இது சூப்பரா இருக்கே.. இணைய இணைப்பே இல்லாமல் யுபிஐ பணம் அனுப்பலாம்! ஸ்மார்ட்போனும் வேணாம் - எப்படி?

சென்னை: தற்போது பலரும் கையில் பணம் வைத்திருக்காமல் டிஜிட்டல் பரிவர்த்தனை மூலமாகவே பணம் செலுத்தி வரும் சூழலில், இணையதள இணைப்பு இன்றி டிஜிட்டல் பண பரிவர்த்தனை செய்வது எப்படி என்பது பற்றி பார்ப்போம்.

இந்த நவீன டிஜிட்டல் யுகத்தில் பல விசயங்கள் எளிமையாக மாறிவிட்டன. கையில் வைத்திருக்கும் செல்போன் மூலமாகவே அலைச்சல் இல்லாமல் சில நொடிகளில் இருக்கும் இடத்திலேயே பல வேலைகளை மக்கள் முடித்து விடுகின்றனர். குறிப்பாக கையில் பணத்தை எடுத்து செல்லாமல், ஏடிஎம் சென்றும் பணம் எடுக்காமல் வங்கிக் கணக்கில் இருந்தே நேரடியாக யுபிஐ மூலம் சில நொடிகளில் பணம் அனுப்பிவிடுகிறோம்.

அதே நேரம் பலர் யுபிஐ வசதியை நம்பி பணத்தை கொண்டு செல்லாமல், இணையதள இணைப்பு, செல்போன் சிக்னல் இன்றி கடைசி நேரத்தில் சிக்கலில் மாட்டிக்கொள்வதும் நடக்கிறது. இந்த நிலையில், இணையதள இணைப்பு கூட இல்லாமல், சாதாரண பேசிக் செல்போனில் யுபிஐ மூலம் பணத்தை அனுப்பும் வசதி உள்ளது என்றால் உங்களால் நம்ப முடிகிறதா? நம்ப முடியாவிட்டாலும் அதுதான் நிஜம். அது எப்படி என்று பார்ப்போம்.

இந்த வசதியை வழங்குவது பிரபல தனியார் வங்கியான HDFC தான். இந்த வங்கி சமீபத்தில் யுபிஐ-உடன் இணைந்து மூன்று அம்சங்களை அறிமுகம் செய்து உள்ளது. ஒன்று UPI 123 Pay, இரண்டாவது வியாபாரிகளுக்கான யுபிஐ பிளக் இன் சர்வீஸ், மூன்றாவது கியூஆர் கோடு ஆட்டோ பே.

சரி இவற்றில் இணையதள இணைப்பு இல்லாமல் எப்படி பண பரிவர்த்தனை செய்வது என்று பார்ப்போம்.

1. UPI 123Pay:

UPI 123Pay என்பது ஐவிஆர் மூலமாக பணம் செலுத்தும் திட்டமாகும். சாதாரண போன் கால் மூலமாகவே இதை பயன்படுத்தி பணம் செலுத்த முடியும். இதற்கு ஸ்மார்ட் போனோ, இணையதள வசதியோ தேவையில்லை. இண்டராக்டிவ் வாய்ஸ் ரெஸ்பான்ஸ் எனப்படும் ஐவிஆர் தொழில்நுட்பம் மூலமாக வாடிக்கையாளர்கள் பதிவு செய்துகொண்டு பணம் செலுத்த முடியும்.

2. யுபிஐ பிளக் இன் சர்வீஸ்:

யுபிஐ பிளக் இன் சர்வீஸ் என்ற அம்சம், யுபிஐ பண பரிவர்த்தனைகளை ஒழுங்குபடுத்துகிறது. வெவ்வேறு செயலிகளுக்கு மாறி மாறி சென்று பணம் அனுப்பும் சிரமத்தை இது போக்குகிறது.

3. கியூஆர் கோடு ஆட்டோ பே:

ஓடிடி தளங்கள் போன்று மாதாந்திர சந்தா செலுத்தும் சேவைகள், செல்போன், இணையதளம், கேபிள் மற்றும் டிடிஎச் சேவைகளுக்கான சந்தாக்களை நாமாக செலுத்துவதை தவிர்த்து, தாமாக QR கோடு தொழில்நுட்பம் மூலம் செலுத்து வசதிதான் இந்த ஆட்டோ பே.

English summary

How to Money transfer without internet: At present many people are paying through digital transactions without having cash in hand, let's see how to do digital money transactions without internet connection.