ஆன்லைன் ரம்மி விளம்பரத்தில் சரத்குமார்.. எவ்ளோ பணம் கொடுத்தாலும் நடிக்க மாட்டேன்- சென்ராயன் கெத்து

ஆன்லைன் ரம்மி விளையாட்டில் சரத்குமார் நடித்தது குறித்த கேள்விக்கு நடிகர் சென்ராயன் பதில் அளித்துள்ளார்.

Published: Thursday, March 16, 2023, 15:53 [IST]

Subscribe to Oneindia Tamil

சென்னை: ஆன்லைன் ரம்மி விளம்பரத்தில் நான் நடிக்க மாட்டேன். பணம் கிடைத்தால் எல்லாவற்றிலும் நடிக்க முடியாது என நடிகர் சென்ராயன் தெரிவித்தார்.

ஆன்லைன் ரம்மி விளையாட்டில் ஜெயித்து எப்படியாவது நிறைய பணம் சம்பாதிக்க வேண்டும் என்ற பேராசையில் பலர் கடனை வாங்கி லட்சக்கணக்கில் வைத்து ரம்மி விளையாடுகிறார்கள். அந்த பணத்தை இழந்தாலும் அடுத்த முறை வெல்வோம் என்ற அதீத நம்பிக்கையால் மீண்டும் கடனை வாங்கி விளையாடுகிறார்கள்.

இப்படி அடுத்தடுத்து விளையாடி கடனானது கோடிக்கணக்கை எட்டுகிறது. வாங்கும் ஊதியம் வயிற்றுக்கும் வாய்க்கும் பற்றாத நிலையில் வாங்கிய கடனுக்கு வட்டி கட்ட முடியாமல் கடன் கழுத்தை நெரிக்கிறது.

கழுத்தை நெரித்து தற்கொலை

இதனால் கடன் வாங்கியவர்களும் கழுத்தை நெரித்து தற்கொலை செய்து கொள்கிறார்கள். இது போல் ஆன்லைன் ரம்மியால் 40 க்கும் மேற்பட்டோர் தமிழகத்தில் தற்கொலை செய்துள்ளனர். இதனால் இந்த விளையாட்டை தடை செய்ய வேண்டும் என்ற கோரிக்கை எழுந்துள்ளது. இது குறித்து தமிழக அரசும் இரு முறை சட்டசபையில் தீர்மானம் நிறைவேற்றியது.

ஆன்லைன் ரம்மி தடை

ஆன்லைன் ரம்மி தடை மசோதாவை சட்டமாக இயற்ற ஆளுநரின் ஒப்புதலுக்காக அனுப்பி வைக்கப்பட்டது. ஆனால் இருமுறையும் ஆளுநர் அந்த மசோதாவை அனுப்பிவிட்டார். இதனால் அடுத்து என்ன செய்யலாம் என தமிழக அரசு ஆலோசித்து வருகிறது. இந்த நிலையில் ஆன்லைன் ரம்மி விளையாட்டில் சரத்குமார் உள்ளிட்ட பிரபலங்கள் நடித்து வருவது விமர்சனத்தை ஏற்படுத்தியது.

தமிழக இளைஞர்கள்

காசுக்காக தமிழக இளைஞர்களை தவறான பாதைக்கு அழைத்து செல்கிறார்கள் , அவர்கள் மீது நடவடிக்கை எடுக்க வேண்டும் என்ற கோரிக்கை எழுந்தது. இந்த நிலையில் இதுகுறித்து சரத்குமார் கூறுகையில் நான் வோட்டு போடுங்கன்னு கேட்டாலே யாரும் போடுறதில்லை. இதுல நான் ரம்மி விளையாடுங்கன்னு சொல்றதால மட்டும் அவர்கள் ரம்மி விளையாடிவிருவார்களா என சீறினார்.

சட்டம் அமலானால்

ஆன்லைன் ரம்மி தடை சட்டம் அமலானால் ஆன்லைன் சூதாட்டத்தில் ஈடுபடும் நபர்களுக்கு 3 மாதங்கள் வரை சிறை தண்டனையும் ரூ 5000 அபராதமும் அல்லது இரண்டும் சேர்த்து தண்டனையாகவும் வழங்கப்படும் என மசோதாவில் தெரிவித்துள்ளது. இந்த நிலையில் ஆன்லைன் ரம்மி விளம்பரத்தில் சரத்குமார் நடிப்பது குறித்து சென்ராயன் கூறுகையில் நான் ரம்மி என்ற ஒரு படத்தில் நடித்திருக்கிறேன்.

அஜித் நடித்த மங்காத்தா

மங்காத்தா என்ற அஜித் நடித்த படத்தை பார்த்திருக்கிறேன். மற்றபடி சீட்டாட்டம் என்றால் என்னவென்றே எனக்கு தெரியாது. அதிகபட்சமாக அந்த மாதிரியான விளம்பரத்திற்கு என்னை அழைத்தால் பொதுவாக நான் செல்ல மாட்டேன். பணம் கொடுத்தாலும் அது போன்ற ரம்மி விளம்பரத்தில் நான் நடிக்க மாட்டேன். அந்த விளம்பரங்களை நான் பார்த்ததில்லை. நான் மொபைல் பார்க்கும் போது என் கண்ணில் அந்த விளம்பரம் தென்படவில்லை, அதற்கு நான் என்ன செய்வது என கேள்வி எழுப்பியிருந்தார்.

அதிர்வலைகள்

ஆன்லைன் ரம்மி விளம்பரத்தை தடை செய்ய பல்வேறு அரசியல் கட்சிகள் கோரிக்கை விடுத்து வருகின்றன. ஆனால் அரசியல் கட்சித் தலைவரும் முன்னாள் எம்எல்ஏவுமான சரத்குமார் இந்த விளம்பரங்களில் நடித்து வருகிறார். இது பெரும் அதிர்வலைகளை ஏற்படுத்தியுள்ளது. இந்த விளையாட்டின் மோகத்தால் பல இளைஞர்கள் தங்கள் குடும்பத்தையும் இன்னுயிரையும் இழக்கிறார்கள்.

Published On March 16, 2023