"தனுஷை குறை சொல்லவில்லை!" அட்ஜெஸ்ட்மென்ட் சர்ச்சை, போலி மேனேஜர் மோசடி பற்றி நடிகை மான்யா அறிக்கை

Updated: Wednesday, November 19, 2025, 11:32 [IST]

Subscribe to Oneindia Tamil

சென்னை: தமிழ் சின்னத்திரையில் 'வானத்தைப் போல' போன்ற சீரியல்களில் நடித்து, தமிழக மக்கள் மத்தியில் பிரபலமானவர் நடிகை மான்யா ஆனந்த். இவர் சமீபத்தில் யூடியூப் சேனல் ஒன்றுக்கு அளித்த பேட்டியில், நடிகைகள் சினிமாத் துறையில் சந்திக்கும் அட்ஜெஸ்ட்மென்ட் பிரச்னை குறித்துப் பேசியது பெரும் சர்ச்சையை ஏற்படுத்தியது. இந்தப் பேச்சில், நடிகர் தனுஷின் மேனேஜர் பெயரைப் பயன்படுத்தி தனக்கு அழைப்பு வந்ததாகக் கூறியிருந்ததுதான் இந்தச் சர்ச்சைக்கான முக்கியக் காரணம்.

தனுஷ் மேனேஜர் பெயரில் வந்த அழைப்பு

மான்யா ஆனந்த் தனது பேட்டியில், சினிமா வாய்ப்பு தருவதாகக் கூறி வந்த அழைப்பு குறித்து விரிவாகப் பேசியிருந்தார். அதில் அவர் குறிப்பிட்ட முக்கியமான தகவல்கள் பின்வருமாறு: "நடிகர் தனுஷின் மேனேஜர் ஸ்ரேயாஸ் பேசுகிறேன், தனுஷ் புதுசா ஒரு படத்தை இயக்கப் போகிறார். அதில் நடிப்பீர்களா?" என்று ஒரு நபர் மெசேஜ் செய்திருந்தார். அதற்கு மான்யா ஆனந்த் தனது சில நிபந்தனைகளை (அதாவது அதிக கவர்ச்சியாக நடிக்க மாட்டேன்) தெரிவித்த பிறகு, அந்த நபர், "இந்த வாய்ப்புக்காக கமிட்மென்ட் இருக்கும்" என்று சொன்னார்.

தனுஷ் பெயர்

உடனே மான்யா ஆனந்த், "கமிட்மென்ட் செய்ய மாட்டேன்" என்று சொன்னதும், அந்த நபர், "தனுஷ் கூப்பிட்டாலும் போக மாட்டியா?" என்று மீண்டும் வற்புறுத்தி உள்ளார். அதற்கு முடியாது என்று அவர் திட்டி விட்டாராம். அதன் பின் மற்றொரு நம்பரில் இருந்து இதேபோன்ற அழைப்பு தனக்கு வந்தது எனவும், அந்த நபர் தனக்கு ஸ்கிரிப்டை கூட அனுப்பினார் எனவும் மான்யா ஆனந்த் பேட்டியில் தெரிவித்திருந்தார். இந்தப் பேட்டியில் அட்ஜெஸ்ட்மென்ட் பகுதி மட்டும் சமூக ஊடகங்களில் பரவி, நடிகர் தனுஷை நோக்கி விமர்சனங்கள் எழுந்தன.

சர்ச்சை குறித்து மான்யா ஆனந்த் அளித்த விளக்கம்

தனது பேச்சால் எழுந்த சர்ச்சையைக் கவனித்த நடிகை மான்யா ஆனந்த், உடனடியாகத் தனது இன்ஸ்டாகிராம் பக்கத்தில் அறிக்கை ஒன்றை வெளியிட்டு, இந்தப் பிரச்னை குறித்து விளக்கம் அளித்துள்ளார். மான்யா ஆனந்த் வெளியிட்ட அறிக்கையில் அவர் வலியுறுத்தியவை:

"முதலில் அந்தப் பேட்டியை முழுமையாகப் பாருங்கள். தனுஷ் மேனேஜர் ஸ்ரேயாஸ் பெயரைப் பயன்படுத்தி பொய்யான ஒரு நபர் அப்படிச் செய்து இருக்கலாம் என்றுதான் நான் கூறியிருக்கிறேன். அந்த போன் நம்பரை தனுஷ் சார் டீமுக்கு அனுப்பி, அது யார் என விளக்கம் கேட்டிருப்பதாகவும் கூறியிருக்கிறேன்." இதன் மூலம் நடிகர் தனுஷையோ, அவரது உண்மையான மேலாளரையோ தான் குறை கூறவில்லை என்பதை அவர் தெளிவுபடுத்தியுள்ளார்.

வதந்தி வேண்டாம்

"பேட்டியை முழுவதுமாகப் பார்க்காமல், இதைப்பற்றி பொய்யான செய்தியைப் பரப்பாதீர்கள்" என்றும் மான்யா ஆனந்த் கேட்டுக்கொண்டுள்ளார். மான்யா ஆனந்த் அளித்த இந்த விளக்கம், சினிமாத் துறையில் நடிகைகள் வாய்ப்புத் தேடும்போது, முன்னணி நடிகர்களின் பெயர்களைப் பயன்படுத்திப் பலர் மோசடியில் ஈடுபடுகிறார்கள் என்ற நீண்டகால விவாதத்தை மீண்டும் கிளப்பியுள்ளது.

போலி மேலாளர்கள்

உண்மையில், தனுஷின் மேலாளர் ஸ்ரேயாஸ் சில மாதங்களுக்கு முன்பு தனது பெயரைப் பயன்படுத்திச் சிலர் மோசடியில் ஈடுபடுவதாகப் பகிரங்கமாக எச்சரிக்கை விடுத்திருந்தார். ஒருவேளை மான்யா ஆனந்தும் இதுபோன்ற மோசடி வலையில்தான் சிக்கியிருக்கலாம் என்றும் கருத்துத் தெரிவிக்கப்படுகிறது.

சினிமாவில் வாய்ப்புக்காகப் போராடும் பல சின்னத்திரை நடிகைகள், இதுபோன்ற மோசடி நபர்களிடம் இருந்து தங்களைப் பாதுகாத்துக் கொள்ள வேண்டியதன் அவசியத்தை மான்யா ஆனந்தின் இந்த அனுபவம் வெளிச்சத்துக்குக் கொண்டு வந்துள்ளது. மான்யா ஆனந்த் விடுத்த இந்த விளக்கத்தைத் தொடர்ந்து, இந்தச் சர்ச்சை தனுஷ் மீது நேரடியாகப் பாய்வது குறைந்து, திரையுலகில் நடக்கும் போலி மேலாளர் மோசடிகள் குறித்துப் பேசுபொருளாக மாறியுள்ளது.