய்தது. இதற்கு அமெரிக்க அதிபர் ஜோபைடன் கடும் எதிர்ப்பு தெரிவித்து வருகிறார்.

இந்நிலையில் கருக்கலைப்பு செய்வது தொடர்பாக அமெரிக்க அதிபர் ஜோபைடன் தொலைக்காட்சி மூலம் மக்களிடம் பேசினார்.

டெலிப்ராம்டர் உரையில் தவறு

இந்த உரையின்போது ஜோபைடன் டெலிப்ராம்டரை பயன்படுத்தினார். கருக்கலைப்பு தொடர்பான விஷயம் பற்றி ஜோபைடன் தொடர்ந்து பேசினார். அப்போது எதிர்பாராத விதமாக அவர் ‛Repeat the line' என கூறி மீண்டும் தான் படித்த அதே வரிகளை கூறினார். அதாவது டெலிப்ராம்டர் பயன்படுத்தி பேசும் தலைவர்களுக்காக முக்கியமான வரிகளை இரண்டாவது முறையாக கூறுங்கள் என்பதை நினைவுப்படுத்தும் வகையில் ‛Repeat the line' என டெலிப்ராம்டரில் எழுதப்பட்டு இருக்கும். இதை அறிந்திருந்தாலும் கூட ஜோபைடன் எதிர்பாராத விதமாக ‛Repeat the line' என தனக்கான அறிவுரைகளையே படித்துவிட்டார்.

எலான் மஸ்க் கிண்டல்

தற்போது இதுதொடர்பான வீடியோ சமூக வலைதளங்களில் வேகமாக பரவி வருகிறது. ஜோபைடனை ஏராளமானவர்கள் விமர்சனம் செய்வதோடு, கிண்டலும் செய்கின்றனர். சிலர் அவருக்கு ஆதரவான கருத்துகளை பதிவிட்டு வருகின்றனர். இந்நிலையில் தான் இந்த விஷயத்தில் உலகின் பெரும் பணக்காரரும், டெஸ்லாவின் தலைமைச் செயல் அதிகாரியுமான எலான் மஸ்க் ஜோபைடனை கிண்டல் செய்துள்ளார்.

படத்தின் போட்டோ

ஜோபைடனின் டெலிப்ராம்டர் உரையாடல் தொடர்பான வீடியோவை Greg Price என்பவர் தனது டுவிட்டர் பக்கத்தில் பதிவிட்டுள்ளார். இதற்கு எலான்மஸ்க் பதில் அளித்துள்ளார். அதில் 2004ல் வெளியான ‘ஆங்கர்மேன்: தி லெஜண்ட் ஆப் ரான் பர்கண்டி' எனும் திரைப்படத்தின் ஒரு போட்டோவை அவர் பதிவிட்டுள்ளார். அதில், ‛‛டெலிப்ராம்டரில் எதை எழுதி இருந்தாலும் நம் தலைவர் படித்துவிடுவார்'' என வேடிக்கையாக குறிப்பிடப்பட்டுள்ளது.

கூறியது என்ன?

இந்த படத்தில் கதாநாயகன் டெலிப்ராம்டர் பயன்படுத்தி பேசுவார். முழுவதுமாக டெலிப்ராம்டரை மட்டுமே நம்பும் அவர் அதில் தனது பெயர் மீதே சந்தேகம் எழுப்பும் வகையில் கேள்வி எழுப்பப்பட்டு இருக்கும். அதனை அவர் அப்படியே படித்துவிடுவார். இதனை தான் தற்போது எலான் மஸ்க் உவமையாக குறிப்பிட்டுள்ளார். அதேநேரத்தில், ‛டெலிப்ராம்டரை யார் கட்டுப்படுத்துகிறாரோ அவர் தான் உண்மையான அதிபர்' எனவும் அவர் விமர்சனம் செய்துள்ளார். இதன்மூலம் டெலிப்ராம்டரை யார் பயன்படுத்துகிறாரோ அவர் தான் அமெரிக்க அதிபராக இருக்க முடியும் என பொருள்படும்படி எலான் மஸ்க் குறிப்பிட்டுள்ளார்.

Published On July 9, 2022