எதிர்ப்புகளை கடந்து.. 25வது நாளில், அமரன் பாக்ஸ் ஆபீஸ் வசூல் எவ்வளவு தெரியுமா? சிவகார்த்திகேயன் மாஸ்

சென்னை: தமிழ் சினிமாவில் அரிதாக காண கிடைக்கும் ராணுவ வீரரின் வாழ்க்கை வரலாறு அடிப்படையில் உருவான ஒரு படம் 'அமரன்'. இந்தப் படம் காஷ்மீரில் தீவிரவாதிகளுடன் மோதி வீர மரணம் அடைந்த சென்னையைச் சேர்ந்த, ராணுவ வீரர் மேஜர் முகுந்த் வரதராஜனின் வாழ்க்கையை நெஞ்சை உருக்கும் வகையில் சித்தரித்தது.

இந்த திரைப்படத்தில், காஷ்மீரிலுள்ள மக்களில் சிலர், தீவிரவாதிகளுக்கு உடந்தையாக செயல்படுவதாக காட்டப்பட்டது. இதை எஸ்டிபிஐ போன்ற இஸ்லாமிய அமைப்புகள் தமிழகத்தில் எதிர்ப்பு தெரிவித்து போராட்டம் நடத்தின. இதனிடையே அமரன் திரையிடப்பட்ட, நெல்லை அலங்கார் திரையரங்கில் ஆளில்லாத நேரத்தில் குண்டு வீசப்பட்டது. இது தொடர்பாக ஒருவர் கைது செய்யப்பட்டுள்ளார்.

கைதான மேலப்பாளையம் பகுதியை சேர்ந்த முகமது யூசுப் ரசின் மீது வெடிபொருள் தடுப்புச் சட்டம் மட்டுமின்றி, மத நல்லிணக்கத்துக்கு பாதக செயல் என்ற பிரிவும் சேர்க்கப்பட்டது. தற்போது அவர் சிறையிலுள்ளார். இதனால் சற்று பதற்றம் ஏற்பட்ட போதிலும், அமரன் வசூலில் எந்த பாதிப்பும் இல்லை என்பது ரிப்போர்ட்டில் தெரியவருகிறது.

இந்தப் படம், வெளியான முதல் மூன்று நாட்களில் உலகளவில் ரூ. 100 கோடிக்கும் மேல் வசூல் செய்து சாதனை படைத்தது. தொடர்ந்து 10 நாட்களில் ரூ. 200 கோடியையும், 20 நாட்களில் ரூ. 300 கோடியையும் கடந்து சாதனை படைத்தது. தற்போது, 25 நாட்களைக் கடந்த நிலையில், அமரன் படம் உலகளவில் ரூ. 314 கோடிக்கும் மேல் வசூல் செய்துள்ளது. இதன் மூலம், படக்குழுவினர் ரூ. 85 கோடிக்கும் மேல் லாபம் ஈட்டியுள்ளதாக தகவல்கள் வெளியாகியுள்ளன. அமரனுக்கு பிறகு வெளியான கங்குவா திரைப்படம் அனைத்து பிரிவு ரசிகர்களாலும் கடுமையாக விமர்சிக்கப்பட்டதால் பல தியேட்டர்களில் அமரன் திரையிடும் காட்சி அதிகரிக்கப்பட்டு, கங்குவா படம் தூக்கப்பட்டுள்ளதும் வசூல் வளர்ச்சிக்கு ஒரு காரணம்.

சிவகார்த்திகேயன், இதற்கு முன்பு காமெடி கலந்த கதாபாத்திரங்களில் மட்டுமே நடித்து வந்தார். ஆனால், 'அமரன்' படத்தில் அவர் முற்றிலும் மாறுபட்ட கதாபாத்திரத்தில் நடித்து தனது நடிப்புத் திறமையை வெளிப்படுத்தியுள்ளார். ராணுவ வீரராக அவரது தோற்றம், உடல்மொழி மற்றும் நடிப்பு அனைத்தும் பாராட்டப்பட்டது.

சாய் பல்லவி, முகுந்தின் மனைவி இந்து ரெபக்கா வர்கீஸாக நடித்திருந்தார். அவரது அழகான தோற்றம், இயல்பான நடிப்பு மற்றும் கண்களில் பேசும் காதல் ஆகியவை பார்வையாளர்களை கவர்ந்தது. இந்தப் படத்தை கமல்ஹாசனின் நிறுவனம் ராஜ்கமல் பிக்சர்ஸ் தயாரித்தது. தயாரிப்பு மதிப்பு படத்தின் ஒவ்வொரு காட்சியிலும் தெரிகிறது. படத்தின் ஒளிப்பதிவு, இசை, பின்னணி இசை என அனைத்தும் சிறப்பாக அமைந்துள்ளன.

'அமரன்' படம் ஒரு வீரனின் வாழ்க்கை வரலாற்றை மிகவும் உணர்வுபூர்வமாக சொல்லியது. இது ஒரு வீரனுக்கு அஞ்சலி மட்டுமல்லாமல், நாட்டுக்காக தன் உயிரை தியாகம் செய்யும் ராணுவ வீரர்களின் தியாகத்தை நினைவுபடுத்துகிறது. தேசப்பற்று பிளஸ் குடும்ப சென்டிமென்ட் ஆகியவை இணைந்து அமரன் திரைப்படத்தை, வேட்டையனை விட அதிகம் வசூலித்த படமாகவும், சிவகார்த்திகேயனின் முதலாவது 300 கோடிக்கு மேல் வசூல் ஈட்டிய படமாகவும் மாற்றியுள்ளது.

சரி, உங்களுக்கு படம் பிடித்திருந்ததா, இல்லையா?

English summary

Amaran Box Office Collection: A Blockbuster Success Worldwide: Amaran, the biographical Tamil film starring Sivakarthikeyan and Sai Pallavi, has grossed ₹314 crore globally, making it one of the top 3 highest-grossing films of the year. Directed by Rajkumar Periyasamy and produced by Rajkamal Films International, the movie honors Major Mukund Varadarajan's bravery and sacrifice. With its patriotic theme, powerful performances, and engaging storytelling, Amaran has captured hearts and set new box office records.