அசைவச் சுவையை மிஞ்சும் ‘முள்ளங்கி’ கோலா உருண்டை! ஒரு முறை இப்படிச் செய்து பாருங்க.. ரகசியம் இதுதான்!

Updated: Friday, January 30, 2026, 18:13 [IST]

Subscribe to Oneindia Tamil

Radish Kofta Balls Recipe in Tamil : பொதுவாகவே முள்ளங்கி என்றாலே பலருக்கு ஒரு வித 'அலர்ஜி' உண்டு. குறிப்பாக குழந்தைகள் முள்ளங்கி சாம்பார் என்றாலே தெறித்து ஓடிவிடுவார்கள். காரணம் அதில் இருந்து வரும் ஒரு வித வாசனை , பலருக்கு பிடிக்காது. ஆனால், அதே முள்ளங்கியை வைத்துக் கொண்டு நாவில் நீர் ஊறும் 'கோலா உருண்டை' செய்ய முடியும் என்பது உங்களுக்குத் தெரியுமா? அதன் வாசனை தெரியாமல், அசைவச் சுவையை மிஞ்சும் வகையில் மொறுமொறுப்பான முள்ளங்கி கோலா உருண்டை செய்வது எப்படி என்று இங்கே பார்ப்போம்.

தேவையான பொருட்கள்:

கோலா உருண்டைக்கு:

1. முள்ளங்கி (2)
2. பொட்டுக்கடலை மாவு (அரை கப்)
3. சின்ன வெங்காயம் (10)
4. சோம்பு (1 டீஸ்பூன்)
5. காய்ந்த மிளகாய் (3)
6. இஞ்சி பூண்டு விழுது (1 டீஸ்பூன்)
7. கறிவேப்பிலை
8. கொத்தமல்லி மற்றும் உப்பு

குழம்பு செய்ய:

1. சின்ன வெங்காயம் (15)
2. தக்காளி (2)
3. பூண்டு (10 பற்கள்)
4. புளி (எலுமிச்சை அளவு)
5. மிளகாய்த்தூள்
6. மல்லித்தூள்
7. மஞ்சள் தூள்
8. தேங்காய் விழுது
9. தாளிக்கத் தேவையான பொருட்கள்

செய்முறை விளக்கம்:

சினிமா திரைக்கதை போல இந்த ரெசிபியிலும் ஒரு முக்கிய திருப்பம் உண்டு. அது தான் முள்ளங்கியைத் தயார் செய்யும் விதம்.

முதலில் முள்ளங்கியை தோல் சீவி துருவி கொள்ள வேண்டும். முள்ளங்கியில் நீர்ச்சத்து அதிகம் என்பதால், துருவிய பின் ஒரு மெல்லிய துணியில் வைத்து அல்லது கைகளால் அழுத்தி நீரை முழுவதுமாகப் பிழிந்து விட வேண்டும். ஈரம் இருந்தால் உருண்டை பிடிக்க வராது, எண்ணெயும் அதிகம் குடிக்கும்.

பிழிந்த முள்ளங்கியுடன் பொடியாக நறுக்கிய சின்ன வெங்காயம், இஞ்சி பூண்டு விழுது மற்றும் கறிவேப்பிலையை சேர்க்கவும். மிக்ஸியில் சோம்பு மற்றும் காய்ந்த மிளகாய் சேர்த்து கொரகொரப்பாக அரைத்து இந்த விழுதையும் அதனுடன் சேர்க்கவும். இப்போது 'பைண்டிங்கிற்காக' பொட்டுக்கடலை மாவைச் சிறுகச் சிறுகச் சேர்த்து பிசைய வேண்டும். ஒரு சொட்டுத் தண்ணீர் கூட ஊற்றக் கூடாது என்பதுதான் இங்கு ரகசியம்.

மாவு உருண்டை பிடிக்கும் பதத்திற்கு வந்ததும், சிறு சிறு உருண்டைகளாக உருட்டி வைக்கவும். வாணலியில் எண்ணெய் காயவைத்து, மிதமான தீயில் (Medium Flame) இந்த உருண்டைகளை பொன்னிறமாக பொரித்து எடுத்தால், மொறுமொறுப்பான முள்ளங்கி கோலா உருண்டை தயார்!

காரசாரமான குழம்பில் கோலா உருண்டை!

இதனை அப்படியே ஸ்நாக்ஸ் போலவும் சாப்பிடலாம், அல்லது காரசாரமான புளிக் குழம்பில் சேர்த்து பரிமாறலாம். சின்ன வெங்காயம், பூண்டு, தக்காளி வதக்கி, புளிக்கரைசல் மற்றும் மசாலா தூள்கள் சேர்த்து நன்கு கொதிக்க விடவும். குழம்பு சுண்டி வரும்போது அரைத்த தேங்காய் விழுதைச் சேர்த்து, இறுதியாகப் பொரித்த உருண்டைகளைப் போட்டு, வாசனை ஆளை தூக்கும் 'முள்ளங்கி கோலா உருண்டை குழம்பு' தயார்.

வீட்டில் உள்ளவர்களுக்கு இது முள்ளங்கியில் செய்தது என்று தெரியாது. அந்த அளவிற்கு இதன் சுவை அபாரமாக இருக்கும்.