நெல்லையப்பர் ஆனி திருவிழா..ஜூலை 2ல் திருத்தேரோட்டம்..32 ஆண்டுகளுக்குப் பின் உலா வரும் மரக்கப்பல்

திருநெல்வேலி: நெல்லையப்பர் கோவில் ஆனி பெருந்திருவிழா கொடியேற்றத்துடன் தொடங்கியுள்ளது. ஆசியாவிலேயே அதிக எடை கொண்ட பெரிய தேரான நெல்லையப்பர் தேர் உட்பட 5 தேர் ஓடும் தேரோட்டம் வருகிற 2ஆம் தேதி ஞாயிற்றுக் கிழமை நடைபெற உள்ளது. 32 ஆண்டுகளுக்குப் பிறகு அம்மை-அப்பன் வரலாற்று ஓவியங்கள் அடங்கிய ஆண் பெண் பொம்மைகள் உடன் மரக்கப்பல் வீதிவுலா வர தயார் செய்யப்பட்டுள்ளது.

தமிழகத்தில் பிரசித்தி பெற்ற சிவாலயங்களில் ஒன்றான நெல்லை மாவட்டத்தில் உள்ள சுவாமி நெல்லையப்பர்-காந்திமதி அம்பாள் கோவில் மிகவும் பழமை வாய்ந்தது. முன்னொரு காலத்தில் வேத சர்மா இறைவனுக்கு திருவமுது படைக்க காயப்போட்டிருந்த நெல், மழையினால் நனையாதபடி வேலியிட்டு காத்ததால் இறைவன் நெல்வேலி நாதா் என சிறப்பு பெயா் பெற்று ஊருக்கு திருநெல்வேலி என பெயா் ஏற்பட்டது.

புண்ணிய திருத்தலத்தலமான நெல்லையப்பர் கோவிலில் ஆண்டுதோறும் ஆனி பெருந் திருவிழா 10 நாட்கள்விமர்சையாக நடைபெறும். இந்த ஆண்டுக்கான 517வது ஆனிபெருந்தேர்த் திருவிழா கொடியேற்றம் நேற்று காலை வெகு விமரிசையாக நடைபெற்றது. இதற்காக நேற்று முன்தினம் தங்க பல்லக்கில் அஸ்திரதேவா் புறப்பட்டு அங்கூர விநாயகா் கோவிலில் பிடிமண் எடுத்து வந்து கோவிலில் வைத்து அங்குரார்பணம் என்னும் முளைப்பாலிகை இடுதல் நடைபெற்றது.

நேற்று மாலையில் கொடிப்பட்டம் ரதவீதிகளில் சுற்றிவர, ஆனிப் பெருந்திரு விழாவின் பூர்வாங்க பூஜைகளில் நடைபெற்று கோவில் பெரிய கொடிமரம், பஞ்ச மூர்த்திகள் உள்ளிட்ட பிற மூர்த்திகள் ஆகியோருக்கு காப்புக்கட்டுதலுடன் கூடிய சிறப்பு பூஜைகள் நடைபெற்றன. திருவிழாவின் தொடக்கமாக நேற்று அதிகாலை 4 மணிக்கு கோவில் நடை திறக்கப்பட்டு விஸ்வரூபம், காலை சந்தி பூஜைகள் நடைபெற்றது. கொடிமரம் அருகில் அஸ்திர தேவா் மற்றும் கலசங்களுக்கு மகா மண்டபத்தில் அமைக்கப்பட்டுள்ள யாக சாலையில் ஹோமங்களுடன் பூஜைகள் நடைபெற்றது. சுவாமி-அம்பாள் ஆலய பிரதான கொடிமரத்திற்கு அருகில் எழுந்தருள கொடிப்பட்டத்திற்கு பூஜைகள் நடைபெற்றது.

தொடா்ந்து கொடி மரத்திற்கு 16 வகை பொருட்களால் அபிஷேகங்கள் நடைபெற்று சிறப்பு அலங்காரம் செய்யப்பட்டது. வேத விற்பனா்கள் நான்கு வேதம் கூற ஓதுவா மூர்த்திகள் பஞ்சபுராணம் பாட கொடிமரத்திற்கு நட்சத்திர ஆரத்தி, கோபுர ஆரத்தி, சோடச உபசாரனைகள் நடைபெற்றது. இதில் துணை மேயர் ராஜூ, கவுன்சிலர்கள் கிட்டு, உலகநாதன் மற்றும் ஆயிரக்கணக்கான பக்தர்கள் கலந்து கொண்டு சுவாமி தரிசனம் செய்தனர்.

10 நாட்கள் நடைபெறும் திருவிழாவில் தினமும் சுவாமி-அம்பாள் காலை, மாலை ஆகிய 2 வேளைகளிலும் பல்வேறு வாகனங்களில் எழுந்தருளி பக்தா்களுக்கு காட்சி கொடுத்து ரதவீதிகளில் உலா வரும் நிகழ்வு நடைபெறும். கோவில் கலையரங்கத்தில் தினமும் மாலை சமய சொற்பொழிவு, கர்நாடக இன்னிசை, ஆன்மீக கருத்தரங்கம், பக்தி இன்னிசை கச்சேரி, புராண நாடகம் என பல்வேறு கலை நிகழ்ச்சிகள் நடைபெறும்.

சிகர நிகழ்ச்சியாக, ஆசியாவிலேயே அதிக எடை கொண்ட பெரிய தேரான நெல்லையப்பர் தேர் உட்பட 5 தேர் ஓடும் தேரோட்டம் வருகிற 2ஆம் தேதி ஞாயிற்றுக் கிழமை நடைபெறுகிறது. விழா ஏற்பாடுகளை கோவில் செயல் அலுவலர் அய்யர் சிவமணி மேற் பார்வையில் பணியாளர்கள் செய்து வருகின்றனர்.

ஆனிப்பெருந்திருவிழாவை முன்னிட்டு 32 ஆண்டுகளுக்குப் பிறகு அம்மை-அப்பன் வரலாற்று ஓவியங்கள் அடங்கிய ஆண் பெண் பொம்மைகள் உடன் மரக்கப்பல் வீதிவுலா வர தயார் செய்யப்பட்டுள்ளது. இதனால் அடியார்பெருமக்கள் பக்தர்கள் மகிழ்ச்சி அடைந்துள்ளனர். திருக்கோயில் நிர்வாகத்திற்கும், சிறப்புற அமைய சிரத்தையுடன் பணியாற்றிய அனைவருக்கும்நெல்லை முன்னாள் சேர்மன் வெங்கடசுப்பிரமணியன் நன்றி தெரிவித்தார்.

English summary

Nellaiyapar Temple Aani Month Thiruvizha (நெல்லையப்பர் கோவில் ஆனித் திருவிழா): A 5-chariot race, including the Nellayapar Chariot, which is the heaviest chariot in Asia, will be held on the 2nd Sunday. After 32 years, a wooden ship with male and female puppets containing Ammai-Appan historical paintings is set to sail.