Tasqari Review: அயன் படம் பாணியில் ஒரு அசத்தல் வெப் சீரிஸ் டாஸ்கரி! விமர்சனம்

By Oneindia Staff

Updated: Tuesday, January 27, 2026, 16:27 [IST]

Subscribe to Oneindia Tamil

மும்பை: இந்தியத் திரைத்துறையில் 'ஸ்பை த்ரில்லர்' மற்றும் 'க்ரைம்' பாணிகளுக்குப் புத்துயிர் ஊட்டியவர் இயக்குனர் நீரஜ் பாண்டே. ஜனவரி 14 அன்று நெட்ப்ளிக்சில் அவரது புதிய படைப்பான "டாஸ்கரி: தி ஸ்மக்லர்ஸ் வெப்" (Taskaree: The Smuggler's Web) , ஒரு புதிய களத்தை (இந்திய சுங்கத்துறை) கையில் எடுத்து வெளியாகியுள்ளது. நெட்ப்ளிக்சில் தமிழ் டப்பிங்குடன் கிடைக்கிறது.

நீரஜ் பாண்டேவின் படைப்புகள் எப்போதும் ஒரு தனித்துவமான காட்சியமைப்பைக் கொண்டிருக்கும். தொலைக்காட்சி நாடகத்திற்கும், ஓடிடி நளினத்திற்கும் இடைப்பட்ட ஒரு கலவையாக இவரது பாணி இருக்கும். நீண்ட 'டிராக்கிங் ஷாட்கள்', கதாபாத்திரங்கள் பேசாதபோது கூட அவர்களைச் சுற்றிச் சுழலும் கேமரா, பின்னணி இசையின் வேகம் என அனைத்தும் சேர்ந்து ஒரு அறிவுத்திறன் மிக்க கதையைத் பார்ப்பது போன்ற மாயையை உருவாக்குகின்றன.

இதில் குறிப்பிடத்தக்க மற்றொரு அம்சம் 'வண்ணப் பாகுபாடு'. ஐரோப்பா என்றால் நீலம், ஆப்பிரிக்கா என்றால் பச்சை, மத்திய கிழக்கு என்றால் செபியா என வானத்தின் நிறத்தையே மாற்றி ஒரு வண்ணவிளக்கு போலப் பயன்படுத்தும் பாணி இதிலும் தொடர்கிறது.

கதை என்ன?

மும்பை விமான நிலையம் வழியாகத் தங்கம் மற்றும் போதைப் பொருட்கள் கடத்தப்படுவதைத் தடுக்க, ஒரு நேர்மையான அதிகாரிகள் குழு அமைக்கப்படுகிறது. இதில் துணிச்சலான அதிகாரி அர்ஜுன் மீனா (இம்ரான் ஹாஷ்மி), வில்லன் பத்ரா சௌத்ரியின் (சரத் கேட்கர்) கடத்தல் சாம்ராஜ்யத்தை எப்படி அழிக்கிறார் என்பதே கதை.

மத்திய நிதி அமைச்சரின் உத்தரவின் பேரில், நேர்மையான அதிகாரி பிரகாஷ் குமார் (அனுராக் சின்ஹா) ஒரு சிறப்புப் படையை அமைக்கிறார். இதில் விதிகளை மீறும் ஆனால் புத்திசாலியான எஸ்.ஐ. அர்ஜுன் மீனா (இம்ரான் ஹாஷ்மி) மற்றும் அவரது குழுவினர் இணைகிறார்கள். இவர்களுக்கும் கடத்தல் மன்னன் பத்ரா சௌத்ரிக்கும் (சரத் கேட்கர்) இடையிலான பூனை-எலி ஆட்டமே இந்தத் தொடர்.

இம்ரான் ஹாஷ்மியின் 'மறுபிரவேசம்'

நீண்ட இடைவெளிக்குப் பிறகு இம்ரான் ஹாஷ்மி ஒரு வலுவான கதாபாத்திரத்தில் வந்துள்ளார். "கேங்ஸ்டர்" போன்ற படங்களில் நாம் பார்த்த அதே சர்ச்சைக்குரிய நாயகனாக, ஆனால் முதிர்ச்சியுடன் அர்ஜுன் மீனாவாக மிளிர்கிறார். பழைய இம்ரான் ஹாஷ்மியை மீண்டும் பார்த்தது போல இருக்கிறது. அவரது ஸ்டைலான நடையும், புத்திசாலித்தனமான நடிப்பும் தொடருக்குப் பெரிய பலம்.

பலம் மற்றும் பலவீனம்

பலம்: மும்பை விமான நிலைய முனையங்கள், ஓடுபாதைகள் மற்றும் கடத்தல் நுணுக்கங்களை விவரித்த விதம் மிகவும் நம்பகத்தன்மையுடன் உள்ளது. தயாரிப்புத் தரம் மற்றும் கலை இயக்கம் பாராட்டத்தக்கது. விமான நிலையத்தில் அதிகாரிகள் எப்படி வேலை செய்கிறார்கள், கடத்தல்காரர்கள் எப்படித் தப்பிக்கிறார்கள் என்பதை மிகத் தெளிவாகவும், தத்ரூபமாகவும் காட்டியிருக்கிறார்கள். அயன் திரைப்படத்தில் லேசாக தொட்டுச் சென்ற கஸ்டம்ஸ் அலுவல் விஷயங்களை இதில் விலாவாரியாக விவரித்துள்ளார்கள். அது பார்ப்போருக்கு புது அனுபவமாக இருக்கும். மும்பை ஏர்போர்ட் மட்டுமின்றி, அவ்வப்போது கேமரா வெளிநாடுகளை சுற்றி வருவதும் வெப் சீரிசின் பிரமாண்டத்தை அதிகரிக்கிறது.

பலவீனம்: கதையின் இரண்டாம் பாதியில் வரும் யூகிக்கக்கூடிய திருப்பங்கள் மற்றும் 1980-களின் பழிவாங்கும் படங்களைப் போன்ற உணர்ச்சிப்பூர்வமான காட்சிகள் தொடரின் தரத்தைக் குறைக்கின்றன. தேவையில்லாத பாடல்கள், பிளாஷ்பேக் காட்சிகள் மற்றும் ஸ்லோ-மோஷன் காட்சிகள் நிறைய இருப்பதால், கதை மெதுவாக நகர்கிறது. இரண்டு எபிசோடுகளைத் தாராளமாகக் குறைத்திருக்கலாம். ஆரம்பத்தில் புதுமையாகத் தொடங்கும் கதை, போகப் போக பழைய காலத்துச் சினிமா போல "வில்லன் சவால் விடுவது, நாயகன் பழிவாங்குவது" என மாறிவிடுகிறது. சுருக்கமாக: "கடத்தலில் விவரங்கள் அதிகம், ஆனால் கதையில் புதுமை குறைவு."