ஆருத்ரா தரிசன விழா.. சிதம்பரம் நடராஜர் கோயிலில் கொடியேற்றம்.. 27ல் மகா அபிஷேகம்

கடலூர்: உலகப் புகழ் பெற்ற சிதம்பரம் ஸ்ரீ நடராஜர் கோயிலில் சிவகாமசுந்தரி சமேத நடராஜ மூர்த்தியி சிவகாமசுந்தரி சமேத நடராஜமூர்த்தியின் மார்கழி ஆருத்ரா தரிசன உற்சவ கொடியேற்று விழா இன்று டிசம்பர் 18ஆம் தேதி கோலாகலமாக நடைபெற்றது. 27ஆம் தேதி புதன்கிழமை மார்கழி திருவாதிரை நாளில் மகா அபிஷேகமும் ஆருத்ரா தரிசன விழாவும் நடைபெற உள்ளது.

சைவத் திருத்தலங்களில் முதன்மையான சிதம்பரம் நடராஜர் கோயிலில் ஆண்டுதோறும் மார்கழி மாதம் ஆருத்ரா தரிசனமும், ஆனி மாதம் ஆனித் திருமஞ்சன தரிசனமும் ஆகிய இரு திருவிழாக்கள் தொன்று தொட்டு நடைபெற்று வருகிறது. அதன்படி இந்த ஆண்டுக்கான மார்கழி ஆருத்ரா தரிசன விழா கொடியேற்றம் இன்று காலை நடைபெற்றது.

கொடியேற்றத்தை முன்னிட்டு சிவகாமசுந்தரி சமேத நடராஜ மூர்த்தி சாமிகளுக்கும் சிறப்பு அலங்காரம் செய்யப்பட்டு தீபாராதனை காட்டப்பட்டது. மேளதாளங்கள் முழங்க தேவாரம் திருவாசகம் ஓதப்பட்டது. வேத மந்திரங்கள் முழங்க உற்சவ ஆச்சாரியார் மீனாட்சி நாத தீட்சதர் கோயில் கொடிமரத்தில் கொடியேற்றினார். இதில் ஏராளமான பக்தர்கள் கலந்து கொண்டு சாமி தரிசனம் செய்தனர்.

இதனை தொடர்ந்து நாளைய தினம் சுவாமிகள் வெள்ளி சந்திர பிரபை வாகன வீதி உலா,டிசம்பர் 20ஆம் தேதி தங்க சூரிய பிரபை வாகனத்தில் வீதி உலா, டிசம்பர் 21 தேதி வெள்ளி பூத வாகனத்தில் வீதி உலா, டிசம்பர் 22ஆம் தேதி வெள்ளி ரிஷப வாகனத்தில் தெருவடைச்சான் வீதி உலாவும் நடைபெறும்.

டிசம்பர் 23ஆம் தேதி வெள்ளி யானை வாகன வீதி உலாவும், டிசம்பர் 24ஆம் தேதி தங்க கைலாச வாகன வீதி உலாவும் நடக்கிறது. டிசம்பர் 25ஆம் தேதி தங்க ரதத்தில் பிச்சாடனார் வெட்டுக்குதிரையில் வீதி உலாவும் நடைபெறுகிறது. டிசம்பர் 26 தேதி செவ்வாய்க்கிழமை தேர்த் திருவிழாவும், இரவு 8 மணிக்கு ஆயிரங்கால் முன் முகப்பு மண்டபத்தில் சிவகாமசுந்தரி சமேத நடராஜ மூர்த்தி சுவாமிகளுக்கு ஏககால லட்சார்ச்சனை நடைபெறுகிறது.

டிசம்பர் 27 தேதி புதன்கிழமை அதிகாலை சூரிய உதயத்திற்கு முன்பு காலை 4 மணி முதல் 6 மணி வரை சிவகாமசுந்தரி சமேத நடராஜமூர்த்திக்கு மகாபிஷேகம் நடைபெறுகிறது. பின்னர் காலை 10 மணிக்கு சித்சபையில் ரகசிய பூஜையும், பஞ்சமூர்த்தி வீதி உலா வந்த பின்னர் பிற்பகல் 2 மணிக்கு மேல் ஆருத்ரா தரிசனமும், ஞானகாச சித்சபா பிரவேசமும் நடைபெறுகிறது.

டிசம்பர் 28 தேதி வியாழக்கிழமை பஞ்சமூர்த்தி முத்துப்பல்லக்கு வீதி உலாவுடன் உற்சவம் முடிவடைகிறது. விழா ஏற்பாடுகளை கோயில் பொது தீட்சிதர்கள் செய்து வருகின்றனர். உற்சவ 10 நாட்களும் மாலை 6 மணிக்கு சாயரட்சை பூஜையில் சித்சபை முன்பு மாணிக்கவாசகரை எழுந்தருளிச் செய்து திருவெம்பாவை உற்சவம் நடைபெறுகிறது.

English summary

Sivakamasundari Sametha Nataraja Murthy Sivakamasundari Sametha Nataraja Murthy's Margazhi Arudra Darisana Utsava flag hoisting ceremony was held today 18th December at the world famous Chidambaram Sri Nataraja Temple. The Chariot Festival will be held on Tuesday 26th and the Margazhi Arudra Darshan Festival will be held on Wednesday 27th December 2023.