நேரடியாக விஜய் டிவியில் வெளியாகும் ஐஸ்வர்யா ராஜேஷின் 'பூமிகா'... ரிலீஸ் தேதி அறிவிப்பு!

சென்னை: நடிகை ஐஸ்வர்யா ராஜேஷின் 25ஆவது படமான 'பூமிகா' நேரடியாக விஜய் டிவியில் வெளியாகும் என அறிவிக்கப்பட்டுள்ளது.

தமிழ் சினிமாவில் சற்று வித்தியாசமான கதையைத் தேர்வு செய்து நடித்து வரும் நடிகைகளில் முக்கியமானவர் ஐஸ்வர்யா ராஜேஷ். 'காக்க முட்டை', 'கனா' என இவரது நடிப்பில் வெளியான பல்வேறு திரைப்படங்களும் கவனம் பெற்றன.

சமீபத்தில் சோனி லிவ் ஓடிடி தளத்தில் வெளியான அவரது 'திட்டம் இரண்டு' திரைப்படமும் சிறப்பான விமர்சனத்தையா பெற்றுள்ளது. இப்போது பல்வேறு திரைப்படங்களில் படுபிஸியாக நடித்து வரும் ஐஸ்வர்யா ராஜேஷின் 25ஆவது படமான 'பூமிகா' ரிலீஸ் குறித்த அறிவிப்பு வெளியாகியுள்ளது.

இயக்குநர் கார்த்திக் சுப்பராஜின் ஸ்டோன் பெஞ்ச் நிறுவனம் சார்பில் தயாரிக்கப்பட்டுள்ள இந்த ஹாரர் த்ரில்லர் படத்தை ரதீந்திரன் பிரசாத் இயக்கியுள்ளார். இந்நிலையில், பூமிகா திரைப்படம் வரும் ஆகஸ்ட் 22ஆம் தேதி மாலை 3 மணிக்கு விஜய் டிவியில் நேரடியாக வெளியாகிறது. இது தொடர்பான அதிகாரப்பூர்வ அறிவிப்பு வெளியாகியுள்ளது.

டிவி வெளியீட்டிற்கு பிந்தைய ஓடிடி உரிமையை நெட்பிளிக்ஸ் நிறுவனம் கைப்பற்றியுள்ளது. எனவே, ஆகஸ்ட் 23ஆம் தேதி பூமிகா திரைப்படம் ஓடிடி வெளியாகும் என எதிர்பார்க்கப்படுகிறது.

English summary

Aishwarya Rajesh's 25th film, 'Boomika' will have a direct television premiere. Actress Aishwarya Rajesh herself revealed that the film will premiere directly on Vijay Television on August 22.