Idli Podi Recipe: இட்லி பொடியை இப்படி செய்துப் பாருங்க… சட்னி, சாம்பார் கேட்கவே மாட்டாங்க!

Idli Podi Recipe In Tamil: உங்கள் வீட்டில் இட்லி பொடி எப்போதும் இருக்கும். ஆனாலும், சாப்பிடும் போது சட்னி, சாம்பார் இல்லாமல் வீட்டிலுள்ளவர்கள் திருப்தியாக சாப்பிட மாட்டார்களா? அல்லது இட்லி பொடியை விரும்பாமல் விட்டு விடுவார்களா? அப்படியானால், ஒருமுறை இந்த ஸ்பெஷல் முறையில் இட்லி பொடி செய்து பாருங்கள்.

சாதாரணமாக பயன்படுத்தும் வெள்ளை உளுந்துக்கு பதிலாக, கருப்பு உளுந்தை பயன்படுத்தினால், அதில் உள்ள சத்துக்கள் முழுமையாக கிடைக்கும். இதனால் இந்த இட்லி பொடி சுவையில் மட்டுமல்ல, ஆரோக்கியத்திலும் சிறந்ததாக இருக்கும். இப்படி செய்த இட்லி பொடி, இட்லி பொடி பிடிக்காதவர்களுக்குக் கூட பிடித்து, மீண்டும் மீண்டும் கேட்டு சாப்பிட வைக்கும். மேலும், சரியாக சேமித்து வைத்தால் ஒரு மாதம் வரை கெடாமல் இருக்கும்.

இந்த சுவையான மற்றும் சத்தான இட்லி பொடியை எப்படி எளிதாக செய்வது என்று கீழே தெளிவாக பார்க்கலாம்.

தேவையான பொருட்கள்:

கருப்பு உளுத்தம் பருப்பு - 1 கப்
கடலைப் பருப்பு - 1 கப்
வெள்ளை எள்ளு - 1/2 கப்
எண்ணெய் - 1/2 ஸ்பூன் + 1 டீஸ்பூன்
கறிவேப்பிலை - 1 கைப்பிடி
பெருங்காயத் தூள் - 1/4 டீஸ்பூன்
வரமிளகாய் - 25
காஷ்மீரி வரமிளகாய் - 7
பூண்டு - 8 பல்
உப்பு - தேவைக்கு

செய்முறை:

1. முதலில் ஒரு வாணலியை அடுப்பில் வைத்து, கருப்பு உளுத்தம் பருப்பை சேர்த்து பொன்னிறமாக வரும் வரை நன்றாக வறுத்து, ஒரு தட்டில் எடுத்துக் குளிர வைக்கவும்.
2. அதே வாணலியில் கடலைப் பருப்பை சேர்த்து லேசாக நிறம் மாறும் வரை வறுத்து, தனியாக எடுத்து வைக்கவும்.
3. பிறகு வெள்ளை எள்ளை சேர்த்து சற்றே வெடிக்கும் வரை வறுத்து, அதைவும் தனியாக எடுத்து குளிர வைக்கவும்.
4. அடுத்ததாக, அதே வாணலியில் 1/2 டீஸ்பூன் எண்ணெய் சேர்த்து, கறிவேப்பிலையை போட்டு நன்றாக மொறுமொறுப்பாக வறுத்து எடுத்து வைக்கவும்.
5. பின்னர், மீண்டும் வாணலியில் 1 டீஸ்பூன் எண்ணெய் ஊற்றி சூடானதும், வரமிளகாய், காஷ்மீரி மிளகாய், பெருங்காயத் தூள் மற்றும் உப்பு சேர்த்து நன்றாக வறுத்து இறக்கி குளிர வைக்கவும்.
6. அனைத்து வறுத்த பொருட்களும் குளிர்ந்த பின், அவற்றை மிக்சர் ஜாரில் போட்டு, அதனுடன் பூண்டு பற்களையும் சேர்த்து நன்றாக மென்மையாக அரைக்கவும்.
7. அரைத்த பொடியை ஒரு தட்டில் போட்டு முழுமையாக குளிர்ந்ததும், காற்று புகாத டப்பாவில் சேமித்து வைத்துக் கொள்ளவும்.

English summary

Idli Podi Recipe in Tamil (இட்லி பொடி செய்வது எப்படி?): இட்லி பொடிக்கு சாதாரண வெள்ளை உளுந்தை பயன்படுத்தாமல், கருப்பு உளுந்தை பயன்படுத்தும் போது, அதில் உள்ள சத்துக்கள் முழுமையாக கிடைக்கும். முக்கியமாக இப்படி இட்லி பொடியை செய்யும் போது, சுவை பிரமாதமாக இருப்பதோடு, சத்தானதும் கூட. இப்படி இட்லி பொடியை செய்தால், இட்லி பொடி பிடிக்காதவர்களும் கேட்டு விரும்பி சாப்பிடுவார்கள்.